ޖަރުމަނު ފޯވާޑް ނިކްލަސް ފުލްކްރޫގް ވެސްޓް ހޭމް އަށް ސޮއިކޮށްފި އެވެ.

ބޮރޫޝިޔާ ޑޯޓްމަންޑް ދޫކޮށް ފުލްކްރޫގް ޕްރިމިއަރ ލީގުގެ ވެސްޓް ހޭމް ޔުނައިޓެޑަށް ސޮއިކުރީ 27 މިލިއަން ޕައުންޑްގެ ފީއަކަށެވެ. 31 އަހަރުގެ ފޯވާޑް ކްލަބް ބަދަލުކުރީ އެންމެ ސީޒަނަކަށް ފަހުއެވެ. މިދިޔަ ސީޒަންގައި އޭނާ ވަނީ ޑޯޓްމަންޑަށް 46 މެޗުން 15 ލަނޑު ޖަހައިދީފައެވެ. އަދި އޭނާގެ އެހީތެރިކަމާވެސްއެކު ޑޯޓްމަންޑް ވަނީ ޗެމްޕިއަންސް ލީގު ފައިނަލްގައިވެސް ކުޅެފައެވެ. މިދިޔަ މަހު ނިމުނު ޔޫރޯގައިވެސް ޖަރުމަނު ގައުމީ ޓީމަށް އޭނާ ދެ ލަނޑު ޖަހައިދިނެވެ.

ވެސްޓް ހޭމް ޔުނައިޓެޑާއެކު ފުލްކްރޫގް ސޮއިކުރީ 4 އަހަރުގެ އެއްބަސްވުމެއްގައެވެ. އެކްލަބަށް ބަދަލުވުމަށްފަހު އޭނާ ބުނީ ޕްރިމިއަރ ލީގަކީ ދުނިޔޭގެ އެންމެ މޮޅު, އެންމެ ރަނގަޅު ލީގު ކަމަށެވެ. އަދި މިއީ ޕްރިމިއަރ ލީގަށް ބަދަލުވެ, ވެސްޓް ހޭމް ކަހަލަ ބޮޑު ޓީމަކަށް ކުޅެންވީ ވަގުތު ކަމަށް އޭނާ ބުންޏެވެ. ފުލްކްރޫގް އަކީ އާސީޒަނަށް ވެސްޓްހޭމް އިން ސޮއިކުރުވި ފަސްވަނަ ކުޅުންތެރިޔާ އެވެ. ކުރިއަށް އޮތް ސީޒަންގައި އެޓީމަށް އިރުޝާދުދޭނީ ސްޕެއިންގެ ހުލެން ލުޕެޓެގީ އެވެ.