ރައީސް އޮފީހުގެ ތަރުޖަމާނު އަދި އެންސްޕާގެ ސީއީއޯ ހީނާ ވަލީދު މަގާމުން ދުރަށް ގޮސް އޭނާގެ މައްޗަށް މަނީ ލޯންޑަރިންގެ ދައުވާ އުފުލެން ޖެހޭ ކަމަށް ކުރީގެ ރައީސް ޔާމީން އަބްދުލް ގައްޔޫމް ވިދާޅުވެއްޖެ އެވެ.

ރައީސް ޔާމީން މި މޭރުމުން ވާހަކަފުޅު ދެއްކެވީ "އެމްއެމް ޓީވީ" އަށް އެންސްޕާ ގެ އެތައް މިލިއަން ރުފިޔާ ބޭނުން ކޮށްފައިވާ ކަމުގެ ތުހުމަތުގެ އަޑުތައް ގަދަވެފައި ވަނިކޮށް އެ މައްސަލަ އާ ބެހޭ ގޮތުން ފާޑު ވިދާޅުވަމުންނެވެ.

މޯލްޑިވްސް މީޑީއާ ހައުސްގެ ނަމުގައި އުފައްދާފައިވާ ކުންފުނިން ދާދި ފަހުން ފެށި "އެމްއެމް ޓީވީ" ޗެނަލް އަކީ ރައީސް މުހައްމަދު މުއިއްޒު ޕްރޮމޯޓްކުރުމަށް ރައީސް އޮފީހުގެ މިނިސްޓަރު އިބްރާހިމް ހަލީލް އިސްވެ ހުންނަވައި، ލޯންޗްކުރި ޓީވީ ޗެނެލް އެއް ކަމަށް ރާއްޖޭގެ ބައެއް މީޑީއާ ތަކުން ވަނީ މީގެ ކުރިން ރިޕޯޓު ކޮށްފައެވެ.

ޔާމީން ވިދާޅުވީ، އެމްއެމް ޓީވީ ހެދުމަށް ދައުލަތުގެ ފައިސާ ލޯންޑަރ ކުރިކަން ފެންނަން އެބައޮތް ކަމުގައެވެ.

"ދައުލަތުގެ ފައިސާ މިއޮތީ ފެންނަން، މިއޮތީ މަނީ ލޯންޑަރ ކޮށްފައި، މިއޮތީ މަނީ ލޯންޑަރ ކޮށްފައި، އިނގޭތޯ، މިއޮތީ މަނީ ލޯންޑަރ ކޮށްފައި، އިނގޭތޯ،" ރައީސް ޔާމިން އެމަނިކުފާނުގެ ޕާޓީ ޕީއެންއެފް ގެ ފްރަންޓް އޮފީސް ޖަލްސާގައި ވާހަކަފުޅު ދައްކަވަމުން ހޯމަ ދުވަހުގެ ރޭ ވިދާޅުވިއެވެ.

ޔާމީން ވިދާޅުވީ، "އެހެންވީމާ މިހާ ހިސާބުން މުއިއްޒު އެބަ ވިދާޅުވެ ދެއްވަން ޖެހޭ މޯލްޑިވްސް މީޑިއާ ހައުސް އަކީ ތިމަންނަގެ ތަނެއް ނޫނޭ،..އެހެން ނުވާ ކަމަށް ވަންޏާ ރައްޔިތުން ގަބޫލު ކުރަނީ މިއީ މުއިއްޒުގެ ޓީވީ" ކަމަށެވެ.

ޔާމީން ވިދާޅުވީ އެންސްޕާގެ ސީއީއޯ ގެ މަގާމުން ހީނާ ވަލީދު އިސްތިއުފާން ދޭން ޖެހޭނެ ކަމަށެވެ.

"ހީނާ އެބަ ޖެހޭ އެ މަގާމުން ދުރައްދާން،" ޔާމީން ވިދާޅުވިއެވެ.

މީޑިއާ ރިޕޯޓުތަކުގައިވާ ގޮތުން، 28 ޑިސެމްބަރު 2024 ވަނަ ދުވަހުގެ ރޭ ލޯންޗު ކުރި މި ޗެނެލް ހިންގާ ކުންފުނި ކަމުގައިވާ މޯލްޑިވްސް މީޑިއާ ހައުސް އާ އެންސްޕާ އާއި ދެމެދު ވަނީ 34.8 މިލިއަން ރުފިޔާގެ އެއްބަސްވުމެއް ހަދާފައިވެ އެވެ.  

ޔާމީން ވިދާޅުވީ، ހީނާ ވަލީދުގެ މައްޗަށް މަނީ ލޯންޑަރިންގެ ދައުވާ އުފުލެން ޖެހޭ ކަމަށެވެ.

ކުންފުޏެއްގެ ނަމުގައި މުއާމަލާތްތައް ހިންގާފައި ވިޔަސް މިފަދަ ކަންކަމުގައި ދައުވާ އަންނަނީ ޝަހުސީ ގޮތުން މީހާގެ މައްޗަށް ކަމަށް ރައީސް ޔާމީން ވިދާޅުވިއެވެ.

"ނަޒާހަތްތެރި ކަމުގެ ގޮތުން ބަލައިފި ކަމަށް ވަންޏާ އެމީހުން (ހީނާ) ދުރައް ދާން ޖެހޭ،" ކަމަށް ޔާމީން ފާހަގަ ކުރެއްވި އެވެ.

އެއީ ބޮޑު ސިންގާ މަނީ ލޯންޑަރިންގެ ކަމެއް ހިންގާފައިވާތީ ކަމަށް ތަކުރާރު ކުރައްވާ ޔާމީން ވިދާޅުވިއެވެ.

މީޑިއާތަކުގައިވާ ޚަބަރުތަކަށް ބަލާއިރު އެންސްޕާއިން ހިންގާފައިވާ ކަމަށް ތުހުމަތު ކުރެވޭ 34.8 މިލިއަން ރުފިޔާގެ ކަރަޕްޝަން ހިމެނޭ މި ޑީލުގެ ދަށުން، މީޑިއާ ހައުސްއިން ހަމަ އެ އިމާރާތުން 4 ފަންގިފިލާ ވަނީ ކުއްޔަށް ހިފާފައިވެ އެވެ.

މޯލްޑިވްސް މީޑިއާ ހައުސް އާއި އެންސްޕާ އާ ދެމެދު އިމާރާތް ކުއްޔަށް ހިފުމުގެ އެއްބަސްވުން ހެދި ކަމުގެ ވާހަކަތައް އާންމުވުމާ ގުޅިގެން 29 ނޮވެމްބަރު 2024 ގައި އެންސްޕާ އިން ނެރުނު ބަޔާނުގައި އެންސްޕާ އާ ބެހޭ ގޮތުން ނޫސްތަކުން ފަތުރަމުންދާ ވާހަކަތަކަކީ ހަގީގަތާއި ޚިލާފު ދޮގު ވާހަކަތަކެއް ކަމަށް ބުނެފައިވެއެވެ.

އެހެން ނަމަވެސް އެންސްޕާ ހިންގުމަށް ބޭނުންވާ ފަންގިފިލާތައް "މޯލްޑިވްސް މީޑިއާ ހައުސް އިން ކުއްޔަށް ހިފުމުގެ މަސައްކަތް ވަނީ ކުރެވިފައި؛" ކަމަށް އެންސްޕާ އިން 02 ޑިސެމްބަރުގައި ނެރުނު ބަޔާނެއްގައި ވަނީ ބުނެފައެވެ.

އެންސްޕާ އިން މިކަމާ ބެހޭ ގޮތުން ނެރުނު ބަޔާން ތަކަށް އިޝާރާތް ކުރައްވާ ޔާމީން ވިދާޅުވީ، ބަޔާން ނެރުމަކުން "ގޯސް ކޮށް ކޮށްފައި އޮތް ކަމެއް ރަނގަޅެއް ނުވާނެ" ކަމަށެވެ.

ރައީސް ޔާމީން ފާހަގަ ކުރެއްވި ގޮތުގައި މި މައްސަލައިގެ ވާހަކަ މަޖިލީހުގައި ދައްކަން އުޅުމުން އެކަމަށް މަޖިލީހުގެ ރިޔާސަތު ވަނީ ހުރަސް އަޅުއްވާފައި ކަމުގައެވެ.

ހޯމަ ދުވަހު ރައްޔިތުންގެ މަޖިލީހަށް މިކަމާ ގުޅޭ ކުއްލި މައްސަލަ އެއް ހުށަހެޅުމުން މުއިއްޒު ސަރުކާރުގެ ސުޕަރ މެޖޯރިޓީ އޮންނަ ރައްޔިތުންގެ މަޖިލީހުން މައްސަލަ ބޭރު ކުރީ “ހަގީގަތެއް ނެތް” ކަމަށް ބުނެއެވެ.

އޭގެ އިތުރުން އެންސްޕާ އިން ހިންގި ކަމަށް ތުހުމަތު ކުރެވޭ ޚިޔާނާތުގެ މި ބޮޑު މައްސަލައިގެ ވާހަކަ މަޖިލީހުގެ ތަޅުމުގައި ގަލޮޅު ދެކުނު ދާއިރާގެ މެމްބަރު މީކާއީލް ނަސީމް ދައްކަވަން އުޅުއްވުމުން މަޖިލީހުގެ ރިޔާސަތުން ވަނީ އެކަން ހުއްޓުވާފައެވެ.

އެކަމާ ގުޅިގެން މީކާއީލް އެކްސް ގައި ވިދާޅުވީ "މަޖިލިސް ގަވާއިދާ ކަނޑައެޅިގެން ހިލާފަށް، ވައްކަމާއި ހިޔާނާތުގެ ވާހަކަ ދެއްކުން ހުއްޓުވަން ފަށައިފި،" ކަމަށެވެ.

"ނަޒާހަތްތެރިކަން ގެއްލިފައި، މަނީ ލޯންޑަރ އެހެރީ ކޮށްފައި، އެއޮތީ ކަން އޮތް ގޮތް" ޔާމީން ވިދާޅުވިއެވެ.

ހީނާ ވަލީދު މަގާމުން ވަކިކޮށް މައްސަލަ ތަހުގީގު ކުރަން ޖެހޭނެ ކަމަށް ސޯޝަލް މީޑިއާ ގައިވެސް ގިނަ ބަޔަކު އަންނަނީ ބުނަމުންނެވެ.