އެއީ މީގެ ދުވަސްކޮޅެއް ކުރިއެވެ. ނިމިދިޔަ ރިޔާސީ އިންތިޚާބުގެ ކެމްޕޭން ދުވަސްވަރެވެ. ފޯރީގައި ވައުދުތަކުގެ ވާހަކަ ދައްކަމުންދިޔަ ދުވަސްވަރެވެ. އޭރުގެ އިދިކޮޅު ކެނޑިޑޭޓް މިހާރުގެ ރައީސުލް ޖުމްހޫރިއްޔާގެ ވާހަކަފުޅު ވަރަށް ސާފެވެ. އެއްވެސް ހާސްކަމެއްނެތެވެ. މޫނަށް ރުލެއްވެސް އަރުވާނުލައްވައި ވިދާޅުވަމުން ގެންދެވީ ދައުލަތުގެ ރިޒާވް ކޮންމެ ހާލަތެއްގައި އޮތަސް ފަރުވާލެއް ނެތްކަމަށެވެ. ބިރެއް ޖެހިލުންވުމެއް ނެތްކަމަށެވެ. ރައްޔިތުންގެ ކަންކަން ކޮށްދެއްވާނެ ކަމަށެވެ. މެނޭޖް ކުރައްވާނެ ކަމަށެވެ. ފައިސާ ނެތިގެން އެއްވެސް މަޝްރޫއެއް ހުއްޓަވާ ނުލައްވާނެ ކަމަށެވެ. އެއީ ފަށާފައި ހުރި ހުރިހާ މަޝްރޫއުތަކާއި ފަށަން ތައްޔާރުވެ ނުފެށި ހުރި މަޝްރޫއުތައް އަދި ފަށާފައި ހުއްޓި، ފަށަން ނޭނގިފައި ހުރި މަޝްރޫއުތައްވެސް މެއެވެ.
ޑރ މުއިއްޒުގެ އޭރުގެ ބަހުންނަމަ ރައްޔިތުންނަށް ހާސްކަމެއްނެތެވެ. ކަންވެ ފިކުރުބޮޑުވާންޖެހޭނެ ކަމަށެވެ. އެޔަޤީންކަން އެގޮތައް ދެއްވީ އޭރުގެ ސަރުކާރުގެ މާލީހާލަތު ރަނގަޅަށް އެނގިވަޑައިގެން ހުންނަވާ ކަމަށާއި ފައިސާ ނެތަސް ފައިސާ ލިބެންހުރި ކޮޅުތަކާއެކުގައި ކަމަށެވެ.
އިންތިޚާބު ކާމިޔާބު ކުރެވި ހުވާ ކުރުމުގެ ކުރިން އައި އިންތިގާލީ މަރުހަލާ ވެގެން ދިޔައީ ރައީސް މުއިއްޒު އެ ވިދާޅުވި ކަންކަން އަކުރުން އަކުރަށް ދެނެގަނެ އާސަރުކާރުން ކަންކުރާނޭ ޕްލޭން ހެދުމަށެވެ. އެކަމަށްޓަކައި މުއިއްޒުގެ އަމިއްލަ ގެކޮޅުގެ އިތުރުން އިލެކްޓް ރައީސުލް ޖުމްހޫރިއްޔާގެ އޮފީހުގައި ކެނޑި ނޭޅިދިޔައީ މަސައްކަތްކުރަމުންނެވެ. މުއިއްޒު އެކުލަވާލެއްވި ޓީމުތަކުން ދިޔައީ ހުރިހާ މުއައްސަސާތަކާއި ވުޒާރާތަކާ ބައްދަލުކޮށް ހުރިހާ މައުލޫމާތެއް އެއްކޮށް ސާފުކޮށް އޭރުގެ ހާލަތު އޮތްގޮތް ދިރާސާ ކުރަމުންނެވެ. ހަމަ އެއާއެކުއެކީގައި ވިދާޅުވި ގޮތައް ރައްޔިތުންގެ މަޖިލީހުން ކޮންޓެންޖެންސީ ބަޖެޓެއްވެސް ފާސްކޮށްދިނެވެ.
އޭރުވެސް ހާސްކަމެއް ނެތެވެ. ހަމަ އެއްވެސް ވަރަކަށް ހާސްކަމެއް ނެތީއެވެ. ޚަރަދުތައް ކުރުމުގައިވެސް ކުޑަކޮށްވެސް ބަލައެއް ނުލައެވެ. ފުރަތަމަ ފެށްޓެވީ ހުވާ ކުރެއްވުމުގެ ރަސްމިއްޔާތަށެވެ. ހަމައެކަނި ރަތް ރޮނގަކާއި ޤައުމީ ދިދައަށް އިޝާރާތް ކުރައްވާ އެކުޅުއްވި ޑްރާމާއަށްޓަކައި އެރަސްމިއްޔާތު ބޭއްވެވީ ހާމައަށް އޮތް ޖުމްހޫރީ މައިދާނުގައެވެ. މިލިއަނުން މިލިއަނުން ހަރަދުކޮށް މިހާތަނަށް ބޭއްވި އެންމެ އަގުބޮޑު ހުވާ ކުރުމުގެ ރަސްމިއްޔާތުގެ ރެކޯޑާއެކުގައެވެ.
ހުވާ ކުރެއްވުމަށްފަހު ދެން މިސްރާބު ޖެއްސެވީ ދިރިއުޅުއްވަން މުލިއާގެ ތައްޔާރު ކުރުމަށެވެ. ކުރީގެ ރައީސް އިބްރާހީމް މުހައްމަދު ސާލިހް ދިރިއުޅުއްވާފައި ނުކުމެވަޑައިގެން އެގޭގެ އާބާތުރަ ފިލުވަންވެސް އަނެއްކާވެސް މިލިއަނުންނެވެ. ހަމައެގޮތައް ކުރީގެ ނައިބު ރައީސް ފައިސަލް ނަސީމް ދިރިއުޅުއްވި ހިލާލީގެއަށްވެސް ގެނައި ބަދަލުތަކުގެ އަދަދު ގުނާލެވެނީ މިލިއަނުންނެވެ.
މިހެންގޮސް ކިޔާނެ ކަމެއްނެތެވެ. މިހާތަނަށް ރެކޯޑް އަދަދަކަށް ސިޔާސީ މަގާމްތައް އުފެއްދުމުގެ އިތުރުން އެހެނިހެން ޚަރަދުތައް ކުރުމުގައި ޑރ މުއިއްޒުގެ ސަރުކާރުން ދައުލަތުގެ މާލިއްޔަތަކަށް ކުޑައިކޮށްވެސް ބަލައި ނުލައެވެ. ޚަޒާނާގައި ހުރިއްޔާ ހުރި ފައިސާއެއް ފަހަށް ބަލާވެސް ނުލައި ހޭދަކުރަމުން ދިޔައެވެ. ވާނީވެސް އެހެންތާއެވެ. ފައިސާ އޮތީ ލިބޭށެވެ. އަރަބި ގައުމުތަކުން އޮތީ ބޮނޑި އަޅާފައި އުކާ ގޮތަށެވެ. ޗައިނާ އޮތީ ފައިސާ ނުދެވިފައެވެ. ޑްރޯން ގަންނަން ހެދި މޮޅު ޑީލާއެކު ތުރުކީވިލާތުން ވެސް އޮތީ ރާއްޖެއާ ދިމާލަށް ފައިސާގެ ގޯނިތައް އޮއްސާލުމަށް ތައްޔާރަށެވެ. ދެން ކޮންކަމަކާ ހާސްވާކަށް ހެއްޔެވެ. ދައުލަތުގެ ބަޖެޓަކަށް ރިޒާވްގައި ހުރި ފައިސާގެ އަދަދަކަށް ބެލުމުގެ ބޭނުމެއް އެބައޮތްހެއްޔެވެ. ފައިސާ ހުސްވެ ފަހުން އެއްޗެއް ނެތިދާނެ ކަމަށްބަލަން ޖެހޭނޭ ކަމެއް އެބައޮތްހެއްޔެވެ.
ކޮންމެއަކަސް ރޭކާލީ އޭގެ މާފަހުންނެވެ. ވެރިކަމުގެ މާމުއި ހަނދުގެ ދުވަސްވަރު ނުވެސް ނިމެނީހެވެ. ފައިސާ ހުސްވެ ދައުލަތް މެނޭޖް ނުކުރެވޭ ހިސާބަށް ދިޔައީމައެވެ. ފައިސާ ދޭނެ ކަމަށް ހީކުރެވުނު ފަރާތްތަކުން ހަތަރު އަނާވެސް ދިއްކޮށް ނުލީމައެވެ. އެފަރާތްތަކުގައި ޖެހި ސަލާމަށް ނާށިގަނޑަށް އެއްޗެއް ވައްޓާލާނެ ބަޔަކު ނުވީމައެވެ. ކެންޕޭން ދުވަސްވަރު ޖެހި ހިސާބާ ދިމާނުވެ އެއަށް ބަލައިގެން ފުރަތަމަ ދެތިންމަހަކު ތަޅާބުރުވާލި ފައިސާތަކާއެކު ގައުމު ބަނގުރޫޓުވާ ހިސާބަށް ދިަފަހުންނެވެ.
މިއަދަކު ދެން އިގްތިސޯދޭ، ފައިސާއެއް ނެތޭ ކުރީ ސަރުކާރުން ދިޔައީ ދަރުވާލާފައޭ ބުނުމުގެ މާނައެއް ނެތެވެ. ވެރިކަމުގެ މާމުއި ހަނދުގެ ދުވަސްވަރު ރިޒާވުން އަޗާތަޅާލާފައި މިއަދު ޅަފަޅޮލޭ ގޮވުމުގެ ބޭނުމެއްނެތެވެ. ދެން ތިޔައެއްޗެއް ރައްޔިތުންނަށް ފަހުމްކޮށްދޭކަށް އުޅުމުގެ ބޭނުމެއްނެތެވެ. ބަތާ ގަރުދިޔަ ކައިގެންވެސް ރައްޔިތުން ތިބީ ތިޔަ ގޮވާހާ ގޮވެލިފަތި ގަބޫލު ކުރާ ވަރަށްވުރެ މާބޮޑަށް ރޯފިލައިގެންނެވެ. ކިތައްމެ ވަރަކަށް ކެންސަލް ކުރިއަސް އޭރު ކީ އެއްޗެހި ކަންފަތުގައި ހަރުލާފައި އެބަހުއްޓެވެ.
