ރައީސް މުހައްމަދު މުއިއްޒު ގެ ޓީވީ ޗެނެލެއްގެ ގޮތުގައި އަޑު އަރާފައިވާ "އެމްއެމްޓީވީ" ހިންގާ ކުންފުނި "މޯލްޑިވްސް މީޑީއާ ހައުސް" ރަޖިސްޓަރީ ކޮށްފައިވަނީ ރައީސް މުއިއްޒުގެ ކޮމިއުނިކޭޝަން މިނިސްޓަރ އިބްރާހީމް ޚަލީލު ދިރިއުޅުއްވާ ގ. ދަނބުކޮކާ ގައި ކަން ހާމަ ވެއްޖެއެވެ.

އިކޮނޮމިކް މިނިސްޓްރީގެ ބިޒްނަސް ޕޯޓަލް ގައި ވާ މައުލޫމާތުން އެކަން ހާމަވެފައިވާއިރު، ޕޯޓަލްގައި ކުންފުނީގެ އިތުރު ޝެއަރހޯލްޑަރުންގެ މައުލޫމާތު މިހާރު އުނިކޮށް، ފެންނަނީ ހަމަ އެކަނި މެނޭޖިންގ ޑިރެކްޓަރގެ ނަން ކަން ފާހަގަ ކުރެވެވެ.

ކަރަޕްޝަންގެ ބޮޑު ތުހުމަތެއް ކުރެވިފައިވާ މޯލްޑިވްސް މީޑީއާ ހައުސް ގެ މެނޭޖިންގ ޑިރެކްޓަރ، އަދި ބޯޑް އޮފް ޑިރެކްޓަރސް، އަދި ޝެއަރހޯލްޑާސް ގެ ގޮތުގައިވެސް މިހާރު އޮތީ އެންމެ ނަމެކެވެ. އެއީ އަބްދުﷲ ޒާހިރު އެވެ.

އެހެން ނަމަވެސް ކުރިން އިކޮނޮމިކް މިނިސްޓްރީގެ ޕޯޓަލްގައި މޯލްޑިވްސް މީޑީއާ ހައުސްގެ ޝެއަރހޯލްޑަރުންގެ ގޮތުގައި އިތުރު ދެ ފަރާތެއް ވަނީ ހިމަނާފައެވެ. އެއީ، އަހްމަދު ސައިފް ހަލީމް އާއި އައިޝަތު ޝީރީން އެވެ. މީގެ ތެރެއިން ސައިފް އަކީ ޚަލީލުގެ ދޮން ދަރިއެއް ކަމަށް މި ނޫހަށް މައުލޫމާތު ލިބިފައިވެއެވެ.

މޯލްޑިވްސް މީޑީއާ ހައުސް އިން 5 ބިޒްނަސް ނަމެއް އިކޮނޮމިކް މިނިސްޓްރީގައި ވަނީ ރަޖިސްޓަރީ ކޮށްފައެވެ. އެއީ، އެމްއެމް ޓީވީ އާއި، އެންމެންގެ ޓީވީ އާއި، ދިވެހިންގެ ޓީވީ އާއި، އެމްއެމް އިވެންޓްސް އެވެ.

ބައެއް ފަރާތްތަކުން ބުނާ ގޮތުގައި "އެމްއެމް" ރަމްޒު ކޮށްދެނީ މުހައްމަދު މުއިއްޒު އެވެ.

"އެމްއެމް ޓީވީ" ޗެނަލް އަކީ ރައީސް މުހައްމަދު މުއިއްޒު ޕްރޮމޯޓް ކުރުމަށް ރައީސް އޮފީހުގެ މިނިސްޓަރު އިބްރާހިމް ހަލީލް އިސްވެ ހުންނަވައި، ލޯންޗްކުރި ޓީވީ ޗެނެލް އެއް ކަމަށް ރާއްޖޭގެ ބައެއް މީޑީއާ ތަކުން ވަނީ މީގެ ކުރިން ރިޕޯޓު ކޮށްފައެވެ.

މީޑިއާ ރިޕޯޓުތަކުގައިވާ ގޮތުން، 28 ނޮވެމްބަރ 2024 ވަނަ ދުވަހުގެ ރޭ ލޯންޗު ކުރި މި ޗެނެލް ހިންގާ ކުންފުނި ކަމުގައިވާ މޯލްޑިވްސް މީޑިއާ ހައުސް އާ އެންސްޕާ އާއި ދެމެދު ވަނީ 34.8 މިލިއަން ރުފިޔާގެ އެއްބަސްވުމެއް ހަދާފައިވެ އެވެ. އެއީ އެންސްޕާ ހިންގުމަށް ފަސް އަހަރު ދުވަހު މއ. ސީރާޒީގެ ދެ ފަންގިފިލާ ކުއްޔަށް ހިފުމާ ގުޅޭ އެއްބަސްވުން ކަމަށް ވެސް ރިޕޯޓްތައް ބުނެއެވެ.

ސޯޝަލް މީޑިއާގައި މި އެއްބަސްވުމާ ބެހޭ ލިޔެކިޔުންތައް ލީކުކޮށްލާފައި ވާއިރު، ޓެންޑާ ބޯޑް މެދުވެރިކޮށް ހަދާފައިވާ މި އެއްބަސްވުމުގެ ދަށުން އެ ގެއިން ދެ ފަންގިފިލާ ހިފާފައިވަނީ މަހަކު 580،000ރ އެންސްޕާ އިން ޚަރަދު ކުރާ ގޮތަށެވެ.

މީޑިއާތަކުގައިވާ ޚަބަރުތަކަށް ބަލާއިރު އެންސްޕާއިން ހިންގާފައިވާ ކަމަށް ތުހުމަތު ކުރެވޭ 34.8 މިލިއަން ރުފިޔާގެ ކަރަޕްޝަން ހިމެނޭ މި ޑީލުގެ ދަށުން، މީޑިއާ ހައުސްއިން ހަމަ އެ އިމާރާތުން 4 ފަންގިފިލާ ވަނީ ކުއްޔަށް ހިފާފައިވެ އެވެ.

ރާއްޖޭގެ މީޑިއާ ތަކުގައި އާންމު ކޮށްފައިވާ މައުލޫމާތުގައި ބުނާ ގޮތުން އޭގެ ތެރެއިން 2 ފަންގިފިލާ އެންސްޕާ އަށް ދޫކޮށްފައިވާއިރު، އަނެއް 2 ފަންގިފިލާ ބޭނުން ކުރަނީ އެމްއެމް ޓީވީ ހިންގުމަށެވެ. މި އެއްބަސްވުމަށް ބަލާއިރު، އެމްއެމް ޓީވީ ހިންގާ ދެ ފަންގިފިލާގެ ކުލި ވެސް ހަމަޖައްސާފައިވަނީ އެންސްޕާ އިން ނެވެ.

ބައެއް މީޑިއާ ތަކުން ބުނެފައިވާ ގޮތުގައި މި ޓީވީ ޗެނަލް ހެދުމަށް ބޭނުންވާ ސާމާނު ހޯދާފައިވަނީ، ދައުލަތުގެ މީޑިއާ އަށް ގެންނަ ސާމާނުގެ ގޮތުގައި އެސްޓީއޯއިން ކަމަށާއި އެތަކެތި ގަތުމަށް ގާތްގަނޑަކަށް 21 މިލިއަން ރުފިޔާ އެސްޓީއޯ އިން ޚަރަދު ކޮށްފައިވާ ކަމަށެވެ.

މިކަން ހާމަ ކޮށް ޚަބަރުތައް ފެތުރު ނަމަވެސް އެސްޓީއޯ އިން އަދި ޕީއެސްއެމް އިން ވެސް މިކަން މިހާތަނަށް ދޮގު ކޮށްފައެއް ނުވެއެވެ.

މޯލްޑިވްސް މީޑިއާ ހައުސް އާއި އެންސްޕާ އާ ދެމެދު އިމާރާތް ކުއްޔަށް ހިފުމުގެ އެއްބަސްވުން ހެދި ކަމުގެ ވާހަކަތައް އާންމުވުމާ ގުޅިގެން 29 ނޮވެމްބަރު 2024 ގައި އެންސްޕާ އިން ނެރުނު ބަޔާނުގައި އެންސްޕާ އާ ބެހޭ ގޮތުން ނޫސްތަކުން ފަތުރަމުންދާ ވާހަކަތަކަކީ ހަގީގަތާއި ޚިލާފު ދޮގު ވާހަކަތަކެއް ކަމަށް ބުނެފައިވެއެވެ. އެ އޭޖެންސީ ހިންގުމަށް އިމާރާތެއް ހޯދުމުގެ މުއާމަލާތް ހިންގީ ފިނޭންސް މިނިސްޓްރީ އާ ގުޅިގެން ގަވައިދާ އެއްގޮތައް ކަމަށް ބުނެފައިވެއެވެ.

"އެއީ މި އެޖެންސީ އާއި އެހެން އެއްވެސް ފަރާތަކާ ދެމެދު ކުރެވިފައިވާ މުއާމަލާތެއް ނޫނެވެ." ބަޔާނުގައި ވެއެވެ.

ނޮވެމްބަރ 29 ގައި އެންސްޕާ އިން ވަނީ މި މައްސަލަ ތަހުގީގު ކުރުމަށް އެންޓި ކަރަޕްޝަން ކޮމިޝަން (އޭސީސީ) އަށް ހުށަހަޅާފައެވެ. އޭސީސީ އަށް މައްސަލަ ހުށަހެޅި އިރު އެ ކޮމިޝަން ގެ ގާނޫނަށް މި ސަރުކާރުން ގެނައި ބަދަލާއެކު ކޮމިޝަންގެ ރައީސް އަކީ ރައީސުލް ޖުމްހޫރިއްޔާ އިޚްތިޔާރު ކުރައްވާ ބޭފުޅެއްކަން ފާހަގަ ކުރެވެއެވެ.

މިކަންކަން މިހެން ހިނގާފައިވަނިކޮށް އެންސްޕާ ހިންގުމަށް ބޭނުންވާ ފަންގިފިލާތައް "މޯލްޑިވްސް މީޑިއާ ހައުސް އިން ކުއްޔަށް ހިފުމުގެ މަސައްކަތް ވަނީ ކުރެވިފައި؛" ކަމަށް އެންސްޕާ އިން 02 ޑިސެމްބަރުގައި ނެރުނު ބަޔާނެއްގައި ވަނީ ބުނެފައެވެ.

މޯލްޑިވްސް މީޑީއާ ހައުސް ދިފާއު ކޮށް އެންސްޕާ އިން ނެރެފައިވާ އެ ބަޔާނުގައި މި މުއާމަލާތާ ގުޅިގެން މޯލްޑިވްސް މީޑިއާ ހައުސްގެ އަގު ވައްޓާލައި، ބަދުނާމު ކުރުމަށް ހަގީގަތާއި ޚިލާފު އެތައް ވާހަކަތަކެއް ދައްކާ މީޑިއާގެ އެކި ވަސީލަތްތައް ބޭނުންކޮށްގެން އެއްވެސް އަސްލެއް ނެތް ދޮގު ވާހަކަތައް ފަތުރަމުން ދިޔުމުގެ ސަބަބުން މޯލްޑިވްސް މީޑިއާ ހައުސް އަށް މާއްދީ ގޮތުންނާއި މައުނަވީ ގޮތުން ފޫނުބެއްދޭ ވަރުގެ ބޮޑު ގެއްލުމެއް ކުރިމަތިވެފައިވާ ކަމަށް ވަނީ ބުނެފައެވެ. އެހެންވެ، އެއްބަސްވުން އުވާލުމަށް އެންސްޕާ އިން ހުށަހަޅާފައިވާ ކަމަށް ބަޔާނުގައި ވެއެވެ.

މި ބަޔާނާ ގުޅިގެން ސޯޝަލް މީޑިއާގައި ކޮމެންޓު ކޮށްފައިވާ އެތައް ފަރާތަކުން ބުނެފައިވަނީ އެންސްޕާ އިން ކަރަޕްޝަން ހިންގާފައިވާ ކަމަށް މި ބަޔާނުންވެސް އިއުތިރާފް ވާ ކަމަށާއި، އަމިއްލަ ކުންފުންޏެއްގެ ދިފާއުގައި އެންސްޕާއިން މަސައްކަތް ކޮށްފައިވަނީ ކީއްވެތޯވެސް ބައެއް ފަރާތްތަކުން ސުވާލު ކޮށްފައިވެއެވެ.