ލުބުނާނުގެ ހިޒްބުﷲ އާއި އެ ގައުމަށް އެރި އިޒްރޭލު ސިފައިންނާ ދެމެދު ހަނގުރާމަ ހިނގަމުންދާ ކަމަށް އިޒްރޭލުންނާއި ހިޒްބުﷲ އިން ވެސް ބުނެފިއެވެ.

ހިޒްބުﷲ ގެ ތަރުޖަމާނެއް ބުނެފައިވަނީ ބުދަ ދުވަހު ލުބުނާނުގެ ދެކުނުގައި އިޒްރޭލުގެ ދިފާޢީ ބާރުތަކާއެކު ހިނގި ހަމަލާ ބަދަލުކުރުން ތަކަކީ "ހަނގުރާމައިގެ ފުރަތަމަ ބުރުގެ" ބައެއް ކަމަށެވެ.

ރޮއިޓަރސް އަދި އެންބީސީ އިން ހާމަކޮށްފައިވާ ގޮތުގައި ހިޒްބުﷲގެ މުޙައްމަދު ޢަފީފް ނޫސްވެރިންނަށް މައުލޫމާތު ދެމުން "ހިޒްބުﷲ ގެ ބާރުތަކާއި ދިފާއީ ހަނގުރާމަވެރިން ވަނީ ދުޝްމަނުންނާ ކުރިމަތިލުމަށާއި ހުރަސްއެޅުމަށް ފުރިހަމައަށް ތައްޔާރަށް،" ކަމަށެވެ.

އިޒްރޭލުގެ ބާރުތަކާ ކުރިމަތިލުމަށް އެކަށީގެންވާ ވަރަށް ހަތިޔާރު ލިބިފައިވާ ކަމަށްވެސް ޢަފީފް ބުނެފައިވެއެވެ.

ބުދަ ދުވަހު ލުބުނާނުގެ ބިމުގައި ހިނގި ހަމަލާ ބަދަލު ކުރުމުގެ ވާހަކަ ހިޒްބުﷲ އާއި އިޒްރޭލުގެ ދިފާޢީ ބާރުތަކުން ވަނީ ހާމަކޮށްފައެވެ.

އެއްގަމު އޮޕަރޭޝަން ފެށުނު ފަހުން ލުބުނާނުގެ ތެރޭގައި އިޒްރޭލުގެ ސިފައިންގެ މީހަކު މަރުވިކަން އިޒްރޭލު ޑިފެންސް ފޯސް (އައިޑީއެފް) އިން ވަނީ ކަށަވަރުކޮށްދީފައެވެ.

އައިޑީއެފް ނެރުނު ބަޔާނެއްގައި ބުނެފައިވަނީ 22 އަހަރުގެ ކެޕްޓަން އައިތަން އިޒްހާކް އޮސްޓަރ ބުދަ ދުވަހު ލެބަނަން ތެރޭގައި މަރުވެފައިވާ ކަމަށެވެ.

އުމުރުން 22 އަހަރުގެ މި ސިފައިންގެ މީހާއަކީ ގެރިއްލާ ހަނގުރާމައަށް ޚާއްޞަކޮށްފައިވާ އީގޮޒް ޔުނިޓުގެ ޓީމު ކޮމާންޑަރެއް ކަމަށް އައި.ޑީ.އެފް އިން ބުނެފައިވެއެވެ.

އިޒްރޭލުގެ ބާރުތަކުން - އިޒްރޭލުން ހިފާފައިވާ ގޯލަން ހައިޓްސް އަދި ލުބުނާން ވަކިކުރާ، އދ. އިން ބެލަހައްޓާ ސަރަހައްދު ކަމުގައިވާ "ބްލޫ ލައިން" ހުރަސްކޮށް ގާތްގަނޑަކަށް 400 މީޓަރު (1،300 ފޫޓު) ދެކުނު ލުބުނާނުގެ ސަރަހައްދުގެ ތެރެއަށް ވަތް ކަމަށް އިޒްރޭލުން ވަނީ ބުނެފައެވެ.