އީރާނުން އިޒްރޭލަށް ހަމަލާދިނުމަށް އިރާޤުގެ ވައިގެ ސަރަހައްދު ބޭނުންކުރުމާ އެޤައުމުން ވަރަށް ބޮޑަށް ދެކޮޅު ކަމަށް އިރާގުގެ ނޭޝަނަލް ސެކިއުރިޓީ އެޑްވައިޒަރ ގާސިމް އަލް-އަރާޖީ ވިދާޅުވެއްޖެއެވެ.

އަރާޖީ މިހެން ވިދާޅުވީ ހޮނިހިރު ދުވަހު އީރާނުގެ އަސްކަރިއްޔާގެ ފަރާތުން ބަޣްދާދަށް ކަނޑައަޅާފައިހުންނަ މޭޖަރ ޖެނެރަލް މަޖީދު ޤަލީޕޫރާ ކުރެއްވި ބައްދަލުވުމެއްގައެވެ.

އިރާގުގެ ނޭޝަނަލް ސެކިއުރިޓީ އެޑްވައިޒަރުގެ މީޑިއާ އޮފީހުން ނެރުނު ބަޔާނެއްގައި ބުނެފައިވާ ގޮތުގައި އަރާޖީއާއި ޤަލީޕޫރު މަޝްވަރާކޮށްފައިވަނީ "ދެ ޤައުމުގެ ސަލާމަތާއި ރައްކާތެރިކަން އިތުރުކުރުމުގެ ގޮތްތަކާއި، ސަރަޙައްދުތައް ކޮންޓްރޯލްކުރުމަށް ވެވިފައިވާ އެއްބަސްވުންތައް ތަންފީޛުކުރުމާ ބެހޭ ގޮތުން،"ނެވެ.

ބަޔާނުގައި އިތުރަށް ބުނެފައިވަނީ، "ދެ ފަރާތުން ޓެރަރިޒަމާއި ވަގު ވިޔަފާރިއާ ދެކޮޅަށް ކުރެވޭ މަސައްކަތުގައި ދެމެހެއްޓެނިވި ގޮތެއްގައި އެއްބާރުލުން ދިނުމާ ބެހޭ ގޮތުންވެސް ޚިޔާލު ބަދަލުކުރެވުނު،" ކަމަށެވެ.

އަރާޖީ މިހެން ވިދާޅުވެފައިވާއިރު، ފާއިތުވި މަހުގެ ފަހުކޮޅު އީރާނުން ބުނެފައިވަނީ އިޒްރޭލުން އެންމެ ފަހުން އެ ޤައުމަށް ދިން ހަމަލާގައި އެމެރިކާގެ ބާރުގެ ދަށުގައިވާ އިރާޤުގެ ވައިގެ ސަރަހައްދުގެ އިތުރުން އެހެނިހެން ސަރަޙައްދީ ޤައުމުތަކުގެ ވައިގެ ސަރަހައްދުވެސް ބޭނުންކޮށްފައިވާ ކަމަށެވެ.

"މި ސަރަޙައްދުގައި އެމެރިކާގެ ސިފައިން ތިބުމަކީ ޙަޤީޤަތެއް، އަދި ޒަޔޮނިސްޓް ހަނގުރާމަވެރިން އީރާނަށް ދާދި ފަހުން ދިން ހަމަލާގައި ބޭނުންކޮށްފައިވަނީ އެމެރިކާއިން މި ސަރަޙައްދުގައި ހުޅުވާލާފައިވާ ވައިގެ ސަރަހައްދު،" އިޒްރޭލުން އީރާނަށް ދިން ހަމަލާއާ ގުޅިގެން ޚާރިޖީ ވަޒީރު އައްބާސް އަރާޤްޗީ ވިދާޅުވެފައިވެއެވެ.

އޮކްޓޯބަރު 26 ގައި، އިޒްރޭލުން ވަނީ އެމެރިކާގެ ބާރުގެ ދަށުގައިވާ އިރާޤުގެ ވައިގެ ސަރަހައްދު ބޭނުންކޮށްގެން ތެހެރާން، ޚުޒެސްތާން، އަދި އީލާމް ޕްރޮވިންސްތަކުގައި ހުރި އީރާނުގެ އަސްކަރީ މަރުކަޒުތަކަށް ހަމަލާދީފައެވެ.