ރައީސް ސާލިޙް ގެ ސަރުކާރުން ކަނޑައެޅި ހަތަރު ހާސް ފްލެޓްގެ ހައްގުވެރިންގެ ތެރެއިން ގެޒެޓް ކުރެވުނު ލިސްޓުގައި ހިމެނޭ އެކަކުވެސް ފްލެޓް ލިސްޓުން ބާތިލް ނުކުރުމަށް އެދި ސަރުކާރަށް ގޮވާލާ ރައްޔިތުންގެ މަޖިލީހަށް ހުށަހެޅި ޕެޓިޝަން އާ ބެހޭ ގޮތުން ކޮމިޓީގެ މެމްބަރުން ކުރެއްވި ސުވާލު ތަކަށް ޖަވާބު ދެއްވަމުން ރިޔާސީ އިންތިޚާބުގައި ޑރ. މުއިއްޒު ފުލެޓް ދޫކުރުމުގައި އަމަލު ކުރައްވާނެ ކަމަށް ވައުދުވެ ވަޑައިގެންނެވި ގޮތަކީ މިހާރު ސަރުކާރުން އަމަލު ކުރާނެ އެއްޗެއް ނޫންކަން ހައުސިން މިނިސްޓަރ އަލީ ހައިދަރުގެ ވާހަކަ އިން ހާމަ ވެއްޖެއެވެ.
ކޮމިޓީގައި މެމްބަރުން ފާހަގަ ކުރެއްވީ ރިޔާސީ އިންތިޚާބުގައި އެއްތަނަށް ވުރެ ގިނަ ތަންތާނގައި، ކުރީ ސަރުކާރުން ފްލެޓް ލިބޭނެ ކަމަށް ލިޔުން ދީފައިވާ އެއްވެސް ފަރާތެއްގެ އަތުން ފްލެޓް އަތުނުލާނެ ކަމަށް މުއިއްޒު ވިދާޅުވެފައިވާ ކަމަށެވެ.
ދައުލަތުން ލިޔުން ދީފައި އޮތް އެއްވެސް މީހެއްގެ އަތުން ފްލެޓް އަތު ނުލައްވާނެ ކަމަށް ރިޔާސީ އިންތިޚާބުގައި ވިދާޅުވި ވިދާޅުވުން މެމްބަރުން ތަކުރާރު ކޮށް ފާހަގަ ކުރެއްވި ނަމަވެސް އެއީ މިނިސްޓަރ މާބޮޑަށް ފަރުވާލެއް ބެހެއްޓެވި ވާހަކަ އެއް ކަމަކަށް ކޮމިޓީ ބައްދަލުވުމުގެ ތެރޭގައި ފާހަގަ އެއް ނުކުރެވުނެވެ. އޭގެ ބަދަލުގައި މިނިސްޓަރ ފާހަގަ ކުރައްވަނީ ރައީސް ކަމަށް ވަޑައިގެންނެވި ފަހުން "އަހާ ޕްރޮގްރާމް" ގައި ފްލެޓް ލިބޭނެ ފަރާތްތަކާ ބެހޭ ގޮތުން ޑރ. މުއިއްޒު ދެއްކެވި ވާހަކަފުޅަކަށެވެ.
ރައީސުލް ޖުމްހޫރިއްޔާ އަހާ ޕްރޮގްރާމްގައި ފްލެޓާ ބެހޭ ގޮތުން ވިދާޅުވީ އޮޅުވާލުމެއް ނެތީއްޔާ އިނގޭތޯ ދެއްވާނަމޭ، އަޅުގަނޑުމެން މި ބަލަނީ ޝަރުތު ހަމަވެގެން އެއްވެސް ކަހަލަ ޝައްކެއް ނެތް ވަރަށް ޝަރުތު ތަކާ އެއްޗެހި ހަމަވެ ޕޮއިންޓް ހަމަވެފައި ތިބި މީހުންނަށް ދިނުމަށް.މިނިސްޓަރ ހައިދަރު
"އެހެންވެ ރައީސުލް ޖުމްހޫރިއްޔާ ވިދާޅުވި އެއްޗަކާ އަޅުގަނޑުމެން މިކުރާ މަސައްކަތަކާ އެއްވެސް ތައާރުޒް ވުމެއް ނެތް،" ކަމަށް މިނިސްޓަރ ފާހަގަ ކުރެއްވިއެވެ.
މިނިސްޓަރ ހައިދަރު މި މޭރުމުން ވާހަކަފުޅު ދެއްކެވީ، ވެލިދޫ ދާއިރާގެ މެމްބަރު މުހައްމަދު އައްބާސް ސަރުކާރުގެ ނިޝާން ޖެހި ކޮންޓްރެކްޓް ހެދިފައި ހުރި ލިޔުންތަކަށް ފްލެޓެ ލިބެން ޖެހޭނެ ކަމަށް އޭނާ ގަބޫލު ކުރައްވާ ކަމަށް ވިދާޅުވެ އެކަމުގައި މިނިސްޓަރ ދެކެވަޑައިގަންނަވަނީ ކިހިނެއްތޯ އައްސަވާ ސުވާލު ކުރެއްވުމުންނެވެ.
މެމްބަރު އައްބާސް ވިދާޅުވީ، ދައުލަތުން ދީފައިވާ ލިޔުމަކަށް އިހްތިރާމް ނުކުރުމުން ގާނޫނޫ އަރާ ހަމަ ކޮށް ހަމަ އެ ލިޔުން ހިފައިގެން ބަދަލު ހޯދަން ދިއުމުގެ ފުރުސަތު ލިބިދާނެ ކަމުގައެވެ.
މިނިސްޓަރ ހައިދަރު ޕެޓިޝަން ކޮމިޓީގައި މިހެން ވިދާޅުވި އިރު ޑރ. މުއިއްޒު ރިޔާސީ ކެމްޕޭންގައި އެތައް ބައެއްގެ ކުރިމަތީގައި ވިދާޅުވަމުން ގެންދެވީ ގޯހުން ވިޔަސް ފެއިލްވެފައިވާ ސިޔާސަތެއްގެ ދަށުން ވިޔަސް ރައްޔިތަކަށް ދީފައިވާ ފްލެޓްކަށްވެސް ގޯއްޗަކަށް ވެސް އެމަނިކުފާނުގެ ވެރިކަމެއްގައި ހުރަސް ނާޅުއްވާނެ ކަމަށެވެ.
ދިވެހި ރައްޔިތުންނަށް ދިވެހި ސަރުކާރަކުން އެއީ ގޯހުން ވިޔަސް، އެއީ ފޭލްވެފައިވާ ސިޔާސަތަކުން ވިޔަސް ރައްޔިތުންނަށް ހެޔޮ ކަމެއް ވަންޏާ، އެކަމަކަށް އަޅުގަނޑުމެން ހުރަސް އަޅައިގެން ނުވާނެ، ރައްޔިތަކަށް އެއްޗެއް ލިބޭނެ ގޮތެއް، ކުޑަ ނަމަވެސް، ކުޑަ ނަމަވެސް ފުރުސަތެއް ލިބޭ ގޮތައް، އެއީ އަދި ވުޖޫދުގަ ނެތް ކަމެއް ވިޔަސް އެއަކަށް އަޅުގަނޑުމެންގެ ސަރުކާރެއްގަ ހުރަހެއް ނާޅާނާން.ރައީސް ޑރ. މުއިއްޒު
ތަކުރާރު ކޮށް ޑރ މުއިއްޒު ވިދާޅުވެފައިވަނީ ގެދޮރުވެރިކަމުގެ ޕްރޮގްރާމެއްގެ ދަށުން ރައްޔިތަކަށް އެއްވެސް އުއްމީދެއް ލިބިފައި އޮތް ކަމެއް އޭނާގެ ސަރުކާރަކުން ބާތިލް ނުކުރައްވާނެ ކަމަށެވެ. ރިޔާސީ އިންތިޚާބުގައި ޑރ މުއިއްޒު ވެވަޑައިގެންނެވި ވައުދާ މުޅިން ޚިލާފަށް ސަރުކާރުގެ މިހާރުގެ ވިސްނުމަކީ ކުރިން ފްލެޓް ލިބުނު މީހުން ކަމަށް ކަނޑައެޅި ލިސްޓަކީ ކެންސަލް ވެފައިވާ އެއްޗެއް ކަމަށް ހަދާ، އެޕްލައި ކުރި އެންމެންގެ އިވެލުއޭޝަން އަލުން ހަދާ ފްލެޓް ލިބޭ މީހުން އަލުން ކަނޑައެޅުން ކަން ހައުސިންގ މިނިސްޓަރ ހޯދަ ދުވަހު ޕެޓިޝަން ކޮމިޓީގައި ދެއްކެވި ވާހަކަފުޅުން ވަރަށް ސާފުވެއެވެ.
އަލުން އިވެލުއޭޝަން ހެދުމުގެ ވިސްނުން ސަރުކާރުން ގެންގުޅޭ ކަން ހާމަ ކޮށްދެއްވަމުން ހައިދަރުގެ ވާހަކަފުޅުގައި ދިރިއުޅުމުގެ ހާލަތުގެ ވަޒަން ކުރުމުގެ ބަޔަކީ އެންމެ ބޮޑަށް އޮޅުވާލައިގެން ޕޮއިންޓް ހޯދާ ބައި ކަމަށް ވިދާޅުވިއެވެ. އިތުރަށް އެކަމަށް ބާރު ލިބޭ މޭރުމުން އޭނާ ވިދާޅުވީ އޮޅުވާލާފައިވަނީ އެކަން އެގޮތައް ކުރުމަށް ފުރުސަތު ދީފައި އޮތުމުން ކަމަށެވެ. އެހެން ކަމުން ލިބެން ހުރި މައުލޫމާތުގެ މައްޗަށް ބަލައި ދިރިއުޅުމުގެ ހާލަތު އަލުން ވަޒަން ކުރަން ޖެހޭނަމަ އެކަން އެ މިނިސްޓްރީން ކުރާނެ ކަމަށް މިނިސްޓަރ ވިދާޅުވިއެވެ.
މިނިސްޓަރގެ ވާހަކަފުޅުން އޭސީސީ އިން ހެދި ރިޕޯޓަކީ ވެސް މިހާރު މާ ބޭނުންތެރި އެއްޗަކަށް ނުވެއެވެ. މެމްބަރުން ސުވާލު ކުރުމުން ސީދާ އެ ރިޕޯޓްގައި ޝަރުތު ހަމަވާ ކަމަށް ބުނާ 825 މީހުންނަށް ވެސް އަދި ފްލެޓް ލިބޭނެ ކަމެއް ކަށަވަރެއް ނުކުރެވެއެވެ.
ސަރުކާރުގެ މުޅި ވިސްނުމަކީ އަލުން ލިސްޓް އިވެލުއޭޓް ކޮށް ފްލެޓް ލިބޭނެ މީހުންގެ އައު ލިސްޓެއް އެކުލަވާލާ އެމީހުންގެ ޒާތީ މައުލޫމާތު ނުހިމެނޭ ގޮތައް ގެޒެޓް ކުރުމެވެ.
825 ކަނޑައެޅިގެން ޝަރުތު ހަމަވާ ކަމަށް އެކަމު އަޅުގަނޑުމެން ބަލާނަށް އެ ވިހިހާސް އެތައް ސަތޭކަ އެޕްލިކޭޝަނެއް އައިއްސަ އެބައޮތް ހުރިހާ އެޕްލިކޭޝަން ތަކެއް އަޅުގަނޑުމެން ބަލައިގެން އަޅުގަނޑުމެން ހޮވާނީ ހަތަރު ހާސް ފްލެޓް ލިބެން ޖެހެނީ ކޮން ބަޔަކަށްތޯ، ޝަރުތު ތައް ހަމަވެ އެންމެ ގިނަ ޕޮއިންޓް ލިބިގެން، އެންމެ ބޭނުންވެފައި ތިބީ ކޮން ބައެއްކަން އަޅުގަނޑުމެންނަށް ފާހަގަ ކުރެވޭ ގޮތައް އިވެލުއޭޓް ކޮށްގެން އެ ލިސްޓް އެކުލަވާލާނީ..
ފްލެޓް ލިބޭ ފަރާތްތަތައް ކަނޑައަޅަން ސަރުކާރުން ނިންމާފައިވާ ގޮތް ސާފުކޮށްދެއްވަމުން މިނިސްޓަރ ވިދާޅުވިއެވެ.
ޕެޓިޝަން ކޮމިޓީގައި ހަތަރު ހާސް ފްލެޓާ މެދު އަމަލު ކުރަން ޑރ. މުއިއްޒުގެ ސަރުކާރުން އަމަލު ކުރަން ވިސްނާފައި މި އޮތީ ކުރިން މިކަމުގައި އަމަލު ކުރައްވާނެ ކަމަށް މުއިއްޒު ވިދާޅުވި ގޮތާ މުޅިން ތަފާތު އެހެން ގޮތަކަށެވެ. މިއާއެކު، އަލުން ލިސްޓް އިވެލުއޭޓް ކޮށް ހަތަރުހާސް ފްލެޓް ލިބޭ މީހުން މި ސަރުކާރުން މުޅިން އަލަށް ކަނޑައަޅާ ގޮތައް މި އޮތީ ހަމަޖައްސާފައެވެ. އޭސީސީ އިން ހެދި ދިރާސާ އަކުން އަދި ފްލެޓްތަކާ ބެހޭ ގޮތުން ލަފާ ދިނުމަށް އުފެއްދި ކޮމިޓީ ތަކުން ކުރި މަސައްކަތުގެ ބޭނުމެއްވެސް މިހާރު އޮތް ކަމަކަށް ނުފެނެއެވެ.
