ރައީސުލްޖުމްހޫރިއްޔާ ޑރ. މުހައްމަދު މުއިއްޒަކީ ސިޔާސީ ޕާޓީތަކުގެ އެކުވެރިޔާ ކަމަށް ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވެއްޖެއެވެ.

ބުރާސްފަތި ދުވަހުގެ ރޭ ބޭއްވި އެމްޑީޕީ ހަރުގެ ޖަލްސާގައި މެންބަރު ޒިޔާދު ވިދާޅުވީ ރައީސް މުއިއްޒު ސަރުކާރުގެ ވަޒީރުންނަށް އެމަނިކުފާނުގެ އިތުބާރު ނެތްކަން ހާމަވަމުންދާ ކަމަށެވެ. ނަމަވެސް ހާލަތުގެ ގޮތުން މަގާމުން ދުރު ކުރެވެން ވެސް ނެތް ކަމަށެވެ.

މެންބަރު ޒިޔާދު ވިދާޅުވީ ނަތީޖާއެއް ގޮތުން ރާއްޖޭގައި ކަންކަން ހިނގާ މަގު ރައީސް މުއިއްޒަށް އެނގިވަޑައިނުގަންނަވާ ކަމަށެވެ. ނަމަވެސް ސިޔާސީ ޕާޓީތަކުގެ ނިޒާމެއްގައި ކަންކަން ހިނގާ ގޮތް އެނގިވަޑައިގަންނަވާނެ ކަމަށް މެންބަރު ޒިޔާދު ވިދާޅުވިއެވެ.

މިސަރުކާރާ ގުޅޭގޮތުން ރައްޔިތުންގެ ގިނަ ޝަކުވާތައް ލިބޭކަން ފާހަގަކުރައްވައި މެންބަރު ޒިޔާދު ވިދާޅުވީ ރައީސް މުއިއްޒުގެ އަރިހުގައި ހެޔޮ ނަސޭހަތެއް ދޭނެ މީހަކު ނެތް ކަމަށާއި، ކުޑަތުއްތު ދީދީގެ މޮހަރަށް ވީހެންވަމުންދާ ކަމަށެވެ. އަދި މޮހަރު ޖެހުނު ތަނަކަށް ޖަހަމުންދާ ކަމަށާއި، ޖަހަން މަސައްކަތް ކުރާ މިސްރާބަަށް ނުޖެހޭ ކަމަށް އޭނާ ވިދާޅުވިއެވެ.

މީގެ އިތުރުން މެންބަރު ޒިޔާދު ވިދާޅުވީ ރައީސް މުއިއްޒަށް ތައުރީފް ކުރުމަށް ވެސް ބައިވަރު ކަންކަން އެބަހުރި ކަމަށެވެ. އެގޮތުން މިއަދު އެމަނިކުފާނަކީ މަލްޓިޕާޓީ ނިޒާމުގެ ލާމަސީލު ދިރިހުރި ރަމްޒެއް ކަމަށާއި، ކޮންމެ މަގާމަކަށް ވަޑައިގެންނެވީ އައު ޕާޓީއަކާއެކު ކަމަށް މެންބަރު ޒިޔާދު ވިދާޅުވިއެވެ. އަދި ވިދާޅުވީ ރައީސްއަކީ ޕާޓީތަކުގެ އެކުވެރިއެއް ކަމަށެވެ.

މެންބަރު ޒިޔާދު ވިދާޅުވީ ރައީސް މުއިއްޒަކީ އާއްމުކޮށް ދޮގު ހައްދަވާ ބޭފުޅެއް ކަމަށެވެ.

އެހެންކަމުން މިއަދު އެމަނިކުފާނު ތެދުފުޅެއް ހެއްދެވި ނަމަވެސް އެއީ ތެދެއްކަން ރައްޔިތުންނަށް ސާބިތުކޮށްދިނުމަށް މުޅި ސަރުކާރު ތެދުވެ އެކަމަށް މަސައްކަތް ކުރަންޖެހޭ ކަމަށް މެންބަރު ޒިޔާދު ވިދާޅުވިއެވެ.