މަޝްހޫރު ނޫސްވެރިޔާ އަހުމަދު މުހުސިން ރާއްޖެޓީވީގެ ޓީމާ އަލުން ގުޅިއްޖެއެވެ.

މުހުސިންއަކީ މީގެ ކުރިންވެސް ރާއްޖެޓީވީގައި ގިނަ ދުވަސްތަކެއް ވަންދެން މަސައްކަތްކޮށްފައިވާ ތަޖުރިބާކާރު ނޫސްވެރިއެކެވެ.

2002 ވަނަ އަހަރު މިއަދު ނޫހުން ނޫސްވެރިކަމުގެ ދާއިރާއަށް ތަޢާރަފްވި މުހުސިން މި ދާއިރާގައި މެދު ނުކެނޑި މަސައްކަތްކުރާތާ 22 އަހަރު ވެއްޖެއެވެ. ނޫސްވެރިކަމުގެ މިނިވަންކަން ލިބިގެން އައި އިރު އޭނާ މަސައްކަތްކުރީ އައްޑުވަސް ނޫހުގެ ސީނިއަރ ރިޕޯޓަރެއްގެ ގޮތުގައެވެ.

ނޫސްވެރިކަމުގެ ދާއިރާއަށް ކުރެއްވި ޚިދުމަތްތަކުގެ އަގު ވަޒަންކޮށް، ރައީސުލްޖުމްހޫރިއްޔާ ދެއްވާ ހިތްވަރު ދިނުމުގެ އިނާމާއި، މީޑިއާ ކައުންސިލުން ދޭ ނޫސްވެރިކަމުގެ ރަންގަލަން މުހުސިނަށް ލިބިފައިވެއެވެ.

އޭނާ މީގެ ކުރިން ވެސް ފާހަގަކުރެވިފައިވަނީ ސަރުކާރު ޖަވާބުދާރީ ކުރުވުމަށް ރައީސް އޮފީހުން ބާއްވާ އެކި އެކި ނޫސްވެރިންގެ ބައްދަލުވުންތަކުގައި ސަރުކާރު ޖެހިލުންވާ ފަދަ ސުވާލުތައް ކުރާ ނޫސްވެރިއެއްގެ ގޮތުގައެވެ.

ރާއްޖެޓީވީގައި ކުރި މަސައްކަތްތަކުގެ ތެރެއިން ބެލުންތެރިންނަށް އެންމެ ފާހަގަކުރެވޭ އެއް މަސައްކަތަކީ މުހުސިން ލިޔާ "މަގޭ ރިޕޯޓް" ތަކެވެ. އާއްމުންގެ ވަރަށް ބޮޑު މަގުބޫލުކަމެއް ލިބިފައިވާ މި ރިޕޯޓްތަށް މުހުސިން ހުށަހަޅައިދޭ ގޮތްވެސް ބެލުންތެރިންނަށް ވަރަށް ކަމުދެއެވެ.

މުހުސިންއަކީ ނޫސްވެރިކަމުގެ ދާއިރާގެ ގިނަ ހުނަރު ލިބިފައިވާ ނޫސްވެރިއެކެވެ. އެގޮތުން ޚަބަރު ލިޔުމާއި، އަޑު އެޅުމާއި، ޚަބަރު ކިޔުމާއި، ޕްރޮގްރާމް ހުށަހެޅުމަކީވެސް މުހުސިން ކުރާ މަސައްކަތްތަކެކެވެ. މީގެ އިތުރުން މި ދާއިރާއިން ކުދިން ބިނާކުރުމަށް ކިޔަވައިދިނުމަކީ ވެސް މުހުސިން ކުރާ މަސައްކަތެކެވެ.

މުހުސިން ފަދަ މި ދާއިރާގެ ތަޖުރިބާކާރު ނޫސްވެރިއެއް ރާއްޖެޓީވީއާއި ގުޅިގެން ދިއުމަކީ، ރާއްޖެޓީވީގެ ޓީމަށް ލިބުނު އިތުރު ހިތްވަރެކެވެ. މުހުސިންއަކީ ނޫސްވެރިކަމުގެ އިތުރުން ސަރުކާރަށްވެސް މީގެ ކުރިން ޚިދުމަތްކޮށްފައިވާ ފަރާތެކެވެ.