ސައުދީ ސަރުކާރުގެ މީޑިއާއިން ބުނާ ގޮތުގައި، ހޯމަ ދުވަހު ބޭއްވުމަށް ހަމަޖެހިފައިވާ، ޣައްޒާ އަދި ލުބްނާނު ގައި އިޒްރޭލުން ކުރަމުންދާ ހަނގުރާމަ އަށް އަމާޒުކޮށްފައިވާ ސަމިޓަކަށް އަރަބި އަދި މުސްލިމް ލީޑަރުން ސައުދީ އަރަބިއްޔާ އަށް ވަޑައިގަންނަވަން ފައްޓަވައިފިއެވެ.

ސައުދީގެ ޚާރިޖީ ވަޒީރު މި ސަމިޓް އޮންނާނެ ކަން ފުރަތަމަ އިޢުލާން ކުރެއްވީ އޮކްޓޯބަރު މަހުގެ ފަހުކޮޅު، އިޒްރޭލު-ފަލަސްޠީނު މައްސަލައިގައި ދާއިމީ ހައްލެއް ހޯދުމަށް އިޒްރޭލާ އިންވެގެން ފަލަސްތީނުގެ ދައުލަތައް ގާއިމު ކުރުމަށް މަސައްކަތްކުރާ "ބައިނަލްއަޤްވާމީ އިއްތިހާދު"ގެ ފުރަތަމަ ބައްދަލުވުމުގައެވެ.

އާދީއްތަ ދުވަހު ސައުދީގެ ރަސްމީ ނޫސް އޭޖެންސީ (އެސްޕީއޭ) އިން ބުނެފައިވާ ގޮތުގައި، މި ސަމިޓްގައި "ފަލަސްތީނުގެ ސަރަޙައްދުތަކަށާއި ލުބްނާނަށް އިޒްރޭލުން ދެމުންދާ ހަމަލާތަކާއި، މި ސަރަޙައްދުގައި މިހާރު ހިނގަމުންދާ ހަމަނުޖެހުންތަކާ މެދު މަޝްވަރާކުރެވޭނެއެވެ."

މި ސަމިޓު ބޭއްވޭ އިރު މީގެ އެއް އަހަރު ކުރިން ރިޔާޛް ގައި ބޭއްވުނު، އަރަބް ލީގު އަދި އިސްލާމިކް ކޯޕަރޭޝަން އޮގަނައިޒޭޝަން (އޯއައިސީ) ގެ ބައްދަލުވުމެއްގައި، ޣައްޒާގައި އިޒްރޭލުގެ ބާރުތަކުން ހިންގަމުންދާ ޢަމަލުތަކަކީ "އަނިޔާވެރި" އަމަލެއް ކަމަށް ކަމަށް އަރަބި އަދި އިސްލާމީ ގައުމުތަކުގެ ވެރިން ވިދާޅުވެ، އިޒްރޭލުގެ އަމަލުތައް ކުށްވެރިކުރައްވާފައިވެއެވެ.

އާދީއްތަ ދުވަހު ސައުދީގެ ސަރުކާރާ ގުޅުންހުރި އަލް-އިޚްބާރިއްޔާ ނިއުސް ޗެނަލުން ނައިޖީރިއާގެ ރައީސް ބޯލާ ޓިނުބު އަދި ލުބްނާނުގެ ވަގުތީ ބޮޑުވަޒީރު ނަޖީބު މިކާތީ ރިޔާޛަށް ވަޑައިގަތް މަންޒަރު ދައްކާފައިވެއެވެ.

ޕާކިސްތާނުގެ ޚާރިޖިއްޔާ އިން ފާއިތުވި ހަފްތާގައި ބުނެފައިވާ ގޮތުގައި، ޕާކިސްތާނުގެ ބޮޑުވަޒީރު ޝަހްބާޒް ޝަރީފް ވެސް މި ސަމިޓްގައި ބައިވެރިވެ ވަޑައިގަންނަވާނެއެވެ. އަދި "ޣައްޒާގައި އިޒްރޭލުން ހިންގަމުންދާ ނަސްލު ނައްތާލުމުގެ ހަނގުރާމަ ވަގުތުން ހުއްޓާލުމަށާއި، މި ސަރަޙައްދުގައި އިޒްރޭލުން ކުރަމުންދާ ނުރައްކާތެރި ކަންތައްތައް ވަގުތުން ހުއްޓާލުމަށް" ގޮވާލައްވާނެ ކަމަށް ވެސް ބުނެފައިވެއެވެ.

އާދީއްތަ ދުވަހުގެ މެންދުރުފަހު، ސައުދީގެ ޚާރިޖީ ވަޒީރު ޕްރިންސް ފައިސަލް ބިން ފަރްހާން، ވަނީ ހޯމަ ދުވަހުގެ ސަމިޓަށް ތައްޔާރުވުމުގެ ގޮތުން ބޭއްވުނު ޚާރިޖީ ވަޒީރުންގެ ޖަލްސާގެ ރިޔާސަތު ބަލަހައްޓަވާފައެވެ.

އޮކްޓޯބަރ 7، 2023 އިން ފެށިގެން ޣައްޒާގައި އިޒްރޭލުން ހިންގަމުންދާ ނަސްލު ނައްތާލުމުގެ ހަނގުރާމައިގައި މަދުވެގެން 43،603 ފަލަސްޠީނުން މަރުވެ، 102،929 މީހުން ޒަޚަމްވެފައިވެއެވެ. ޣައްޒާ އިން މަރުވި މީހުންގެ ތެރޭގައި ގިނައީ އަންހެނުންނާ ކުޑަކުދިން ކަމަށް އދ އިން ވަނީ ބުނެފައެވެ.

ޣައްޒާ ގައި ހަނގުރާމަ ފެށި ފަހުން ލުބްނާން އަށް އިޒްރޭލުން ދިން ހަމަލާތަކުގައި މަދުވެގެން 3،189 މީހުން މަރުވެ، 14،078 މީހުން ޒަޚަމްވެފައިވެއެވެ.