ދައުލަތުގެ މީޑިއާ (ޕީއެސްއެމް)އިން ކީރިތި ޤުރުއާނުގެ އާޔަތްތަކަށް ބަދަލު ގެނެސްގެން ދެއްކި މައްސަލަ ބަލައި ފިޔަވަޅު އެޅުމަށް ރައްޔިތުން މަޖިލީހުގެ އެމްޑީޕީގެ މެންބަރުން ގޮވާލައްވައިފިއެވެ.
ބުރާސްފަތި ދުވަހު ޤުރުއާނުގެ އާޔަތްތަކަށް ބަދަލު ގެނެސްގެން ދައުލަތުގެ މީޑިއާއިން ދެއްކި މައްސަލައެއް ސަރުކާރުގެ ސަމާލުކަމަށް ގެނައުމަށް ޖަލްސާއަށް ކުއްލި މައްސަލައެއް ހުށަހަޅާފައިވެއެވެ. މި މައްސަލަ ހުށަހެޅުއްވީ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރެވެ. މި މައްސަލަ މަޖިލީހުން ބަލައިގެންފައިވަނީ ވޯޓުގައި ބައިވެރިވި 71 މެންބަރުންގެ އިއްތިފާގުންނެވެ.
މި މައްސަލައަށް ބަހުސްކުރައްވަމުން ހިތަދޫ ދެކުނު ދާއިރާގެ މެންބަރު, އެމްޑީޕީގެ ޕާލަމަންޓްރީ ގްރޫޕް (ޕީޖީ) ލީޑަރު އިބްރާހިމް ނާޒިލް ވިދާޅުވީ މިއީ ވަރަށް ހައްސާސް މައްސަލައެއް ކަމަށެވެ.
މެންބަރު ނާޒިލް ވިދާޅުވީ ކީރިތި ޤުރުއާނުގެ މޫރިތި އާޔަތްތައް އޮޅޭ ކަހަލަ ގޮތަކަށް މީޑިއާއިން ގެނެސްދީފައިވާ ކަމަށާއި، އެއީ ގަސްތުގައި ކުރިކަމެއްތޯ ނުވަތަ ޓެކްނިކަލް އެރޯއަކުން ވީ ކަމެއްތޯ ބަލައި ތަހުގީގު ކުރަންޖެހޭ ކަމަށެވެ. އަދި އެގޮތަށް ޤުރުއާން ދެއްކުމަށްފަހު އެކަން ނައްތާލުމަށް އެކްލިޕްތައް ޑިލީޓް ކޮށްފައިވާ ކަމަށާއި، މިއީ ކަންބޮޑުވާ މައްސަލައެއް ކަމަށް މެންބަރު ނާޒިލް ވިދާޅުވިއެވެ.
މެންބަރު ނާޒިލް ވިދާޅުވީ ޤުރުއާންގެ އާޔަތްތައް ބަދަލުކޮށް އެގޮތަށް ގެނައުމަކީ ޔަހޫދީންގެ ތެރެއިންވާ ކަމެއް ކަމަށާއި، ޤުރުއާންގައި އެކަން ބަޔާންކޮށްފައިވާ ކަމަށެވެ. މިއީ ދޫކޮށްލެވޭވަރުގެ މައްސަލައެއް ނޫން ކަމަށް މެންބަރު ނާޒިލް ވިދާޅުވިއެވެ.
މި ވާހަކަ ދައްކަން ފެށީމަ މި ދިފާއުގައި އެކި ގޮތްގޮތަށް ކުރީ ސަރުުކާރޭ ކިޔާފައި އެވާހަކަ ދެއްކުމެއް ނެތް. އެއަށްވުރެ ރަނގަޅަށް މިކަންތައްތައް ހިނގާދިޔަ ގޮތް ބަލައި މަޖިލީހުގެ މެންބަރުން މިބަލައި ތަކުރާރުނުވާނެހެން ކަންތައްތައް ކުރެވޭނެ މަގުން ކުރުމަކީ މީގެ އެންމެ ރަނގަޅު ގޮތަކީ. ނަމަވެސް ކުރީ ސަރުކާރުން ކޮންމެވެސް ތަނެއްގެ ޕޯޑިއަމްގައި ދެއްކި ވާހަކައަކާ ގުޅުވާފައި އެގޮތަށް ނިންމުމުގެ ބަދަލުގައި މިކަމެއް ހިނގާ ދިޔައީ ހަގީގަތުގައި ބަޔަކު އެކަން ކުރަން ބޭނުންވެގެން ކުރިކަމެއްތޯ ބަލައި ތަހުގީގުކޮށް އެކަން އެގޮތަށް ނުކުރެވޭނެގޮތަށް އަމަލުކުރަންޖެހޭ. މިއީ އަޅުގަނޑުމެންނަށް ލާޒިމް ކަމެއް. މިކަން ހިނގާދިޔަ ގޮތް ބަލައިދިނުމަށް. އެޅެން އޮތް ހަރުކަށި ފިޔަވަޅު އަޅައިދިނުމަށް ގޮވާލަން.ހިތަދޫ ދެކުނު ދާއިރާގެ މެންބަރު, އެމްޑީޕީގެ ޕާލަމަންޓްރީ ގްރޫޕް (ޕީޖީ) ލީޑަރު އިބްރާހިމް ނާޒިލް
މިމައްސަލައާ ގުޅިގެން ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވީ މިމައްސަލާގައި އެޕާޓީ މިޕާޓީ ކިޔައި ޒުވާބު ކުރަން ނުޖެހޭ ކަމަށާއި، މިމައްސަލަ ބަލައި ފިޔަވަޅު އަޅަންޖެހޭ ކަމަށެވެ.
މީގެ އިތުރުން މެންބަރު ޒިޔާދު ވިދާޅުވީ ޕީއެސްއެމްއަކީ ދައުލަތުގެ މީޑިއާ ނަމަވެސް އެމީޑިއާއިން ސަރުކާރާ ދެކޮޅު ޕާޓީތަކަށް ފުރުސަތު ނުލިބޭ ކަމަށެވެ. އަބަދުވެސް ދައުލަތުގެ މީޑިއާ ހިންގަމުންދަނީ ދަރަނީގައި ކަމަށާއި، ދައުލަތުގެ މީީޑިއާއަށްވާއިރު، އެމީޑިއާއިން ދިވެހި ހުރިހާ ރައްޔިތުންނަށް ފުރުސަތު ލިބެންޖެހޭ ކަމަށް މެންބަރު ޒިޔާދު ވިދާޅުވިއެވެ.
މެންބަރު މައުރޫފް ހުށަހެޅި ކުއްލި މައްސަލާގައި ބުނެފައިވަނީ ޕީއެސްއެމްގެ ސިޔާސަތުތަކުގެ ގޮތުގައި ކަނޑައަޅައި ބަޔާންކޮށްފައިވާ ކަންކަމަށް ބަލާއިރު، ދީނީ، އިގުތިސާދީ، އިޖުތިމާއީ، ސިޔާސީ އަދި އެ ނޫން ވެސް ގައުމަށް ބޭނުންތެރި ހުރިހާ ދާއިރާއެއްގައި މައުލޫމާތު މުއްސަނދި ހޭލުންތެރި ރައްޔިތެއް ބިނާކުރަން މަސައްކަތްކުރުން ހިމެނޭ ކަމަށެވެ. ދިވެހި ރައްޔިތުންނަށް މުހިންމުވާނެ ބައިނަލްއަގުވާމީ އެކި ކަންކަމާއި ގައުމީ އެކި ކަންކަމުގެ ޚަބަރާއި، މައުލޫމާތާއި، ކަން ހިނގަމުންދާ ގޮތް ރައްޔިތުންނަށް އަންގައިދިނުމަކީ ޕީއެސްއެމްގެ މައްޗަށް ލާޒިމުކޮށްފައިވާ ކަންކަން ކަމަށް މައްސަލައިގައި ބުނެފައިވެއެވެ.
ގިނަ ބަޔަކު ތުހުމަތުކުރާ ގޮތުގައި ރައީސް ޑރ. މުހައްމަދު މުއިއްޒު އއ. އަތޮޅާއި ކ. އަތޮޅުގެ ބައެއް ރަށްތަކަށް ކުރެއްވި ދަތުރުފުޅުގެ ތެރެއިން އއ.ރަސްދޫގައި ބޭއްވި ޖަލްސާއެއް ފެށުމަށް ޤުރުއާން ކިޔެވިއިރު ޖަލްސާގެ ލައިވުން ބައެއް ވަނީ އުނިކޮށްފައެވެ. އަދި ފަހުން ޕީއެސްއެމުން ވަނީ އެ ލައިވް ޑިލީޓުކޮށްފައެވެ.
