ޖަލުގައި ހުންނެވި ކުރީގެ ބޮޑުވަޒީރު އިމްރާން ޚާން ދޫކޮށްލުމަށް ގޮވާލާ ޕާކިސްތާނުގެ އިދިކޮޅު ފަރާތްތަކުން ކުރަމުންދިޔަ މުޒާހަރާތައް ވަގުތީގޮތުން ހުއްޓާލައިފިއެވެ.

ޕާކިސްތާނުގެ އެކި ހިސާބުތަކުން މުޒާހަރާގެ ބައިވެރިން އިސްލާމާބާދަށް ޖަމާވުމަށްފަހު ފެށި މުޒާހަރާ ވަގުތީ ގޮތުން ހުއްޓާލީ "ސަރުކާރުގެ އަނިޔާވެރިކަމުން" ކަމަށް ވަނީ ބުނެފައެވެ.

މުޒާހަރާ ކުރި ފަރާތްތަކުން އެއްވުން ފެށީ އިމްރާން ޚާން ދޫކޮށް ނުލާހާ ހިނދަކު ވެރިރަށުން ނުދާނެކަމަށް ބުނެފައެވެ.

ގައުމީ ހަރަކާތެއްގެ ގޮތުގައި ކުރިއަށް ގެންދިޔަ މުޒާހަރާގެ ބައިވެރިންނަށް ހުރަސް އެޅުމަށް ވެރި ރަށް އިސްލާމް އާބާދުގެ މައި މަގުތަކުގައި ބަރިބަރި އަށް ޝިޕިންގ ކޮންޓޭނަރު ޖަހާފައި ވަނިކޮށް ބައިވެރިން ވަނީ އެތަކެތި ހުރަސް ކޮށް ޑިމޮކްރަސީ މައިދާނަށް ގޮސްފައެވެ. އެހެން ނަމަވެސް އެއާއެކު، ފުލުހުން މުޒާހަރާގެ ބައިވެރިންގެ ގަޔަށް ކަރުނަ ގޭސް ޖަހާ އެމީހުން ފަހަތަށް ޖެއްސިއެވެ.

އާދީއްތަ ދުވަހު ފެށި މުޒާހަރާގައި ހިނގި ކުރިމަތިލުން ތަކުގައި މަދުވެގެން 6 މީހުން މަރުވި ކަމަށް ރިޕޯޓްތައް ބުނެއެވެ. އޭގެ ތެރޭގައި ސެކިއުރިޓީ އޮފިޝަލުންނާއި އާންމު ރައްޔިތުން ހިމެނެއެވެ.

އިމްރާން ޚާންގެ ޕާޓީ، ޕާކިސްތާން ތަހްރީކް-އެ-އިންސާފް (ޕީޓީއައި) އިން ބުދަ ދުވަހު ނެރުނު ބަޔާނެއްގައި ބުނެފައިވަނީ "ސަރުކާރުގެ އަނިޔާވެރިކަމުގެ ސަބަބުން" މުޒާހަރާތައް "ވަގުތީގޮތުން ހުއްޓާލާފައި" ވާކަމަށެވެ.

އިމްރާން ޚާން އަށް ތާއީދު ކުރާ ފަރާތްތަކަށް އަންގާރަ ދުވަހު ވެރިރަށުގެ މެދުތެރެއާ ހަމަ އަށް ވާސިލުވެވުނު ނަމަވެސް، އިރުއޮއްސެން ވީއިރު ރަޔަޓް ގިޔަރުގައި ތިބި ސަލާމަތީ އޮފިޝަލުން ވަނީ އެމީހުން އެ ސަރަހައްދުން ނެރެ ފޮނުވާލާފައެވެ.

ސަރުކާރުގެ މަސްދަރަކާ ހަވާލާދީ ޕާކިސްތާނު މީޑިއާ އިން ބުނެފައިވާ ގޮތުގައި ފުލުހުން ވަނީ 500 އަށްވުރެ ގިނަ ޕީޓީއައި އެކްޓިވިސްޓުން ހައްޔަރުކޮށްފައެވެ. އަދި ދާޚީލީ ވަޒީރު ވިދާޅުވެފައިވަނީ މުޒާހަރާގައި މުހިންމު ދައުރެއް އަދާކުރި އިމްރާން ޚާންގެ އަނބިކަނބަލުން ބުޝްރާ ބީބީ އެ ސަރަހައްދު ދޫކޮށް ގޮސްފައިވާ ކަމަށެވެ.

ޕީޓީއައި އިން ބުނެފައިވަނީ އެ ޕާޓީގެ އެތައް އެކްޓިވިސްޓުން މުޒާހަރާގެ ކުރިމަތިލުން ތަކުގައި މަރުވެފައިވާ ކަމަށާއި، އެކަން ތަޙްޤީޤުކުރުމަށް ގޮވާލާ ކަމަށެވެ.

ހޮސްޕިޓަލެއްގެ ދެ މަސްދަރަކުން ބީބީސީ އަށް މައުލޫމާތު ދީފައިވާ ގޮތުގައި ވަޒަން އަރައިގެން މަރުވެފައިވާ 4 އާންމު ރައްޔިތެއްގެ ހަށިގަނޑު ހޮސްޕިޓަލަށް ގެނެސްފައިވާ ކަމަށެވެ.

އިމްރާން ޚާން ޖަލުގައި ހުންނަވާތާ އަހަރަކަށް ވުރެ ގިނަ ދުވަސް ވެފައިވާއިރު އޭނާ ވިދާޅުވަނީ އޭނާ ބަންދުކޮށްފައިވަނީ އޭނާގެ މައްޗަށް ސިޔާސީ ދައުވާތަކެއް ކޮށްގެން ކަމުގައެވެ.