ހައުސިންގ މިނިސްޓްރީ ހިނގަމުންދާ އަލިފާންގަނޑު ފެތުރި އެންވަޔަރަމެންޓް މިނިސްޓްރީ ހިންގަމުން އަންނަ ގްރީން ބިލްޑިންގެ ފުރަތަމަ ދެ ފަންގިފިލާގައި އަލިފާން ރޯވެއްޖެއެވެ.

އެމްއެންޑީއެފުން ބުނީ އަލިފާނުގެ ހާދިސާ އާ އެކު، ހައުސިން އަދި އިންފްރާސްޓްރަކްޗާ މިނިސްޓްރީ ހިންގާ އިމާރާތުގެ ޓިނު ބިލްޑިންގ ވަރަށް ބޮޑަށް އަނދާހުލިވެފައިވާ ކަމަށެވެ. އަދި އެ ބިލްޑިންގ ގެ 90 އިންސައްތަ އަލިފާން ނިއްވާލެވިފައިވާ ކަމަށެވެ. ނަމަވެސް އެންވަޔަރަމެންޓް މިނިސްޓްރީ ހިންގަމުން އަންނަ ގްރީން ބިލްޑިންގެ 2 ވަނަ އަދި 3 ވަނަ ފަންގިފިލާގައި އަލިފާން ރޯވެ އަނދަމުންދާ ކަމަށެވެ.

ހައުސިން އަދި އިންފްރާސްޓްރަކްޗާ މިނިސްޓްރީ އަލިފާން ރޯވުމާއެކު، އެ އިމާރާތުގައި ހިންގާ މާލޭ ސިޓީ ކައުންސިލްގެ އޮފީހުގައި ހުރި ބައެއް ލިޔެކިޔުމާއި އެހެން ސާމާނު އެ އިމާރާތުން ނެރިފައިވެއެވެ.

މީގެ އިތުރުން ޓިނު ބިލްޑިންގެ އޮޕޮޒިޓަށް ވާގޮތަށް ހުރި އާންމުން ދިރިއުޅޭ ގެއެއް ކަމަށްވާ "މަހުމާ ވިލާ" ގައި ކޮންމެވެސް ވަރަަކަށް އަލިފާން ހިފައިފައިވާ ކަމަށް އެމްއެންޑީއެފުން ބުނެއެވެ.

މި އަލިފާނުގެ ހާދިސާއާ ގުޅިގެން ދައުލަތުގެ މީޑީއާއަށް ޑިފެންސް މިނިސްޓަރު ޣައްސާން މައުމޫން ވިދާޅުވީ އަލިފާނުގެ ހާދިސާ ހިނގައިގެން އުޅޭކަމުގެ މައުލޫމާތު ބުރާސްފަތި ދުވަހުގެ ހެނދުނު 6:30 ހާއިރު ލިބިފައިވާ ކަމަށާއި، އެވަގުތުން ފެށިގެން އެމްއެންޑީއެފްގެ ފަޔަރ ޓީމުން ހަރަކާތްތެރިވާން ފަށާފައިވާ ކަމަށެވެ.

ހައުސިން އަދި އިންފްރާސްޓްރަކްޗާ މިނިސްޓްރީ ހިންގާ އިމާރާތުގެ އަލިފާންގަނޑު ކޮންޓްރޯލް ކުރެވުނު ނަމަވެސް ޓިނުން ހަދާފައި ހުރި އިމާރާތް އެއްކޮށް ވަނީ ވެއްޓިފައެވެ.

ހައުސިންގ މިނިސްޓްރީ ހުންނަ ބޮލޮކަކީ ސަރުކާރުގެ ގިނަ އޮފީސްތަކެއް ހުންނަ ބްލޮކެކެވެ. އޭގެ ތެރޭގައި ހައުސިންގ މިނިސްޓްރީ އާއި، އެންވަޔަންމަންޓް މިނިސްޓްރީ އާއި މިހާރު އުވާލާފައިވާ މޯލްޑްވިސް ލޭންޑް އެންޑް ސާވޭ އޮތޯރިޓީ ހިނގި ބަޔާއި އަދި މާލޭ ސިޓީ ކައުންސިލުގެ މުހިންމު އޮފީހެއް ހިމެނެއެވެ.