މެންޗެސްޓާ ޔުނައިޓެޑަށް އަލަށް ގެނައި ފޯވަޑް ހޯޝުއާ ޒިރްކްޒީ އޭނާ ދެކެމުން އައި ހުވަފަން ކުލަކޮށްފި އެވެ.
އިނގިރޭސި ޕްރެމިއާ ލީގު ހުޅުވަން މިރޭ ފުލަމްއާ ދެކޮޅަށް ކުޅުނު މެޗުން ޔުނައިޓެޑް މޮޅުވީ ފަހުހާފުގައި ކުޅެން ނުކުމެ އޭނާ ޖަހައިދިން ހަމައެކަނި ލަނޑުންނެވެ. މެޗު ނިމެން ތިން މިނިޓަށް ވެފައިވަނިކޮށް ގޯލު ޖެހުމަށްފަހު އޭނާ ބުނީ މިއީ ހުވަފެން ހަގީގަތަށްވުން ކަމަށެވެ.
ޔުނައިޓެޑުން މި ސީޒަނަށް އޭނާ ގަތީ އިޓަލީގެ ބޮލީނިއާ އަށް 36 މިލިއަން ޕައުންޑް ދީފަ އެވެ.
"އަހަރެންގެ ޔުނައިޓެޑްގެ ދަނޑުގައި ކުޅުނު ފުރަތަމަ މެޗުގައި ގޯލެއް ޖެހުން މިއީ އަދި އެންމެ މޮޅަށްވީ ކަމެއްނޫން. މިއަށްވުރެ މޮޅު ކަންކަން ކުރެވޭނެ. އެކަމަކު މި ގޯލު ޖެހުމަކީ އަހަރެންގެ ކެރިއަރުގައި ވަރަށް އުފާވެރި ވަގުތުކޮޅެއް. އަހަރެންގެ ފުރަތަމަ މެޗަކީ ވަރަށް ހާއްސަ މެޗެއް. މިއީ ހުވަފެން ހަގީގަތަށްވުމެއް. މި މެޗު އަހަރެން ދުވަހަކު ވެސް ހަނދާނެއް ނުނެތޭނެ،"ޒިރްކްޒީ ބުންޏެވެ.
ނެދަލޭންޑްސްގެ 23 އަހަރުގެ ފޯވަޑް ޔުނައިޓެޑް މި ސީޒަން ހުޅުވަން ކުޅުނު ކޮމިއުނިޓީ ޝީލްޑް މެޗުގައި ނުކުޅުވަ އެވެ. އެއީ ޔޫރޯ ފުޓްބޯޅަ މުބާރާތަށް ފަހު ޕްރީ ސީޒަން އެންމެ ފުރިހަމައަށް ނުހަދި ހުރުމުންނެވެ. ނަމަވެސް ޒިރްކްޒީ ބުނީ މި މެޗުގައި އޭނާ ދަނޑަށް ނެރުމުގެ ކުރިން ކޯޗު އެރިކް ޓެންހަގް މުހިންމު ކަމަކަށް އެދުނު ކަމަށެވެ.
"ކޯޗު ބުނީ ޓީމަށް ދިރުން ގެނެސްދޭށޭ. ޓީމު މޮޅުކޮށްދޭން އިތުރަށް މަސައްކަތް ކޮށްދޭށޭ. އަހަރެންނަށް ކުރެވެން ހުރި ހުރިހާ ކަމެއް ކޮށްދޭށޭ. އަހަރެން މިހުރީ ވަރަށް އުފަލުން ގޯލެއް ޖެހުމުން. މިވަގުތު ކުރެވެނީ ވަރަށް އެހެންކަހަލަ އިހުސާސެއް،"ޒިރްކްޒީ ބުންޏެވެ.
މެޗަށް ފަހު ޓެންހަގް ބުނީ ޓީމާ އަލަށް ގުޅުނު ކުޅުންތެރިން މޮޅަށް ފާފޯމް ކުރުމަކީ މުހިންމު ކަމެއް ކަމަށާއި ޒިރްކްޒީއާ މެދު އޭނާ ގިނަ އުއްމީދުތަކެއް ކުރާ ކަމަށެވެ.
