ހުޅުމާލޭގައި ބޮޑު އޮޕަރޭޝަނެއް ހިންގައި، ގަވައިދާ ހިލާފަށް މަސައްކަތް ކުރަމުންދިޔަ 22 ބިދޭސީން އަތުލައިގަނެފިއެވެ.

އިމިގްރޭޝަނުން ބުނީ ސޯޝަލްމީޑިއާގައި ކަންބޮޑުވުން ފާޅުކޮށް، ހިއްސާކޮށްފައިވާ މައުލޫމާތާއި ގުޅިގެން ހޮނިހިރު ދުވަހުގެ ރޭ ހުޅުމާލެއިން 3 ބުރީގެ އިމާރާތެއް ބަލައި ފާސްކޮށްފައިވާ ކަމަށެވެ. މިތަނުގައި ކާބޯތަކެތީގެ ވިޔަފާރިކޮށް، ގަވައިދާ ހިލާފަށް މަސައްކަތް ކުރަމުންދިޔަ 22 ބިދޭސީއަކު ވަނީ އިމިގްރޭޝަން ބެލުމުގެ ދަށަށް ގެނެސްފައިވާ ކަމަށެވެ.

މި ތަނަކީ ދިވެހި އަންހެނަކާ ކައިވެނިކޮށްގެން އުޅޭ ބިދޭސީ ފިރިހެނަކާ ގުޅުން އޮތް ތަނެއް ކަމަށެވެ.

މިއީ މިހާތަނަށް ހުޅުމާލޭގައި ހިންގުނު އެންމެ ބޮޑު އެއް އޮޕަރޭޝަން ކަމަށް އިމިގްރޭޝަނުން ބުނެއެވެ.

މި މައްސަލަ އިމިގްރޭޝަނުން ދަނީ އިތުރަށް ތަހުގީގު ކުރަމުންނެވެ.

ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ހޯމް މިނިސްޓްރީ، ފުލުހުން އަދި އިމިގްރޭޝަން ގުޅިގެން ދަނީ ޚާއްސަ އޮޕަރޭޝަންތައް ހިންގަމުންނެވެ. އަދި އާއްމު ރައްޔިތުންނަށް މައްސަލަ ހުށަހެޅޭ ގޮތަށް އިމިގްރޭޝަނުން ވަނީ "އިމިގްރޭޝަން ވޮޗް"ގެ ނަމުގައި ޚާއްސަ ޕޯޓަލެއް ވެސް ގާއިމްކޮށްފައެވެ. މިޕޯޓަލްއަށް ވެސް ގަވައިދާ ހިލާފަށް އުޅޭ ބިދޭސީންގެ މައްސަލައާއި ބޮޑެތި ވިޔަފާރިތައް ހިންގާ ބިދޭސީންގެ މައްސަލަތައް ހުށަހަޅާ ކަމަށް އިމިގްރޭޝަނުން މައުލޫމާތުދެއެވެ.

ސޯޝަލް މީޑިއާގައި ބިދޭސީން ކެއުމުގެ ޚިދުމަތް ދޭ ބައެއް ވީޑިއޯތައް ދަނީ އާއްމުވަމުންނެވެ. އެގޮތުން މިފަހުން ހުޅުމާލޭ ފޭސް-2 ގައި ބިދޭސީން ކެއުމުގެ ޚިދުމަތް ދޭ ތަނެއްގެ ވީޑިއޯ ވަނީ އާއްމުވެފައެވެ. އެ ވީޑިއޯއިން ފެންނަ ގޮތުގައި ކެއްކުމުގައި ގިނަ އަދަދެއްގެ ބިދޭސީން ހަރަކާތްތެރިވާއިރު، ސާފުތާހިރުކަން ކުޑަކަން ފާހަގަކުރެވެއެވެ. އަދި ކައްކާ ސަރަހައްދުގައި ބުޅާތަކެއް އުޅޭ މަންޒަރު ވެސް ފެނެއެވެ.