ފަތުރުވެރިކަމުގެ ސިނާއަތަށް އަމާޒުކޮށް ތައާރަފް ކުރި ބޭރު ފައިސާ އާއި ބެހޭ ގަވާއިދު ބަދަލުނުކުރާނެ ކަމަށާއި، އެ ގަވާއިދާ އުސޫލާ އެއްގޮތަށް އަމަލުކުރަންޖެހޭނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އާދިއްތަ ދުވަހުގެ ރޭ ކުރިއަށްދާ ރައްޔިތުންނާއެކު ކުރިއަށް - ހަފްތާ 52 ރަސްމިއްޔާތުގައި ރައީސް މުއިއްޒު ވިދާޅުވީ ރާއްޖޭގެ ފަތުރުވެރިކަމުގެ ސިނާއަތް ކުރިއަށް ގެންދިއުމަށް 1970 ވަނަ އަހަރުން ފެށިގެން މަސައްކަތް ކުރެއްވި ޚިދުމަތްތެރި ވަރަށް ގިނަ ބޭފުޅުން އެބަތިއްބެވި ކަމަށާއި، އެބޭފުޅުންގެ މަސައްކަތްތައް ބަލައިގަންނަ ކަމަށެވެ. އަދި މިދާއިރާއިން ކުރިއަށްދާން ބޭނުންވާ މީހުން ވެސް އެބޭފުޅުންގެ ފަރާތުން މިސާލު ނަގައިގެން ކުރިއަށް ދިއުމަށް ރައީސް މުއިއްޒު އެދިވަޑައިގަތެއެވެ.
މީގެ އިތުރުން ގައުމާ ރައްޔިތުންގެ ދެކެ ލޯބިނުވާ ސިޔާސީ ވެރިން، ފަތުރުވެރިކަމުގެ ސިނާއަތުގެ އިސްބޭފުޅުންގެ ނާޖާއިޒް ފައިދާ ނަގަމުންދާ ކަމަށާއި، އެކަން އެގޮތަށް ކުރުމުގެ ފުރުސަތު ނުދިނުމަށް ރައީސް މުއިއްޒު ގޮވާލެއްވިއެވެ.
މިގޮތަށް އަޅުގަނޑުމެން ޑޮލަރު މާރުކުރަން ގަވާއިދު އެމްއެމްއޭއިން ބަދަލުކޮށް އިއުލާންކުރުމުން ހާސިލްވަނީ ކޮންކަމެއްތޯ. އަޅުގަނޑު ފުރަތަމަވެސް ދަންނަވާލަން ބޭނުންވޭ އަޅުގަނޑުމެން ގައުމުގެ މި މައި އިންޑަސްޓްރީ ޓޫރިޒަމް އިންޑަސްޓްރީ މިހިސާބަށް ގެނައުމުގައި 1970 އިން ފެށިގެން އަމިއްލައަށް ތެދުވެވަޑައިގެން މަސައްކަތް ކޮށްދެއްވި ވަރަށް ގިނަ ބޭފުޅުން ވަރަށް ޚިދުމަތްތެރި ބޭފުޅުންތަކެއް ތިއްބެވި. އެބޭފުޅުން އޭރު ތެދުވެވަޑައިގެން އެފެށި މަސައްކަތުގެ ސަބަބުން ގައުމުގައި ޓޫރިޒަމް އިންޑަސްޓްރީ ފުޅާވެ މިއަދާ ހިސާބަށް މިއައީ. މިފުރުސަތުގައި އަޅުގަނޑުގެ ހިތުގެ އެންމެ ފުން މިނުން އެކަމަށްޓަކައި ޝުކުރު ދަންނަވަން. އަދިވެސް އެބޭފުޅުންގެ ޚިދުމަތް މިގައުމަށް ބޭނުން. އެބޭފުޅުންގެ މިސާލު ނަގައިގެން ޓޫރިޒަމް އިންޑަސްޓްރީގައި އެހެން ދިވެހިން ވެސް މަސައްކަތް ކުރަން އަޅުގަނޑު އެދެން. އަޅުގަނޑު އެދެނީ ވަރަށް އިހުލާސްތެރިކަމާއެކު އަޅުގަނޑުމެންގެ ޓޫރިޒަމް އިންޑަސްޓްރީގެ ޕައިނިއަރޒް ގެ ދަންނަވާލަން ބޭނުންވަނީ ތި ބޭފުޅުންގެ ނާޖާއިޒް ފައިދާ ސިޔާސީ ގޮތުން ގައުމަށް ލޯބި ނުކުރާ ދިވެހި ރައްޔިތުންގެ ފަޅީގައި ނެތް ސިޔާސީ ވެރިންނަށް ތިބޭފުޅުންގެ ފައިދާ ނާޖާއިޒް ގޮތުގައި ނެގިޔަ ނުދެއްވާށޭ. އަޅުގަނޑުމެން މިތިބީ ރައްޔިތުންނާއެކު.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ރައީސް މުއިއްޒު ވިދާޅުވީ ފަތުރުވެރިކަމުގެ ދާއިރާއަށް އަމާޒުކޮށް ތައާރަފް ކުރި ބޭރު ފައިސާއާ ބެހޭ ގަވާއިދަށް އަމަލުކުރަން ފަށާނީ އަންނަ އަހަރުގެ ޖެނުއަރީ މަހުން ފެށިގެން ކަމަށާއި، އެއީ ގާތްގަނޑަކަށް މި ސިނާއަތަށް ވަންނަ އާމްދަނީ 20 އިންސައްތަ ކަމަށެވެ. އަދި އެ މަނިކުފާނު ވިދާޅުވީ މިގޮތަށް އަމަލުކުރަން ފެށުމުން ބްލެކް މާކެޓުގައި ޑޮލަރު މާރުކުރަން ނުޖެހި ބޭންކް ރޭޓުގައި ޑޮލަރު ލިބޭނެ ކަމަށެވެ.
ޖެނުއަރީން ފެށިގެން މިއަށް އަމަލުކުރަން ފަށާ އަޅުގަނޑުމެން ކަނޑައަޅާފައިވާ ގޮތަށް މާރުކުރަމުންދާނަމަ އިފެކްޓިވްލީ އެ މާރުކުރެވެނީ ޖުމްލަކޮށް ޓޫރިޒަމް އިންޑަސްޓްރީއަށް ވަންނަ އާމްދަނީގެ ގާތްގަނޑަކަށް 20 ޕަސެންޓް. 15 ޕަސެންޓާއި 20 ޕަސެންޓާ ދޭތެރޭގައި. 20 ޕަސެންޓްގެ ޑޮލަރު ބޭންކްތަކަށް މާރުކުރަން. އޭގެންވާ ފައިދާއަކީ އެއްކަމަކީ އަޅުގަނޑުމެން ކުރަން ވިސްނާފައި އޮތް އެއް ކަމަކީ ސަރުކާރު ހިއްސާވާ ކުންފުނިތަކުން މިހާރު މިޖެހެނީ ޑޮލަރު ހޯދަން ކީއްކުރަންތޯ. ނުގަވާއިދުން އެކަން ކުރަންޖެހިފައި މިއޮތީ. ބްލެކް މާކެޓުން އަގުބޮޑުކޮށް ޑޮލަރު ހޯދަން ޖެހުނީމަ ހަގީގަތުގައި ބްލެކް މާކެޓަށް އިތުރުވެގެން މިދަނީ. ރޭޓް މި މައްޗަށް ދަނީ. އެހެންވީމަ ސަރުކާރު ހިއްސާވާ ކުންފުނިތަކުން ޕެރަލަލް މާކެޓަށް ނުގޮސް ރަސްމީ ރޭޓުގައި ޑޮލަރު ލިބޭނެ އިންތިޒާމު އިރާދަކުރެއްވިއްޔާ ޖެނުއަރީ އެކަކުން ފެށިގެން މި ތަންފީޒުކުރާ ހިސާބުން ޓޫރިޒަމް އިންޑަސްޓްރީން ގަވާއިދާ އެއްގޮތަށް މާރުކުރާނަމަ އެންމެ ލަސްވެގެން މިއަންނަ އަހަރުގެ ޖުލައިން ފެށިގެން މިދެންނެވިހެން ސަރުކާރު ހިއްސާވާ ކުންފުނިތަކުން ދެން ޕެރަލަލް މާކެޓުގައި މާރުކުރަން ނުޖެހި ސީދާ ރަސްމީ ރޭޓުގައި ޑޮލަރު ލިބޭނެ އިންތިޒާމް ހަމަޖެހޭނެ. އޭގެ ސަބަބުން ވަރަށް ބޮޑު ކުރިއެރުމެއް ލިބޭނެ.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ވެލާނާ އިންޓާނޭޝަނަލް އެއާޕޯޓުް އިން ފުރާ ކޮންމެ ދިވެއްސަކަށް 500 ޑޮލަރު ބޭންކް ރޭޓުގައި ލިބޭކަން ފާހަގަކުރައްވައި ރައީސް މުއިއްޒު ވިދާޅުވީ މިގަވާއިދާ އެއްގޮތަށް އަމަލުކޮށް، ތަންފީޒުކުރެވިއްޖެ ކަމަށްވާނަމަ 2026ގެ ފުރަތަމަ ކުއާޓަރަށްދާއިރު، އެއާޕޯޓުން ބޭންކް ރޭޓުގައި 1000 ޑޮލަރު ކޮންމެ ދިވެއްސަކަށް ގަންނަން ލިބޭނެ ކަމަށެވެ. ރައީސް މުއިއްޒު ވިދާޅުވީ 2026 ވަނަ އަހަރުގެ ފަހުކޮޅު ކްރެޓިޑް ކާޑުގެ ލިމިޓްވެސް 1400 ޑޮލަރަށް ބަދަލުކުރެވޭނެ ކަމަށެވެ. އަދި މިއީ އާއްމު ރައްޔިތުންނަށް ލިބޭ ވަރަށް ބޮޑު ފަސޭހައެއް ކަމަށް ރައީސް މުއިއްޒު ވިދާޅުވިއެވެ.
އަޅުގަނޑުމެން ބޭނުންވަނީ މި ޑޮލަރު މާރުކުރުމުގެ ކަންތައް ޓޫރިޒަމް އިންޑަސްޓްރީގެ އެހީތެރިކަމާ އެއްބާރުލުމާއެކު ކުރިއަށްދާ ކަމަށްވަންޏާ ޖެނުއަރީން ފެށިގެން ގާތްގަނޑަކަށް އަހަރެއްދާ ދުވަސް. ނޫނީ 14 ވަރަކަށް މަސް 2026ގެ ފުރަތަމަ ކުއާޓަރަށްދާއިރު، އަޅުގަނޑުމެން ޕްލޭން ކޮށްގެން ޓެކްނިކަލީ ޕްލޭން ކޮށްގެން ކުރާތައް މިއީ. އެހިސާބަށް ދާއިރު، އަޅުގަނޑުމެންނަށް އެބަ ފުރުސަތުތައް ލިބޭ މި 500 ޑޮލަރުގެ ބަދަލުގައި 1000 ޑޮލަރު ބޭރަށް ފުރާއިރު ގަތުމުގެ ފުރުސަތު ދޭން. ދެން މިކަމަށް ހުރަސްއަޅަނީ ކީއްކުރަންތޯ. 1000 ޑޮލަރު ބޭންކް ރޭޓުގައި ގަންނަން ލިބެންޏާ އަޅުގަނޑު ހިތުން އާއްމުކޮށް ބޭރަށްދާ ދިވެހިން ކުރައްވަން މިވަޑައިގަންނަވާ ކަންކަމުގައި ވަރަށް ބޮޑު ލުޔެއް އެބަ ލިބޭ 500 ޑޮލަރުގެ ބަދަލުގައި ޑަބަލްކޮށްލެވުނީ. ކްރެޑިޓް ކާޑު ލިމިޓް މިހާރު 700 ޑޮލަރު. އަޅުގަނޑުމެން ގަސްތުކޮށްފައި މިއޮތީ ހަމަޖެނުއަރީން ފެށިގެން 2026 ވަނަ އަހަރުގެ ފުރަތަަމަ ކުއާޓަރު ނިމޭ ހިސާބަށްދާއިރު ސަސްޓެއިން ގޮތަކަށް ޑޮލަރު މާރުކުރާ ކަމަށްވަންޏާ 1400 ޑޮލަރާ ހަމައަށް ކްރެޑިޓް ކާޑުގެ ލިމިޓް ބޮޑުކޮށްދޭނަން.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ރާއްޖޭގެ ވިޔަފާރިވެރިންނަށް އިޝާރާތް ކުރައްވައި ރައީސް މުއިއްޒު ވިދާޅުވީ މި ގަވާއިދުގެ ދަށުން ވިޔަފާރިވެރިންނަށް ވެސް ބޮޑު ލުޔެއް ލިބި ކުރިއެރުން ލިބޭނެ ކަމަށެވެ.
މީގެ އިތުރުން ރައީސް މުއިއްޒު ވިދާޅުވީ މިގަވާއިދާ އެކު ކުރިއެރުން ލިބެނީ ރައްޔިތުންނަށް ކަމަށާއި، ގަވާއިދު ބަދަލުނުކުރާނެ ކަމަށެވެ. އަދި ވިދާޅުވީ މިގަވާއިދަށް އަމަލުކުރަންޖެހޭނެ ކަމަށާއި، ގަވާއިދަށް ތަބާވުމަކީ އެންމެންގެ މައްޗަށް ލާޒިމް ކަމެއް ކަމަށެވެ. މިކަން ތަންފީޒު ކުރުމަށްޓަކައި، އެމްއެމްއޭއަށް އެހީތެރިކަން ފޯރުކޮށްދިނުމުގެ ގޮތުން އެކަމަށް ޚާއްސަ ފޮރެކްސް ގާނޫނެއް ރައްޔިތުންގެ މަޖިލީހުގެ ތެރެއިން ފާސްކުރާނެ ކަމަށް އެމަނިކުފާނު ވިދާޅުވިއެވެ.
ދިވެހި ވިޔާފަރިވެރިންނަށް ތަކެތި އިންފޯޓު ކުރުމުގައި ބޭންކްތަކުން ޓީޓީ ހެދުމަށް ދޫކުރާ ޑޮލަރުގެ ނިސްބަތްވެސް އިތުރުކުރުން. އެކަންތައް އިރާދަކުރެއްވިއްޔާ ޖެނުއަރީން ފެށިގެން ޑޮލަރު މާރުކުރުމުގެ ކަންތައް ގަވާއިދާ އެއްގޮތަށް ޓޫރިޒަމް އިންޑަސްޓްރީން ކުރާ ކަމަށްވަންޏާ ޖުލައިން ފެށިގެން ހަމަސްތެރޭގައި އަޅުގަނޑުމެން އެކަން ކޮށްދޭނަން. ވިޔަފާރިތަކަށް ވަރަށް ބޮޑު ކުރިއެރުމެއް ލިބޭނެ. އެހެންވީމަ އަޅުގަނޑުމެން ދަންނަވަނީ އަޅުގަނޑުމެން ތިބޭނީ ރައްޔިތުންގެ ފަޅީގައޭ. މިކަމުގައި އަޅުގަނޑު ނެތިން މިގަވާއިދު ބަދަލުކުރާކަށް. ނުކުރާން ބަދަލެއް. ވަރަށް ސާފުކޮށް މިދެންނެވީ ގަވާއިދެއް ބަދަލެއް ނުކުރާނަމޭ. ވަރަށް ސާފުކޮށް މިދެންނެވީ ގަވާއިދެއް ބަދަލުނުކުރާނަމޭ. 500 ޑޮލަރު މާރުކުރައްވަން ޖެހިވަޑައިގަންނަވާނޭ. ގަވާއިދާ ތަބާވުމަކީ އެންމެންގެ މައްޗަށް ލާޒިމް ކަމެކޭ. މިކަން ކުރައްވަން ޖެހި ވަޑައިގަންނަވާނެ. މިއީ ގާނޫނު އަސާސީއާ އެއްގޮތަށް ކުރާކަމެއް. ގާނޫނުތަކާ އެއްގޮތަށް ކުރާކަމެއް. އަދި މިކަން އިތުރަށް ތަންފީޒު ކުރުމަށް އެހީތެރިކަން ދިނުމަށް އެމްއެމްއޭއަށް ފަސޭހަކޮށް ދިނުމަށް އެކަމަށް ޚާއްސަ ފޮރެކްސް ގާނޫނެއް އިރާދަކުރެއްވިއްޔާ މަޖިލިސް ތެރެއިން އަޅުގަނޑުމެން ފާސްކޮށްދޭނަން.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
މި ރަސްމިއްޔާތުގައި ރައީސް މުއިއްޒު ވަނީ ތަކުރާރުކޮށް، މިސަރުކާރު އޮތީ ރައްޔިތުންގެ ފަޅީގައި ކަމަށާއި، ރައްޔިތުންނާއެކު ކުރިއަށްދާނެ ކަމަށް ވިދާޅުވެފައެވެ. މިއީ 100 ޕަސެންޓް ދިވެހި ރައްޔިތުންނާއެކު އޮތް ސަރުކާރެއް ކަމަށާއި، އެކަމުގައި ސުވާލެއް ވެސް ނޯންނާނެ ކަމަށް އެމަނިކުފާނު ވިދާޅުވިއެވެ.
އެމްއެމްއޭ އިން ފަތުރުވެރިކަމުގެ ދާއިރާ އަށް އަމާޒުކޮށް ތައާރުފް ކުރި ގަވައިދުގައިވާ ގޮތުން، މުދާ ވިއްކާ އަދި ޚިދުމަތް ފޯރުކޮށްދޭ ފަރާތްތަކުން، ކަލަންޑަރު މަހެއްގައި ވިއްކާފައިވާ މުދަލަށް ނުވަތަ ފޯރުކޮށްދީފައިވާ ޚިދުމަތަށް ލިބޭ ޖުމްލަ ބޭރު ފައިސާ އެ މަހެއްގެ ފަހުން އަންނަ ތިންވަނަ މަހުގެ 28 ވަނަ ދުވަހުގެ ކުރިން ބޭންކެއްގައި ހުޅުވާފައިވާ ބޭރު ފައިސާގެ އެކައުންޓަކަށް ޓްރާންސްފަރ ކުރަން ނުވަތަ ޖަމާކުރަން ވަނީ ލާޒިމު ކޮށްފައެވެ.
އޭގެ އިތުރުން، ރިސޯޓު ހިންގާ ފަރާތުން، ކޮންމެ ކަލަންޑަރު މަހަކަށް، އެ ތަނަކަށް އަންނަ ފަތުރުވެރިންގެ އަދަދާ އެއްވަރުގެ ޖުމްލަ އަދަދެއް، ކޮންމެ ފަތުރުވެރިއަކަށް 500 (ފަސްސަތޭކަ) އެމެރިކާ ޑޮލަރުގެ ރޭޓުން ރުފިޔާއަށް ބަދަލުކޮށް، އެ މަހެއްގެ ފަހުން އަންނަ ތިންވަނަ މަހުގެ 28 ވަނަ ދުވަހުގެ ކުރިން ޖަމާކުރަން ޖެހެއެވެ. ނަމަވެސް ފަތުރުވެރިކަމުގެ ސިނާއަތުގައި އިސްކޮށް އުޅުއްވާ ބޭފުޅުން ވަނީ މިގަވާއިދަށް އަމަލު ކުރުމަށް އިއުތިރާޒްކުރައްވާ، އެކަން ރަސްމީކޮށް ސަރުކާރަށް އަންގަވާފައެވެ.
