ހައްޖު ކޯޕަރޭޝަނުން ގެސްޓްހައުސްތައް އަޅައި، ފަތުރުވެރިކަމުގެ ސިނާއަތަށް ވަނުމަކީ ނަތީޖާ ރަނގަޅުވާނެ ކަމެއް ނޫން ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
އަންގާރަ ދުވަހުގެ ރައްޔިތުން މަޖިލީހުގެ ޖަލްސާގައި ވެލިދޫ ދާއިރާގެ މުހައްމަދު އައްބާސް ވަނީ ހައްޖު ކޯޕްރޭޝަނުން ގެސްޓް ހައުސް ހަދާ ކަމަށްވާނަމަ ވާނެ ގޮތާއި މެދު ސުވާލުކޮށްފައެވެ.
މިސުވާލަށް ޖަވާބު ދެއްވަމުން މިނިސްޓަރު ޒަމީރު ވިދާޅުވީ ހައްޖު ކޯޕްރޭޝަނަށް ފަންޑެއް ލިބުމުން އެފަންޑު މެނޭޖް ކުރަންޖެހޭ ކަމަށެވެ. އަދި އެކޯޕްރޭޝަންގެ މަސައްކަތަކީ މީހުން ހައްޖަށް ފޮނުވައި، އެމަސައްކަތްތައް ކުރުން ކަމަށް މިނިސްޓަރު ޒަމީރު ވިދާޅުވިއެވެ.
ފަތުރުވެރިކަމުގެ ސިނާއަތަށް އިންވެސްޓް ކުރާ ސަރުކާރުގެ ކުންފުނިތައް ހުރިކަން ފާހަގަކުރައްވައި މިނިސްޓަރު ޒަމީރު ވިދާޅުވީ އެހެން މަސައްކަތްތައް ކުރާ ކުންފުނިތަކުން މިސިނާއަތުގެ މަސައްކަތް ފެށުމުން ނަތީޖާ ރަނގަޅުވާނެ ކަމަށް ނުބެލެވޭ ކަމަށެވެ. އަދި މިމައްސަލާގައި ޕޮލިސީ ލެވަލްއެއްގައި މަޝްވަރާކުރާނެ ކަަމަށް މިނިސްޓަރު ޒަމީރު ވިދާޅުވިއެވެ.
އެހެންވީމަ އަޅުގަނޑަށް ހީވަނީ އަސްލުގައި ގެސްޓްހައުސް ހިންގަން ހައްޖު ކޯޕްރޭޝަނުން މަސައްކަތް ކުރުން އޭގެ ޒާތުގައި އެއީ އެންމެ ފައިދާ ހުރި ގޮތްތޯ އަޅުގަނޑުމެން ކުންފުނީގެ ބޯޑުންނާއި، އަދި ކުންފުނީގެ ހިއްސާދާރުން އެބަ ޖެހޭ ވިސްނަން. އެއީ އާއްމު ގޮތެއްގައި އެކްސެސް ފަންޑު ހުރެއްޖެ ކަމަށްވަންޏާ އެކަމުގެ ސްޕެޝަލިސްޓުންނާއި ހަވާލުކޮށްގެން ފަންޑު މެނޭޖްކޮށްގެން އޭގެ ފައިދާ ކުންފުންޏަށް ހޯދާފި ކަމަށްވެއްޖެއްޔާ އޭގެ ނަތީޖާ ރަނގަޅުވާނެ ކަމަށް މިފެންނަނީ. އެއީ ޓޫރިޒަމަށް މިސާލަކަށް އިންވެސްޓް ކުރާ ކަމަށްވެއްޖެއްޔާ ޓޫރިޒަމްއަށް އިންވެސްޓް ކުރެވޭނެ ކުންފުނި އެބަހުރި ސަރުކާރުގެ އެސްއޯއީތައް. އެހެންވީމަ ހުރިހާ ކުންފުނިތައް އެޗްޑީސީއާއި، ނޫން ކަމަށްވެއްޖެއްޔާ ހައްޖު ކޯޕްރޭޝަން ނޫނިއްޔާ ފެނަކަ އެންމެން ގެސްޓްހައުސްއާއި ރިސޯޓު ހެދީމަ އަޅުގަނޑަށް ހީވަނީ އޭގެ ނަތީޖާ ރަނގަޅެއް ނުވާނެހެން. އެއީ އަޅުގަނޑުގެ ޝޯޓް އާންސަރއަކީ.ފިނޭންސް މިނިސްޓަރު މޫސާ ޒަމީރު
06 ނޮވެންބަރު 2024 ގައި ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގެ ބައްދަލުވުމެއްގައި ފުވައްމުލަކު މެދު ދާއިރާގެ ޕީއެންސީގެ މެންބަރު އަލީ ފަޒާދު ވަނީ ހެޔޮ އަގުގައި ރައްޔިތުންނަށް ހައްޖަށް ދެވޭނެ ގޮތްތަކެއް ފަހިކޮށްދޭން ކުރަމުން އަންނަ މަސައްކަތްތަކާ ގުޅޭ ގޮތުން ސުވާލުކޮށްފައެވެ.
މިސުވާލަށް ޖަވާބު ދެއްވަމުން ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް ވިދާޅުވީ ރާއްޖޭގައި ދިމާވެފައިވާ އެންމެ ބޮޑު އެއް ދައްޗަކީ ބޭރު ފައިސާ ހޯދުން ކަމަށާއި، އެކަން ހައްލުކުރުމަށް މާފުށީގައި ހަލާލު ޓޫރިޒަމް ތައާރަފްކުރަން ނިންމާފައިވާ ކަމަށެވެ. އެގޮތުން ހައްޖު ކޯޕަރޭޝަނާާއި، މާފުށީ ކައުންސިލާއި ގުޅިގެން ސަބްސިޑަރީ ކުންފުންޏެއް ހަދައި، އެމަސައްކަތް ކުރާނެ ބިން ވެސް މިހާރު ހަމަޖެހިފައިވާ ކަމަށް ވެސް އޭނާ ވިދާޅުވިއެވެ.
