މާލޭގައި ޓެކްސީ ޑްރައިވަރުންގެ ގޮތުގައި މަސައްކަތް ކުރާ ފަރާތްތަކާ ރައީސް މުހައްމަދު މުއިއްޒު އަންގާރަ ދުވަހު ބައްދަލު ކުރައްވާ ކަމަށް މައުލޫމާތު ލިބިއްޖެއެވެ.

އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި ރައީސް މުއިއްޒު ވަނީ ޑްރައިވަރުން ތަމްސީލު ކުރާ ފަރާތްތަކާ އަންގާރަ ދުވަހު ހެނދުނު ރައީސް އޮފީހަށް އައުމަށް ދައުވަތު ދެއްވާފައެވެ.

ސަރުކާރުގެ ސިޔާސަތުތައް ގެންގެޅެމުން ދާ ގޮތުން ޓެކްސީގެ ޚިދުމަތް ދޭ ފަރާތްތަކަށާއި، އަދި ޓެކްސީ ޑްރައިވަރުންގެ މަސައްކަތައް ބޮޑެތި ގެއްލުންތަކެއް ވާނެ ކަމަށް އެފަރާތްތަކުން ތަކުރާރު ކޮށް ބުނަމުން ދިޔަނަމެވެސް ސަރުކާރުން މިހާތަނަށް އެ ކަންބޮޑުވުންތަކަށް އެދެވޭ އިޖާބައެއް ދީފައެއް ނުވެއެވެ.

އަންގާރަ ދުވަހު މުއިއްޒު ޑްރައިވަރުންނާ ބައްދަލު ކުރައްވާއިރު، މި ދިޔަ ބުރާސްފަތި ދުވަހުގެ ރައްޔިތުންގެ މަޖިލީހަށް ދައުވަތު ދީގެން ޑްރައިވަރުންތަކެއް ގެންގޮސް ޕީއެންސީގެ ޕާލިމެންޓަރީ ގްރޫޕްގެ ލީޑަރު އިނގުރައިދޫ ދާއިރާގެ މެމްބަރު އިބްރާހީމް ފަލާހް އާއި، ވިލިމާލެ ދާއިރާގެ މެމްބަރު މުހައްމަދު އިސްމާއީލް އާއި ހުޅުދޫ ދާއިރާގެ މެމްބަރު މުހައްމަދު ޝާހިދު ވަނީ ބައްދަލު ކުރައްވާފައެވެ.

އެ ބައްދަލުވުމުގައި ޑްރައިވަރުން ވަނީ ކަންބޮޑުވުންތަކުގެ ގޮތުގައި މުހިންމު ކަންތައްތަކެއް ހުށަހަޅާފައެވެ. އެ ގޮތުން ހުށަހެޅި ކަންތައްތަކުގެ ތެރޭގައި:

• ސަރުކާރުން ޓެކްސީ ފްލީޓް ވުޖޫދަށް ނުގެންނާނެ ކަމަށް ޕަބްލިކަށް އިޢުލާން ކުރުން؛

• ވޭން ޑްރައިވަރުންގެ އަގުތައް ކުރިން ހުރި އަގުތަކަށް ބަދަލު ކުރުން؛

• އެސްއެމްއީ ލޯނުތަކަށް ގެނެސްފައިވާ ކާރުތަކުގެ ރަޖިސްޓްރޭޝަން ޕްރޮސެސް އަވަސް ކޮށްދިނުން؛

• އެއަރޕޯޓް އަދި މާލޭގެ ޓްރެފިކް ފްލޯ ޓެކްސީ ޑްރައިވަރުންނަށް ފަސޭހަ ކަމާއެކު ދުއްވޭނެ ގޮތަކަށް ހަދައި ދިނުމާއި އަދި ފަސޭހައިން ދަތުރު ނެގޭނެ މާހައުލަކަށް ހަދައި ދިނުން؛

• ރައީސް މުއިއްޒު އާ ވީ އެންމެ އަވަހަކަށް ބައްދަލުވާނެ މަގު ފަހި ކޮށްދިނުން؛

• ޓެކްސީ ޑްރައިވަރުންގެ ދަފްތަރު އަލުން ހުޅުވާލުން؛ އަދި

• މާލޭގައި ވަގުތީ އަދި ދާއިމީ ޕާކް ކުރެވޭނެ ގޮތެއް ހަދައިދިނުމެވެ. 

ޓެކްސީ ޑްރައިވަރުން މި ކަންކަން ހުށަހެޅުމުން މެމްބަރުން ވަނީ "ތީގައި ތިއުޅެނީ ވަރަށް ކުދި ކުދި މައްސަލަތަކެއް،" ކަމަށާއި ޑިސެމްބަރު 10 ގެ ކުރިން ރައީސް މުއިއްޒު އާ ޑްރައިވަރުންނާ ބައްދަލު ކުރެވޭނެ ގޮތެއް ހަދާނެ ކަަމަށެވެ.           

ޓެކްސީ ޑްރައިވަރުންނާ އެކު ބޭއްވި މި ބައްދަލު ވުމުގައި ޕީޖީ ލީޑަރު ފަލާހު ވިދާޅުވި ކަމަށް ވަނީ 10 ޑިސެމްބަރ 2024 ގައި ޤާނޫނު އަސާސީގެ ދިފާޢުގައި ކަމަށް ބުނެ ބަޔަކު މަގުމައްޗަށް ނިކުންނަށް އުޅެނީ، އެއްވެސް އަސާސެއްގެ މައްޗަށް ބިނާކޮށް ނޫން ކަމަށެވެ.

ގާނޫނު އަސާސީ އަށް ކުއްލި ގޮތަކަށް ގެނައި ބޮޑެތި ބަދަލުތަކަކާ ދެކޮޅަށް ރާއްޖޭގެ އެންމެ ބޮޑު ސިޔާސީ އެއް ޕާޓީ ކަމުގައިވާ އެމްޑީޕީ އިން އަންނަނީ ޑިސެމްބަރު 10 ވަނަ ދުވަހު ބޮޑު ޖަލްސާ އެއް ބޭއްވުމަށް ތައްޔާރުވަމުންނެވެ.