ރައީސުލްޖުމްހޫރިއްޔާ ޑރ.މުހައްމަދު މުއިއްޒަކީ އެއްކަމަކަށް އެއްތައް ހޭދައެއް ކުރައްވާ ބޭފުޅެއް ކަމަށާއި، އެއީ ކޮރަޕްޝަން ކަމަށް ދަ ޑިމޮކްރެޓްސްގެ ލާމަރުކަޒީ ކޮމިޓީގެ ޗެއަރ މުހައްމަދު ވަހީދު (ވައްޑެ) ވިދާޅުވެއްޖެއެވެ.
ރައީސް މުއިއްޒުގެ ސަރުކާރަށް އެއްއަހަރު ފުރުމާއި ގުޅިގެން ރާއްޖެޓީވީން ގެނެސްދޭ ގިލަންވެރިކަމުގެ އެއްއަހަރު ޕްރޮގްރާމްގައި ވަހީދު ވިދާޅުވީ ކުރީގެ ރައީސް އަބްދުﷲ ޔާމީންގެ ވެރިކަމުގައި މިއަދުގެ ރައީސް ޑރ.މުއިއްޒު ހައުސިން މިނިސްޓަރަކަށް ހުންވައިގެން ކުރިއަށް ގެންދިޔަ ތަރައްގީގެ ގިނަ މަޝްރޫއުތައް އެތައް ފަހަރަކު ކުރިއަށް ގެންދަންޖެހުނު ކަމަށެވެ. އަދި ބައެއް މަޝްރޫއުތައް ކުރިއަށް ގެންދިޔަ ގޮތުން އާއްމު ރައްޔިތުންނަށް އަނިޔާވެ، އެތަންތަން އަލުން ބަލުން ބަދަލުކުރަން ޖެހުނު ކަމަށް ވަހީދު ވިދާޅުވިއެވެ.
މިސަރުކާރުގެ ކޮރަޕްޝަނަށް އިޝާރާތް ކުރައްވައި ވަހީދު ވިދާޅުވީ ކޮރަޕްޝަންއަކީ ހަމައެކަނި ތިޖޫރީން ފައިސާ ވަގަށް ނެގުން ނޫން ކަމަށާއި، އެއްކަމަކަށް އެތައް ފަހަރަކު ހަރަދު ކުރަންޖެހި، ރައްޔިތުންގެ ފައިސާއަށް އިހުމާލުވެ، ރައްޔިތުންގެ ފައިސާ އެންމެ ރަނގަޅު ފައިދާ ގޮތުގައި ނޫން ގޮތްގޮތަށް ހޭދަކުރުމަކީ ކޮރަޕްޝަން ކަމަށެވެ. އަދި މިސަރުކާރުން ފެނިގެންދަނީ އެމަންޒަރު ކަމަށް އޭނާ ވިދާޅުވިއެވެ.
އެނގިވަޑައިގަންނަވާނެ ރަސްފަންނުގައި ރައީސް ޔާމީން ވިދާޅުވި ކަމަށްވޭ މުއިއްޒާއި ހަވާލުކުރީ ޓްރެކެއް އަޅާށޭ. އަޅުގަނޑު ހަނދާންވާ ގޮތުން ވެއްޖެއްޔާ ހައެއްކަ އަށެއްކަ ފަހަރު ކޮންމެ ފަހަރަކު އަޅާ ނިމުނީމަ ހާލު ފޮޅިއެއްހެން އޮޅިފައި. އެއްނަންބަރު ފާލަން އެނގޭތޯ މިހާރު މުޅި ތަން ބައްދާގެން މިހާދާ ފާލަމަކީ ހަމައެބޭފުޅާގެ ނެވި ވެރިކަމުގައި ހެއްދެވި ފާލަމެއް. ފާލަމުގައި ސަތަރި ޖަހާ ނުނިމޭ ވައި އަރާލިއިރުގައި އޮތީ އެއްކަލަ މީހެއްގެ މުންޑު އޮޅޭހެން އޮތީ އޮޅިފައި. ސަލްޓަން ޕާކު ތެރޭގައި ފުރަތަމަ ކޮޅިގަނޑާއެކު ވެސް ވިއްސާރައަށް ހިޔާނުވޭ އެހަދާފައި ހަޓުތަކާއި މިތަންތަނުން. ދެން ތި ވިދާޅުވިހެން އިސްލާމީ މަރުކަޒު ކައިރީގައި ދުނިޔޭގައި އަލަށް އާއްމުން ހިނގާބިގާވެ އުޅޭ ހާމައަށް އޮތް މަގެއްގައި މުށި ޖެހި އެނގޭ. ދުވަސްވީ ވަރަށް ގިނަ މީހުން އެތަނަށް ކައްސާލައިގެން ވެއްޓި ބޮޑެތި އަނިޔާތައް ވެ، ވަރަށް މަޝްހޫރު ބޭފުޅުންނަށް ވެސް އެބަހުރި އަނިޔާތައް ލިބިފައި. ދެންމާލޭގައި ހޮޅި އެޅުމާއި، މާލޭގައި މިނިވަން 50 ހޮޅިދަނޑިތައް ޖަހަައިގެން ބައެއް ކުދިން ދުނިޔެއަޅާ ގޮސް ވެއްޓި އަނިޔާ ލިބިމުގައި. ހަމަ އެއްކަމެއް ތަކުރާރުވަމުން ދާ ދިއުމަކީ. ކޮރަޕްޝަނަކީ ހަމައެކަނި ތިޖޫރީ ހުޅުވާފައި މަގަށް އޭގެން ލާރި ބޮޑިއެއް ނަގާފައި ވަގަށް ނެގުމެއް ނޫން. ރައްޔިތުންގެ ފައިސާއަށް އިހުމާލުވުމަކީ ކޮރަޕްޝަން.ދަ ޑިމޮކްރެޓްސްގެ ލާމަރުކަޒީ ކޮމިޓީގެ ޗެއަރ މުހައްމަދު ވަހީދު (ވައްޑެ)
ވަހީދު ވިދާޅުވީ ކޮރަޕްޝަންއަކީ ވަރަށް ފުޅާއެއްޗެއް ކަމަށާއި، ވައްކަމަކީ ވަރަށް ފުޅާ އެއްޗެއް ކަމަށެވެ. އަދި ސަރުކާރުގެ އިހުމާލުން ރައްޔިތުންގެ ފައިސާއާއި، ރައްޔިތުންގެ މާލިއްޔަތަށް ލިބޭ ކޮންމެ ގެއްލުމަކީ ކޮރަޕްޝަން ކަމަށެވެ.
