މާލެ މަގުމަތިން ވަޅިން ބިރު ދައްކާ ފޭރުނު މައްސަލައިގެ ތުހުމަތުގައި ހައްޔަރުކުރި މީހާގެ ބަންދަށް 10 ދުވަސް ޖަހައިފިއެވެ.
މިމައްސަލައާ ގުޅިގެން މިމަހުގެ 22 ވީ ބުރާސްފަތި ދުވަހު ހައްޔަރުކޮށްފައިވަނީ ގދ. ވާދޫ، ބުރުނިއާގެ 26 އަހަރުގެ ޝާނާ މުޙައްމަދު ޖުނައިދެވެ.
ހުކުރު ދުވަހު ކްރިމިނަލް ކޯޓުން އޭނާ 10 ދުވަހަށް ބަންދުކުރުމަށް އަމުރުކޮށްފައިވާއިރު، ކޯޓު އަމުރުގައި ބުނެފައިވަނީ އޭނާ ބަންދުގައި ބަހައްޓަންޖެހެނީ ޖިނާއީ އިޖުރާއަތުގެ ގާނޫނުގެ ދަށުން މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެތީ ކަމަށެވެ.
ކްރިމިނަލް ކޯޓުން އޭނާގެ މައްޗަށް ބަންދުގެ އަމުރުކޮށްފައި ވަނީ ތޫނު ހަތިޔާރު ބޭނުންކޮށްގެން ފޭރުނު މައްސަލައިގައެވެ. އެގޮތުން ކުށްކުރި ކަމަށް ތުހުމަތުކުރެވޭ މިންވަރަށް ހެއްކާއި ގަރީނާ ހުށަހަޅާފައިވާ ކަމަށާއި، ހާދިސާ ހިނގި ތަނަށް ދިޔަ ފުލުހުންގެ ހާދިސާ ރިޕޯޓު ހުށަހަޅާފައިވާ ކަމަށެވެ.
ނަމަވެސް އެ ކުށަށް އޭނާ ވަނީ އިންކާރުކޮށްފައެވެ.
ކޯޓުން އޭނާގެ މައްޗަށް އިއްވާފައިވާ އަމުރުގައި ބުނެފައިވަނީ، އެއްވެސް މީހަކަށް މިމައްސަލައާ ގުޅިގެން އަނިޔާއެއް ލިބިފައިވާ ކަމުގެ މައުލޫމާތު ލިބިފައިނުވާ ކަމަށް އިންވެސްޓިގޭޓިވް އޮފިސަރު ބުނެފައިވާ ކަމަށެވެ. އަދި ފޭރުނު ކަމަށް ބުނާ ފޯނު އެހެން މީހަކު އައިސް ފޯނުގެ ވެރިފަރާތަށް ފޯނު ހަވާލުކޮށްފައިވާ ކަމަށް ވެސް އިންވެސްޓިގޭޓިވް އޮފިސަރު ބުނެފައިވާކަން ފާހަގަކޮށްފައިވެއެވެ.
މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
މާލެސިޓީގައި ފޭރުމާއިވައްކަމުގެ މައްސަލަތައް އިތުރެވެ. ފުލުހުން އެންމެފަހުން އާއްމުކޮށްފައިވާ މައުލޫމާތަށް ބަލާއިރު، މިއަހަރުގެ މިހާތަނަށް ވައްކަމާއި ފޭރުމުގެ 2620 މައްސަލަ ހުށަހަޅައިފައިވެއެވެ.
