ޒަމާނީ ފެންވަރަށް ޤައުމީ ދާރުލްއާސާރު ތަރައްޤީކޮށް ދިރުން ގެނައުމަށް މަސައްކަތްތައް ފެށިފައި ވަނީ ރައީސް ޑރ މުޙައްމަދު މުއިއްޒުގެ ސަރުކާރުން ކަމަށް ބުނެ ފެތުރި ވާހަކަ ކުރީގެ ހެރިޓޭޖު މިނިސްޓަރު، ޔުމްނާ މައުމޫން ދޮގުކުރައްވައިފިއެވެ.
ޤައުމީ ދާރުލްއާސާރު ޒަމާނީ ފެންވަރަށް ތަރައްޤީކުރުމުގެ މަސައްކަތް ފެށީ ކޮން ސަރުކާރަކުން ކަން ރައްޔިތުންނަށް އޮޅޭ ގޮތަށް ހެރިޓޭޖް މިނިސްޓްރީން އެކްސްގައި ކޮށްފައިވާ ޕޯސްޓަށް ރައްދު ދެއްވާ ޔުމްނާ ވިދާޅުވީ، އެއީ ކަނޑައެޅިގެން ދޮގެއް ކަމަށެވެ.
"ޒަމާނީ ފެންވަރަށް ޤައުމީ ދާރުލްއާސާރު ތަރައްޤީކުރުމުގެ މަސައްކަތް ކުރީ ނިމިދިޔަ ސަރުކާރުން ބޭންކް އޮފް މޯލްޑިވްސްގެ ގްރާންޓެއްގެ ދަށުން" ކަމަށް ޔުމްނާ އެކްސްގައި ކުރެއްވި ޕޯސްޓުގައި ވިދާޅުވެފައި ވެއެވެ.
ހެރިޓޭޖް މިނިސްޓްރީން ކޮށްފައިވާ ޕޯސްޓުގައި ބުނެފައިވަނީ "ޒަމާނީ ފެންވަރަށް ޤައުމީ ދާރުލްއާސާރު ތަރައްޤީކޮށް ދިރުން ގެނައުމަށް މަސައްކަތްތައް ފެށިފައި ވަނީ ނިމިދިޔަ ކާމިޔާބު 52 ހަފްތާގެ ތެރޭގައި" ކަމަށެވެ.
ދާރުލްއާސާރު ތަރައްޤީކުރުމުގެ މަޝްރޫޢަކީ ދިވެހި ތާރީޚާއި ސަގާފަތް ދެމެހެއްޓުމަށް ވަރަށް މުހިންމު މަޝްރޫޢެކެވެ.
