ނިމިގެން ދިޔަ ފުޓުބޯޅަ ސީޒަނުގައި ޔޫރަޕުގެ އެންމެ މޮޅު ކުޅުންތެރިޔާއަށް ވާދަ ކުރާ ކުޅުންތެރިން ޔުއެފާއިން އިއުލާން ކޮށްފިއެވެ.

މި އެވޯޑަކީ ކޮންމެ އަހަރަކު ޔޫރަޕްގެ މުބާރާތްތަކުގައި ކުޅޭ އެންމެ މޮޅު ކުޅުންތެރިޔާއަށް ދެވޭ އެވޯޑެކެވެ. މި އެވޯޑު ދެވެނީ ހަމައެކަނި ޔޫރަޕުގެ ގައުމުތަކަށް ނިސްބަތްވާ ކުޅުންތެރިންނަކަށް ނޫނެވެ.

މި އެވޯޑަށް ކުޅުންތެރިން ޝޯޓްލިސްޓު ކޮށްފައި ވަނީ 80 ކޯޗުންނާއި 55 ނޫސްވެރިން ހިމެނޭ ޖަޖުންގެ ޕެނަލަކުންނެވެ.

މި އެވޯޑަށް ޖުމްލަ 10 ކުޅުންތެރިން ވާދަކުރެއެވެ. އެ ގޮތުން ރެއާލް މެޑްރިޑްގެ ފޯވާޑް ކްރިސްޓިއާނޯ ރޮނާލްޑޯއާއި ބާސެލޯނާގެ ފޯވާޑް ލިއޮނެލް މެސީ އަދި ޖުވެންޓަސްގެ ކެޕްޓަން އަދި ގޯލްކީޕަރު ޖިއަންލުއީޖީ ބުފަން މީގެތެރޭގައި ހިމެނެއެވެ.

މި ކުޅެންތެރިންގެ އިތުރަށް ރެއާލްގެ ތިން ކުޅުންތެރިން ކަމަށްވާ ޑިފެންޑާ ސާޖިއޯ ރާމޯސް އަދި މިޑްފީލްޑަރުން ކަމަށްވާ ލުކާ މޮޑްރިޗްއާއި ޓޯނީ ކްރޫސް ހިމެނެއެވެ. މީގެއިތުރުން ޖުވެންޓަސްގެ ފޯވާޑް ޕައުލޯ ޑިބާލާ އާއި ބަޔާން މިއުނިކްގެ އިތުބާރު ފޯވާޑް ރޮބާޓް ލެވަންޑޯސްކީ އާއި މެންޗެސްޓާ ޔުނައިޓަޑަށް މިދިޔަ ސީޒަނުގައި ކުޅުނު ފޯވާޑް ޒަލަޓާން އިބްރަހިމޮވިޗްގެ ނަން މި ލިސްޓުގައި ހިމެނެއެވެ.

މިދިޔަ ސީޒަނުގައި ގިނަ ބަޔަކު ހައިރާންކޮށްލި މޮނާކޯގެ ޒުވާން ފޯވާޑް ކިލިއަން އެމްބާޕޭވެސް މި ލިސްޓުގައި ހިމެނެއެވެ.

މި އެވޯޑު ދިނުމަށް ހަމަޖެހިފައި ވަނީ މި މަހުގެ 24 ވަނަ ދުވަހު އޮންނަ ޔުއެފާ ޗެމްޕިއަންސް ލީގުގެ ގުރު ނެގުމުގެ ރަސްމިއްޔާތުގައެވެ. މި އެވޯޑުގެ އިތުރަށް މި ހަފްލާގައި މިދިޔަ ސީޒަނުގައި ޔޫރަޕުގައި ކުޅުނު އެންމެ މޮޅު ގޯލްކީޕަރާއި، ޑިފެންޑަރާއި، މިޑްފީލްޑަރުގެ އިތުރަށް އެންމެ މޮޅު ފޯވާޑް ހޮވާނެއެވެ.

މިދިޔަ އަހަރު މި އެވޯޑް ހާސިލްކޮށްފައި ވަނީ ރެއާލްގެ ފޯވާޑް ރޮނާލްޑޯއެވެ.