އައްޑޫ ސިޓީގައި ޒުވާނަކު ދަންޖައްސާ މަރާލި ކަމަށް ދެކެވޭ ވާހަކަތައް ފުލުހުން ދޮގުކޮށްފިއެވެ.
ހޮނިހިރު ދުވަހުގެ ހެނދުނުގެ ވަގުތެއްގައި އައްޑޫ ސިޓީ ގަޑުކެނޑި ކޯޒްވޭ ބްރިޖް ދަށުގައި 19 އަހަރުގެ ޒުވާން ފިރިހެނެއް ދަންޖެހިފައި ހުއްޓާ ވަނީ ފެނިފައެވެ. މި ޒުވާނާގެ މަރާއި ގުޅިގެން ގިނަ ބަޔަކު ދަނީ ސޯޝަލް މީޑިއާގައި ސުވާލު އުފައްދަމުންނެވެ. އެޒުވާނާގެ ހަށިގަނޑަށް އެކިވަރުގެ އަނިޔާ ލިބިފައިވާ ކަމަށާއި، ދަންޖެހިފައިވާ ވާގަނޑުން ފައި ބިންމަތީގައި ޖެހިފައިވާއިރު، ދަންޖެހުނު ގޮތާއި މެދު ވެސް ބައެއް މީހުން ސުވާލު އުފައްދާފައިވެއެވެ. އަދި އެ ޒުވާނާ ދަންޖައްސާ މަރާލީ ކަމަށާއި، އެކަން ކޮށްފައިވަނީ އައްޑޫގައި ހަރަކާތްތެރިވާ ގޭންގަކުން ކަމަށް ތުހުމަތުކޮށްފައިވެއެވެ.
މިމައްސަލައާ ގުޅިގެން ފުލުހުން ބުނީ މިމަރާއި ގުޅިގެން ދައުރުވަމުންދާ ވާހަކަތަކަކީ އެއްވެސް ހަގީގަތެއް އެކުލެވޭ ވާހަކަތަކެއް ނޫން ކަމަށާއި، ބަލަންޖެހޭ ކަންކަން އިތުރަށް ބަލަމުންދާ ކަމަށެވެ.
މީގެ އިތުރުން އެޒުވާނާއަކީ 2020 ވަނަ އަހަރު މަރަދޫ-ފޭދޫގައި ހިނގި މާރާމާރީގެ ދައުވާގެ ހެކިވެރިއެއް ކަމަށް ދެކެވޭ ވާހަކަތަކާއި ގުޅިގެން ފުލުހުން ބުނީ މަރުވި މީހާއަކީ އެއްވެސް މައްސަލައެއްގެ ހެކިވެރިއެއް ނޫން ކަމަށާއި، ތުހުމަތު ކުރެވޭ މައްސަލައެއް އޮތް މީހެއް ނޫން ކަމަށެވެ. ނަމަވެސް އެޒުވާނާގެ ހަށިގަނޑަށް އެކިވަރުގެ އަނިޔާ ލިބިފައިވާ ކަމަށް ކުރެވޭ ތުހުމަތުތަކަށް ފުލުހުން ޖަވާބުދީފައިނުވެއެވެ.
މަރުވެފައިވާ މީހަކާއި ގުޅޭގޮތުން އެއްވެސް ހަގީގަތެއް ނެތް ދޮގު މައުލޫމާތު ފެތުރުން ހަރުކަށި އިބާރާތުން ކުށްވެރިކުރާ ކަމަށް ވެސް ފުލުހުން ބުނެފައިވެއެވެ.
މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
