ބުރާސްފަތި ދުވަހު ލުބުނާނުގެ އިރުމަތީ އަދި ދެކުނު ސަރަޙައްދުތަކަށް އިޒްރޭލުން ދިން ހަމަލާތަކުގައި 52 މީހުން މަރުވެއްޖެ ކަމަށް އެ ގައުމުން ބުނެފިއެވެ.
އަނެއް ކޮޅުން ފާއިތުވި އަހަރެއްހާ ދުވަހުގެ ތެރޭގައި އިޒްރޭލަށް ދިން އެންމެ ވަރުގަދަ ހަމަލާ ދީފައިވާ ކަމަށް ހިޒްބުﷲ އިން ވަނީ ބުނެފައެވެ.
"އިޒްރޭލުގެ އަދުއްވުން ބައަލްބެކް ސަރަޙައްދަށް އަމާޒުކޮށް ދިން ހަމަލާތަކުގައި" ލުބުނާންގެ އިރުމަތީގައިވާ ބެކާ ވެލީގައި "40 މީހުން މަރުވެ އަދި 52 މީހުން ޒަޚަމްވެފައިވާ" ކަމަށް ޞިއްޙަތާ ބެހޭ މިނިސްޓްރީގެ ބަޔާނެއްގައި ބުނެފައިވެއެވެ.
ލުބުނާންގެ ރަސްމީ ނޭޝަނަލް ނިއުސް އެޖެންސީ (އެންއެންއޭ) އިން ބުނެފައިވަނީ މަގްނެހް އަވަށުގައިވާ ގެއަކަށް ދިން ހަމަލާއެއްގައި މުޅި އާއިލާ މަރާލާފައިވާ ކަމަށެވެ. އަދި ކައިރީގައިވާ ނަބްހާ އަވަށަށް ދިން ހަމަލާއެއްގައި މަރުވެފައިވާ 11 މީހުންގެ ތެރޭގައިވެސް އާއިލާ އެއްގެ ހުރިހާ މެންބަރުން ހިމެނޭ ކަމަށެވެ.
މިނިސްޓްރީން އިތުރަށް ބުނެފައިވަނީ "އިޒްރޭލުގެ އަދުއްވުން ދިން ހަމަލާތަކުގައި" ދެކުނު ލުބުނާނުގެ ނަބަތިއްޔާ ސަރަޙައްދުގައި "ހަތް މީހުން މަރުވެ އަދި 24 މީހުން ޒަޚަމްވެފައިވާ" ކަމަށެވެ. އަދި ދެކުނު ލުބުނާންގެ އެހެން ސަރަޙައްދު ތަކަށް ދިން ހަމަލާތަކުގައި "ފަސް މީހުން މަރުވެ އަދި 26 މީހުން ޒަޚަމްވެފައިވާ" ކަމަށެވެ.
އިޒްރޭލުން، ބުނެފައިވަނީ ލުބުނާނުން ދިން ރޮކެޓް ހަމަލާއެއްގައި އެ ޤައުމުގެ އުތުރުގައިވާ ގަލީލީ ސަރަޙައްދުން އެކަކު މަރުވެފައިވާ ކަމަށެވެ.
އެންއެންއޭ އިން ބުނެފައިވަނީ ބުރާސްފަތި ދުވަހު ބެއިރޫތުގެ ދެކުނުގެ ރަށްވެހި ސަރަޙައްދުތަކަށް، އިޒްރޭލުން މަދުވެގެން 12 ހަމަލާ ދީފައިވާ ކަމަށެވެ.
ލުބުނާންގެ ޞިއްޙަތާ ބެހޭ މިނިސްޓްރީން ބުރާސްފަތި ދުވަހު ބުނެފައިވަނީ 2023 ވަނަ އަހަރުގެ އޮކްޓޯބަރު މަހުން ފެށިގެން މިހާތަނަށް އިޒްރޭލުގެ އަނިޔާވެރިކަމުގައި މަދުވެގެން 3,583 މީހުން އެ ގައުމުން މަރުވެފައިވާ ކަމަށެވެ.
އިޒްރޭލުގެ ސިފައިންގެ ފަރާތުން ބުދަ ދުވަހު ބުނެފައިވަނީ ދެކުނު ލުބުނާންގައި އެމީހުންގެ ތިން ސިފައިން މަރުވެފައިވާ ކަމަށެވެ. މިއާއެކު ބިންމަތީގެ ހަނގުރާމަ ފެށުނު ފަހުން ލުބުނާނުގައި މަރުވެފައިވާ އިޒްރޭލު ސިފައިންގެ އަދަދު ވަނީ 52ށް އަރާފައެވެ.
