ފަލަސްތީނުގެ މިނިވަން ދައުލަތެއް ގާއިމް ކުރުމަކީ "ހަގީގަތަކަށް ހެދޭނެ" ޓާގެޓެއް ނޫން ކަމަށް އިޒްރޭލުގެ ފޮރިން މިނިސްޓަރ ގިޑޯން ސާރް ހޯމަ ދުވަހު ވިދާޅުވެއްޖެއެވެ.
ޣައްޒާގައި އިޒްރޭލުން ހިންގާ ނަސްލު ނައްތާލުމުގެ ހަނގުރާމަ އަށް އަހަރަކަށް ވުރެ ގިނަ ދުވަސް ވެފައި ވާއިރު، ފަލަސްތީނު މިނިވަން ދައުލަތެއްގެ ގޮތުގައި ގާއިމް ކުރުމުގެ އަޑުތައް ދުނިޔޭގައި ވަނީ ގަދަވެފައެވެ.
އަލަށް އިޒްރޭލުގެ ފޮރިން މިނިސްޓަރު ކަމަށް އައްޔަން ކުރެވުނު ސާރް ފަލަސްތީނުގެ މިނިވަން ދައުލަތާ ބެހޭ ގޮތުން ވިދާޅުވީ، "މިއަދު މިއީ ޙަޤީޤަތާ އެއްގޮތް ޚިޔާލެއް ކަމަކަށް އަހުރެން ނުދެކެން، އަދި އަހުރެމެން ޖެހޭނީ ޙަޤީޤަތާ އެއްގޮތަށް ވިސްނަން." ކަމަށެވެ.
މިއީ ފަލަސްތީނު މިނިވަން ދައުލަތެއް ގޮތުގައި ކަނޑައަޅާ އޭގެ ބަދަލުގައި އިޒްރޭލާއި އަރަބި ޤައުމުތަކާ ދެމެދުގެ ގުޅުން އާންމު ޙާލަތަކަށް ގެނައުމާ ގުޅޭގޮތުން ކުރެވުނު ސުވާލަކަށް ޖަވާބު ދެއްވަމުން އޭނާ ދެއްކެވި ވާހަކައެއް ކަމަށް އަލް އަރަބިއްޔާ އިން ބުނެފައިވެއެވެ.
ސާރް އިތުރަށް ވިދާޅުވީ ފަލަސްތީނު ދައުލަތް ވެގެން ދާނީ "ހަމާސްގެ ދައުލަތަކަށް" ކަމަށެވެ. ހަމާސް އަކީ ފަލަސްތީނު ރައްޔިތުންގެ ހައްގުގައި އިޒްރޭލާ ދެކޮޅަށް ޖިހާދު ކުރަމުންދާ ޖަމާއަތެވެ.
ފަލަސްތީނުގެ މިނިވަން ދައުލަތް އިއުލާނު ކުރުމާއި، އަރަބި ގައުމުތަކާއި އިޒްރޭލާ އޮންނަ ގުޅުން "ނޯމަލައިޒް" ކުރުމުގެ މަސައްކަތަކީ ޑޮނަލްޑް ޓްރަމްޕްގެ ފުރަތަމަ ވެރިކަމުގައި އޭނާގެ ބެއްލެވުމުގެ ދަށުން 2020 ވަނަ އަހަރު އެކުލަވާލެވުނު "އަބްރަހަމް އެކޯޑްސް" ގެ ބައެކެވެ. އަދި މިދިޔަ ހަފްތާގައި ބޭއްވުނު އެމެރިކާގެ ރިޔާސީ އިންތިޚާބު ޓްރަމްޕް ކާމިޔާބު ކުރެއްވުމާއެކު މި މަސައްކަތް އަލުން ފެށިދާނެ ކަމަށް ބައެއް ރިޕޯޓުތައް ބުނެފައިވެއެވެ.
އިޒްރޭލުގެ އައު ޚާރިޖީ ވަޒީރު، ފަލަސްތީނުގެ މިނިވަންކަމާ ބެހޭ ގޮތުން އުއްމީދު ގެއްލޭފަދަ މޭރުމަކުން ޖެރޫސަލަމްގައި ވާހަކަދެއްކެވި އިރު، އަރަބި އަދި މުސްލިމު ލީޑަރުން ސަޢޫދީ އަރަބިއްޔާ އަށް ޖަމާވެ، ޣައްޒާ އާއި ލުބުނާނުގައި އިޒްރޭލުން ހިންގަމުންދާ އަނިޔާވެރި ހަނގުރާމަތައް ކުށްވެރި ކުރައްވާ، މަޝްވަރާ ބައްދަލުވުމެއް ވަނީ ބާއްވަވާފައެވެ.
ފަލަސްތީނު ދައުލަތެއް ގާއިމުކުރުމަށް ބާރުއެޅުމަށް އައު "ބައިނަލްއަޤްވާމީ އިއްތިހާދު" އެއް އުފައްދާ އެ އިއްތިހާދުގެ ބައްދަލުވުމެއް ސައުދީ އަރަބިއްޔާގެ ރިޔާޛު ގައި އޮކްޓޯބަރު މަހުގެ ފަހުކޮޅު ވަނީ ބާއްވާފައެވެ.
އިޒްރޭލުން ފަލަސްތީނުގެ މިނިވަންކަމަށް ހުރަސް އަޅަމުން ދިޔަ ނަމަވެސް ފަލަސްތީނު ދައުލަތެއްގެ ގޮތުގައި ބަލައިގަންނަ ގައުމުތައް ދަނީ އިތުރުވަމުންނެވެ.
