އެމެރިކާގެ ގާނޫނު ހަދާ މަޖިލިހުގައި އިޒްރޭލުގެ ބޮޑު ވަޒީރު ނަތަންޔާހޫ ބުދަ ދުވަހު ދެއްވި ތަގުރީރާ ގުޅިގެން ސެނެޓަރ ބާނީ ސެންޑާސް ގެ ވަރުގަދަ ބަހުގެ ހަމަލާތަކެއް ނަތަންޔާހޫ އަށް ދީފިއެވެ.
އެމެރިކާގެ ސެނެޓްގައި މިނިވަން މެމްބަރެއްގެ ގޮތުގައި ވާރމޮންޓް ތަމްސީލް ކުރައްވާ ސެންޑާސް އެކްސް ގައި ކުރެއްވި ޕޯސްޓެއްގައި ފަލަސްތީނުގެ ހާލަތާ ބެހޭ ގޮތުން އެމެރިކާގެ ސެނެޓް ގައި ނަތަންޔާހޫ އިތުރުފުޅު ހައްދަވައިގެން ވާހަކަފުޅު ދައްކަވާފައިވާ ކަމަށް ލިޔުއްވާފައިވެއެވެ.
އިންސާނީ ހައްގުތަކަށް މަސައްކަތް ކުރާ ހުރިހާ ފަރާތަކުން އެއްބަސްވޭ، އެތައް ހާސް ތުއްތު ކުދިން ބަނޑަށް ޖެހިފައިވަނީ ނަތަންޔާހޫ ގެ ހައްދުފަހަނަ އެޅި ސަރުކާރުން އެހީ އަށް ހުރަސް އަޅާތީ ކަމަށް. އިޒްރޭލު މީހުންވެސް ބޭނުންވަނީ ނަތަންޔާހޫ އިސްތިއުފާ ދޭން، އެހެންވެ ކޮންގްރެސް އަށް ވަޑައިގަތީ ކެމްޕޭން ކުރައްވަންއެމެރިކާގެ ސެނެޓަރ ބާނީ ސެންޑާސް![]()
އެމެރިކާގެ ކޮންގްރެސްގައި ނަތަންޔާހޫ ދެއްކެވި ވާހަކަ ފުޅުގައި އޭނާގެ ހައްދުފަހަނަ އެޅި ސަރުކާރުން ގާޒާ ގައި ހިންގާމުންދާ ގަތުލުއާއްމު ވަރަށް ބޮޑަށް ދިފާއު ކުރައްވާފައިވެއެވެ. ނަތަންޔާހޫގެ ތަގުރީރަށް ކޮންގްރެސްގެ މެމްބަރުންގެ ތަރުހީބު ލިބިވަޑައިގަތަސް އިމާރާތުގެ ބޭރުގައި އެތައް ހާސް އާންމުން ގެންދިޔައީ ނަތަންޔާހޫ އާ ދެކޮޅަށް މުޒާހަރާ ކޮށް އެނާ އަކީ ހަނގުރާމައިގެ ކުށްވެރިއެއް ކަމަށް ގޮވަމުންނެވެ.
ޚާއްސަ ކޮށް އިންޓަރނޭޝަނަލް ކްރިމިނަލް ކޯޓުން، ހަނގުރާމައިގެ ޖަރީމާތައް ހިންގާފައިވާ ކަމުގެ ތުހުމަތުގައި ހައްޔަރު ކުރުމުގެ އަމުރެއް ނެރުމަށް މަސައްކަތް ކުރަމުންދާ ފަރާތަކުން އެމެރިކާގެ ޑިކޮކްރަސީގެ އެންމެ މުހިންމު އެއް މުއައްސަސާގައި ތަގުރީރު ކުރުމުގެ ފުރުސަތު ދިނުމުންވެސް މީހުން ވަނީ ރުޅި އައިސް ފާޑު ކިޔާފައެވެ.
ނަތަންޔާހޫ ދެއްވި ތަގުރީރުގައި ގާޒާގެ އިންސާނީ ހާލަތުގެ ވާހަކަ އަށް ބީރު ކަންފަތެއް ދެއްވުމަށް ފަހު، ގާޒާ އަށް ފޯރުކޮށްދޭ އެހީގެ ކަންކަމަށް ހުރަސް ނާޅާ ކަމަށް ވިދާޅުވިއެވެ. ނަތަންޔާހޫ ސެނެޓް އާއި ކޮންގްރެސްގެ ޖޮއިންޓް ސެޝަން ގައި ގޮވާލެއްވީ އިޒްރޭލަށް ފޮނުވަން ހުރި ހަތިޔާރު ފޮނުވުމުގެ ކަންކަން އަވަސް ކޮށްދެއްވުމަށެވެ.
ސެންޑާސް އަކީ ނަތަންޔާހޫގެ ތަގްރީރް ބޮއިކޮޓް ކުރެއްވި ސެނެޓްގެ މެމްބަރުންގެ ތެރޭގައި ހިމެނޭ މެމްބަރެކެވެ.
އަންގާރާ ދުވަހު ސެނެޓްގައި ސެންޑާސް ވަނީ ނަތަންޔާހޫގެ ސެޝަން ބޮއިކޮޓް ކުރައްވާ ސަބަބު ވިދާޅުވެފައެވެ. އޭނާ އެ ދުވަހު ސެނެޓް ތަޅުމުގައި ވިދާޅުވީ އިޒްރޭލުން ވަނީ ބައިނަލް އަގްވާމީ ގާނޫނުތަކަށާއި އެމެރިކާގެ ގާނޫނު ތަކުގެ މައްޗަށާއި އަދި އާންމު އިންސާނީ އަޚްލާގީ މިންގަނޑުތަކުގެ މައްޗަށް ފައިން އަރާފައި ކަމުގައެވެ. އެހެން ކަމުން ނަތަންޔާހޫ އަށް އެމެރިކާގެ ސެނެޓަށް ދައުވަތު ދީގެން ނުވާނެ ކަމަށް ވެސް ސެންޑާސް ވިދާޅުވިއެވެ.
ސޭންޑާސް ވިދާޅުވީ، ގާޒާ އިން ފެންނަނީ ފަހުގެ ތާރީޚްގައި ދުނިޔޭން ފެންނަ އެންމެ ބޮޑު އިންސާނީ ކާރިސާ ކަމަށާއި އެހާލަތައް ގާޒާ ދިއުމުގައި އެމެރިކާގެ ޓެކްސް ފައިސާ އާއި އެމެރިކާގެ ހަތިޔާރު އެހީވެދީފައިވާ ކަމުގައެވެ.
ނަތަންޔާހޫ އަކީ ކަނާތުފިޔައިގެ ހައްދުފަހަނަ އެޅި ފިކުރުގެ މީހެއް ކަމަށާއި، އެނާ އަކީ ހަނގުރާމައިގެ މުޖްރިމެއް ކަމަށާއި، މުޅި ހަޔާތް ހޭދަ ކޮށްފައިވަނީ ފަނާ ކުރުމަށާއި، އިޒްރޭލް އާއި ފަލަސްތީނު ދެ ދައުލަތެއްގެ ގޮތުގައި ގާއިމް ކުރުމަށް ކުރެވޭ އުއްމީދު ނައްތާލުމަށާއި ސުލްހައިގެ ދޮރު ބަންދު ކުރުމަށް ކަމަށް ސެންޑާސް ވިދާޅުވިއެވެ.