މިއަހަރުގެ ނިމި ދިޔަ ކުއަރޓާގައި ވިޔަފާރިތައް ދިޔައީ ދަށަށް ކަމަށާއި، ކުރިއަށް އޮތް ކުއަރޓާ ގައި ތަކެތީގެ އަގުތައް މައްޗަށް ދާނެ ކަމަށް ބެލޭ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ދިރާސާ އިން ހާމަވެއްޖެއެވެ.

މިކަން ހާމަވީ އަހަރުގެ ދެވަނަ ކުއަރޓާ އަށް ޚާއްސަ ކޮށްގެން އެމްއެމްއޭ އިން ހެދި "ކުއަރޓާލީ ބިޒްނަސް ސާވޭ" ގެ ނަތީޖާތަކުގެ މައްޗަށް އާންމު ކުރި ރިޕޯޓުންނެވެ.

އެމްއެމްއޭ އިން އާންމު ކޮށްފައިވާ ސާވޭ ރިޕޯޓުގައި ބުނެފައިވަނީ ވިޔަފާރި ތަކުގެ މާލީ ހާލަތު މިއަހަރުގެ ދެވަނަ ކުއަރޓާ ގައި ދިޔައީ ދަށަށް ކަމަށް ސާވޭ އިން ފެންނަ ކަމަށެވެ. އަދި ކުރިއަށް އޮތް ކުއަރޓާ ގައިވެސް ހޯލްސޭލް އަދި ރީޓޭލް ވިޔަފާރިތަކުގެ މާލީ ހާލަތު ދަށަށް ދާނެ ކަމަށް ބެލެވޭ ކަމުގައިވެސް ރިޕޯޓުގައި ބުނެފައިވެއެވެ.

ރިޕޯޓުން ހާމަވާ ގޮތުގައި ސާވޭ ކުރެވުނު ހުރިހާ ދާއިރާއެއްގައި ވެސް ވިޔަފާރީގެ ހާލަތު ވަނީ މިއަހަރުގެ ފުރަތަމަ ކުއަރޓާއާ އަޅާބަލާއިރު ހީނަރުވެފައެވެ.

ރާއްޖޭގެ އެންމެ ބޮޑު ސިނާއަތު ކަމުގައިވާ ފަތުރުވެރިކަމަށް ބަލާއިރު، މިއަހަރުގެ ދެވަނަ ކުއަރޓާ ގައި ފަތުރުވެރިކަމުގެ ވިޔަފާރި ފާހަގަ ކުރެވޭ މިންވަރަށް ދަށަށް ގޮސްފައިވާ ކަމަށް އެމްއެމްއޭ ގެ ރިޕޯޓުގައި ފާހަގަ ކޮށްފައިވެއެވެ.

އެމްއެމްއޭ ގެ ދިރާސާ އިން ހާމަވާ ގޮތުގައި 99 އިންސައްތަ ފަތުރުވެރިކަމުގެ ވިޔަފާރިތަކަށް ލިބުނު ޖުމްލަ އާމްދަނީ ވަރަށް ބޮޑުތަން ދަށަށް ދިޔައިރު، 97 އިންސައްތަ ވިޔަފާރިތަކުން ބުނެފައިވަނީ ބުކިންގ ވެސް ދެވަނަ ކުއަރޓާގައި ދިޔައީ ވަރަށް ބޮޑަށް ދަށަށް ކަމަށެވެ.

އަހަރުގެ ދެވަނަ ކުއަރޓާގައި ފަތުރުވެރިކަމުގެ ދާއިރާ އިން ވަޒީފާ ލިބުނު މިންވަރާއި އުޖޫރައިގެ ގޮތުގައި ލިބުނު މިންވަރުވެސް ދިޔައީ ދަށަށެވެ.

އެމްއެމްއޭ އިން ފާހަގަ ކުރާ ގޮތުގައި ދެވަނަ ކުއަރޓާގައި ވަޒީފާ އުފެދުނު މިންވަރު އެންމެ ބޮޑަށް ދަށަށް ގޮސްފައިވަނީ ވެސް ފަތުރުވެރިކަމުގެ ދާއިރާ އިންނެވެ. އަނެއްކޮޅުން މި މުއްދަތުގެ ތެރޭގައި ފަތުރުވެރިކަމުގެ ދާއިރާގެ 97 އިންސައްތަ ވިޔަފާރިތަކުން ބުނެފައިވަނީ ރޫމްރޭޓް ގެ ނިސްބަތް ވެސް ދެވަނަ ދަށަށް ގޮސްފައިވާ ކަމަށެވެ.

ފަތުރުވެރިކަމުގެ ވިޔަފާރި އަހަރުގެ ދެވަނަ ކުއަރޓާގައި ދަށަށް ގޮސްފައިވާއިރު، ކުރިއަށް އޮތް ކުއަރޓާގައި ރޫމް ރޭޓްތައް ދާނީ ދަށަށް ކަމަށް ވިޔަފާރިތަކުން ދެކޭ ކަމަށްވެސް އެމްއެމްއޭ ގެ ރިޕޯޓްގައި ވެއެވެ.

މި ސާވޭގައި ހުރިހާ ވިޔަފާރިތަކުން ވެސް ބުނެފައިވަނީ ކްރެޑިޓްގެ ގޮތުގައި ފައިސާ ހޯދަން ދަތިވެފައިވާ ކަމަށެވެ. އެމްއެމްއޭގެ ހޯދުންތަކުން އެނގޭ ގޮތުގައި ކުރިއަށް އޮތް ކުއަރޓާގައިވެސް ވިޔަފާރި ކުރުމަށް ކްރެޑިޓަށް ފައިސާ ހޯދުމަށް ދަތިވާނެއެވެ.

އެމްއެމްއޭ އިން ހަދާ ކުއަރޓާލީ ބިޒްނަސް ސާވޭ އަކީ އިގްތިސާދުގެ ހާލަތު އޮތް ގޮތް ދެނެގަތުމާއެކު ކައިރި ކުރިމަގުގައި އެކި ދާއިރާތަކުގެ ވިޔަފާރިއަށް އަންނާނެ ބަދަލު އަންދާޒާ ކުރުމުގެ ގޮތުން އަހަރަކު ހަތަރު ފަހަރު ކުރިއަށް ގެންދާ ސާވޭ އެކެވެ.

ސާވޭގައި އެމްއެމްއޭ އަށް މައުލޫމާތު ފޯރުކޮށްދެނީ ވިޔަފާރީގެ އެކި ދާއިރާތަކުގެ އިސް މަގާމުތައް އަދާ ކުރާ ފަރާތްތަކުން ކަމަށް އެމްއެމްއޭ އިން ބުނެފައިވެއެވެ.

އަހަރުގެ ދެވަނަ ކުއަރޓާގެ އިގްތިސާދީ ހާލަތު ދެނެގަތުމުގެ ސާވޭގެ މަސައްކަތް ޖޫން 25ން 11 ޖުލައި ގެ ނިޔަލަށް ކުރިއަށް ގެންދިޔައިރު، ފަތުރުވެރިކަމުގެ ދާއިރާ އާއި އިމާރާތް ކުރުމުގެ މަސައްކަތާއި، ހޯލްސޭލް އަދި ރީޓެއިލް ވިޔަފާރި ތަކަށާއި، ދަތުރުފަތުރާއި މުވާސަލަތީ ޚިދުމަތްދޭ 118 ވިޔަފާރިއަކުން މައުލޫމާތު ހޯދާފައިވާނޭ ކަމަށް އެމްއެމްއޭ އިން ބުނެފައިވެއެވެ.