ދިވެހިރާއްޖޭގެ ޓޫރިޒަމާ ބެހޭ ގާނޫނުގެ ދަށުން ރިސޯޓު ހިންގަން ދޫކޮށްފައިވާ ރަށްތަކާއި ބިންތައް ކުއްޔަށް ދޫކުރާ މުއްދަތު އިތުރުކުރާނަމަ، ފައިސާ ދައްކަންޖެހޭ މުއްދަތު ދެ އަހަރުން ހަ މަހަށް ކުރުކުރަން ހުށަހެޅި އިސްލާހު ރައްޔިތުންގެ މަޖިލީހުން ފާސްކޮށްފިއެވެ.
ދިވެހިރާއްޖޭގެ ޓޫރިޒަމާބެހޭ ގާނޫނަށް އިސްލާހު ގެނައުމުގެ ބިލު ހުށަހެޅުއްވީ ސަރުކާރުގެ ފަރާތުން ދަނގެތި ދާއިރާގެ މެންބަރު އަބްދުﷲ ރަޝީދެވެ.
ހޯމަ ދުވަހު ކުރިއަށް ގެންދިޔަ ރައްޔިތުންގެ މަޖިލީހުގެ ޖަލްސާގައި ދިވެހިރާއްޖޭގެ ޓޫރިޒަމްއާ ބެހޭ ގާނޫނަށް އިސްލާހު ގެނައުމުގެ ބިލު މުޅި މަޖިލީހުގެ ކޮމެޓީން ދިރާސާކޮށް ނިންމި ގޮތުގެ ރިޕޯޓަށް މަޖިލީހުން ގެންނެވި އިސްލާހުތަކާއެކު ވަނީ ފާސްކޮށްފައެވެ.
ރިސޯޓު ހިންގާ ރަށްތަކުގެ ކުލީގެ މުއްދަތު އިތުރުކުރާނަމަ، ފައިސާ ދައްކަންޖެހޭ މުއްދަތު ކުރުކުރަން ހުށަހެޅި އިސްލާހު ފަސްކޮށްފައިވަނީ 76 މެންބަރުންގެ ވޯޓާއެކުއެވެ. އެ އިސްލާހާ ދެކޮޅަށް އެއްވެސް މެންބަރަކު ވޯޓު ދެއްވާފައެއް ނުވެއެވެ.
މަޖިލީހުގެ ޖުމްލަ މެންބަރުންގެ އަދަދު 93، ހާޒިރުވެ ތިއްބެވި މެންބަރުގެ އަދަދު 77، ފެންނަ ކަމަށް ވޯޓު ދެއްވި މެންބަރުންގެ އަދަދު 76، ނުފެންނަ ކަމަށް ވޯޓު ދެއްވި މެންބަރުންގެ އަދަދު 0، ވަކި ގޮތަކަށް ވޯޓު ދޭން ބޭނުންނުވާ ކަމަށް ވޯޓު ދެއްވި މެންބަރަކު ނެތް. ވޯޓުގައި ބައިވެރިވި މެންބަރުންގެ އަދަދު 76، ފާސްވުމަށް ބޭނުންވާ އަދަދު 39، އެހެންކަމުން މި ބިލު މަޖިލީހުން ފާސްވެއްޖެ.މަޖިލީހުގެ ރިޔާސަތުގައި އިންނެވި ދިއްގަރު ދާއިރާގެ މެންބަރު އަހުމަދު ނާޒިމް
ބިލަށް ގެނައި އިސްލާހާ ގުޅޭގޮތުން އެމްޑީޕީގެ ބައެއް މެންބަރުން ވިދާޅުވެފައިވަނީ މި އިސްލާހަކީ ސަރުކާރުން ފައިސާ ހޯދާނެ ގޮތް ނޭނގިގެން ގެނެސްފައިވާ އިސްލާހެއް ކަމަށެވެ.
ދިވެހިރާއްޖޭގެ ޓޫރިޒަމާ ބެހޭ ގާނޫނުގެ ދަށުން ޓޫރިސްޓް ރިސޯޓު ހިންގަން ދޫކޮށްފައިވާ ރަށްތަކާއި ބިންތައް ކުއްޔަށް ދޫކުރާ މުއްދަތު އިތުރުކުރާނަމަ، ފައިސާ ދައްކަންޖެހޭ މުއްދަތު ދެ އަހަރުން ހަ މަހަށް ކުރުކުރަން ނިންމާފައިމިވަނީ އިންވެސްޓަރުންގެ އަތުން ފައިސާ ހޯދުމަށް ކަމަށެވެ.
ދިވެހިރާއްޖޭގެ ޓޫރިޒަމާބެހޭ ގާނޫނަށް އިސްލާހު ގެނައުމުގެ ބިލުގެ މަސައްކަތް ކޮށް ނިންމާފައިވާތީ ވެސް ގިނަ މެންބަރުންގެ ފާޑުކިޔުންތައް ވަނީ އަމާޒުވެފައެވެ. މިމަހުގެ 13 ވީ އަންގާރަ ދުވަހު މިއިސްލާހު ހުށަހަޅާފައިވާއިރު، މުޅި މަޖިލީހުގެ ކޮމިޓީއަށް މިމަހުގެ 14ވީ ބުދަ ދުވަހު ފޮނުވިއެވެ. އެއާއެކު ބުރާސްފަތި ދުވަހު ކޮމިޓީ މަރުހަލާއިން އެ ބިލު ވަނީ ފާސްކޮށްފައެވެ.
އެ ބިލުގައިވަނީ ޓޫރިޒަމާ ބެހޭ ގާނޫނުގެ ނުވަވަނަ މާއްދާއަށް ބައެއް އިސްލާހުތައް ވަނީ ގެނެސްފައެވެ. މިހާރު އަމަލުކުރަމުންދާ ގާނޫނުގައި ބުނެފައިވަނީ މުއްދަތު އިތުރުކުރަން ފައިސާ ދައްކަންޖެހެނީ ދެ އަހަރު ދުވަހުގެ މުއްދަތެއްގައި ކަމަށެވެ. ނަމަވެސް، ހުށަހެޅި އިސްލާހުގައިވަނީ ފައިސާ ދައްކަންޖެހޭ މުއްދަތު ހަ މަހަށް ކުރުކޮށްފައެވެ.
މި އިސްލާހަށް އަމަލުކުރަން ފެށުމަށްފަހު، ހަ މަސް ދުވަހުގެ ތެރޭގައި ފަސް މިލިއަން ޑޮލަރު ދައްކައިފިނަމަ ކުލީގެ މުއްދަތު އިތުރުކޮށްދޭނެއެވެ. އޭގެ ފަހުންނަމަ 10 މިލިއަން ޑޮލަރު ދައްކަން ޖެހޭކަމަށް އިސްލާހުގައި ބުނެފައިވެއެވެ.
