ލުބުނާނުގައި އިޒްރޭލުން ހިންގަމުން ދަނީ "ހަނގުރާމައިގެ ޖަރީމާތަކުގެ ސިލްސިލާ" އެއް ކަމަށް އެ ގައުމުގެ ހެލްތް މިނިސްޓްރީން ބުނެފިއެވެ.

އެ ގޮތުން ސިއްހީ ޚިދުމަތްތެރިންނަށް ގަސްތުގައި ހަމަލާދީ މަރަމުން ދާ ކަމަށާއި އަދި ސިއްޙީ ޚިދުމަތްދޭ ތަންތަނަށް ހަމަލާދީ އެތަންތައް ނައްތާލަން އިޒްރޭލުން މަސައްކަތް ކުރަމުންދާ ކަމަށް ވެސް ލުބުނާނުން ވަނީ ތުހުމަތު ކޮށްފައެވެ. ހެލްތް މިނިސްޓްރީން ބުނާ ގޮތުގައި އިޒްރޭލުގެ ވައިގެ ހަމަލާތަކުގައި ޤައުމުގެ އުތުރު އިރުމަތީގައި ހުރި ހޮސްޕިޓަލެއްގެ ޑިރެކްޓަރަކު މަރުވެފައި ވާއިރު، ދެކުނުގައި 5 ޕެރަމެޑިކުން ވަނީ މަރާލާފައެވެ.

އަނެއްކޮޅުން ޣައްޒާގައި އިޒްރޭލުން ކަމާލް އަދްވާން ހޮސްޕިޓަލުގައި ހިނގަމުންދާ ހަނގުރާމަ "ވަގުތުން ހުއްޓާލުމަށް" ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ) ގެ ވެރިޔާ ގޮވާލައްވައިފިއެވެ. ޑަބްލިޔުއެޗްއޯ ގެ ޑިރެކްޓަރ ޖެނެރަލް މިކަމަށް ގޮވާލެއްވި އިރު، އިޒްރޭލުގެ ޑްރޯނަކުން އެ ފެސިލިޓީއަށް ހަމަލާދީ 4 މެޑިކަލް މުވައްޒަފުންނާއި 2 ބަލިމީހުން ވަނީ ޒަޚަމްވެފައެވެ.

ރިޕޯޓުތައް ބުނާ ގޮތުގައި ކަމާލް އަދްވާން ހޮސްޕިޓަލުގެ ހާލަތު އޮތީ ހިދުމަތް ދެވޭ ފެންވަރެއްގައެއް ނޫނެވެ. މިހާރު އެތަން ބޭނުންކުރެވެނީ ފަސްޓް އެއިޑް ސެންޓަރެއްގެ ގޮތުގައެވެ. ހޮސްޕިޓަލުގައި އެއްވެސް ބޮޑު އޮޕަރޭޝަނެއް ނުހިންގޭ ކަމަށާއި އޮކްސިޖަން ސްޓޭޝަނެއް ހަލާކުވެފައިވާތީ ހޮސްޕިޓަލަށް އޮކްސިޖަން ސަޕްލައި ކުރުން ހުއްޓިފައިވާ ކަމަށްވެސް ރިޕޯޓުތައް ބުނެއެވެ. މިހާރު ބޭނުންކުރެވެނީ ހަމައެކަނި ހޮސްޕިޓަލުގައި ބާކީ ހުރި އޮކްސިޖަން ޓޭންކުތަކެވެ. މިއީ ހޮސްޕިޓަލުގެ އެތެރޭގައި ހުރި ކުދި ޓޭންކުތަކެކެވެ. އަދި ވަރަށް އަވަހަށް މި ޓޭންކުތައް ހުސްވާނެ ކަމަށާއި މިހާރުވެސް މިކަމުގެ ސަބަބުން އިންކިއުބޭޓަރުގައި އޮތް ކުޑަކުއްޖެއް މަރުވެފައިވާ ކަމަށް ރިޕޯޓުތައް ބުނެއެވެ. މީގެ އިތުރުން، ހޮސްޕިޓަލަށް ގަވާއިދުން ތެޔޮ ނުލިބުމުގެ މައްސަލަ ދިމާވެފައިވެއެވެ. އަލްޖަޒީރާ އިން ބުނާ ގޮތުގައި ޖުމްލަކޮށް ބަލާއިރު، މިއީ ވަރަށް ދަތި ހާލަތެއް ކަމަށާއި އިޒްރޭލުގެ ސިފައިން ބޭނުންވަނީ މި ދަތި ހާލަތްތައް އުފެއްދުމުގެ ތެރެއިން ހޮސްޕިޓަލުން މެޑިކަލް މުވައްޒަފުންނާއި ބަލިމީހުން ނެރުމަށް ކަމަށް ވެސް އަލްޖަޒީރާ އިން ރިޕޯޓު ކޮށްފައިވެއެވެ.

ލުބުނާނާއި ޣައްޒާގައި ސިއްހީ އޮފިޝަލުންނާއި ސިއްހީ ޚިދުމަތްދޭ ތަންތަނަށް އިޒްރޭލުން ގަސްދުގައި ހަމަލާދޭ ކަމަށް ބެލެވިފައިވާއިރު، 2023 ވަނަ އަހަރުގެ އޮކްޓޯބަރު މަހުން ފެށިގެން އިޒްރޭލާއި ހިޒްބުﷲ އާ ދެމެދު ހަނގުރާމަ ފެށުނީއްސުރެ މި ހަފްތާގެ ކުރީކޮޅާ ހަމައަށް 226 ސިއްޙީ މުވައްޒަފުންނާއި ބަލިމީހުން މަރުވެފައިވާކަމަށް ޑަބްލިޔުއެޗްއޯ ގެ އައު ރިޕޯޓެއްގައި ބުނެފައިވެއެވެ.

އިޒްރޭލުން ޣައްޒާގައި ހިންގަމުންދާ ނަސްލު ނައްތާލުމުގެ ހަނގުރާމައިގައި 2023 ވަނަ އަހަރުގެ އޮކްޓޯބަރު 7 އިން ފެށިގެން މަދުވެގެން 44،056 ފަލަސްޠީނު މީހުން މަރުވެފައިވާއިރު 104،286 މީހުން ވަނީ ޒަޚަމްވެފައެވެ.

ލުބުނާނުގައި، އިޒްރޭލްގެ ހަމަލާތަކުގައި މަދުވެގެން 3،645 މީހުން މަރުވެފައިވާއިރު 15،355 މީހުން ވަނީ ޒަޚަމްވެފައެވެ.