އޮލިމްޕިކްސް ފުޓްބޯޅަ މުބާރާތަށް ކުޅުންތެރިން ދޫކޮށްދިނުމަށް އެދި ފްރާންސްގެ ރައީސް އެމެނުއަލް މާކޮން ރެއާލް މެޑްރިޑްގެ ރައީސް ފްލޮރެންޓީނޯ ޕެރޭޒާ މަޝްވަރާކުރަން ނިންމައިފި އެވެ.
މި ދެ ރައީސް މަޝްވަރާކުރަން ނިންމީ ފްރާންސްގައި ޖުލައި 26ން އޮގަސްޓް 11ށް ބާއްވާ އޮލިމްޕިކްސް އަށް ރެއާލް މެޑްރިޑްގެ ކުޅުންތެރިން ދޫނުކުރާނެ ކަމަށް ބުނެ ރެއާލްއިން ފްރާންސްގެ ފުޓްބޯޅަ ފެޑަރޭޝަނަށް ސިޓީ ފޮނުމުންނެވެ.
ރެއާލްއިން ސަބަބެއްގެ ގޮތުގައި ދައްކަނީ މިއީ ޕްރީ ސީޒަން ދުވަސްވަރަށްވުމެވެ. ނަމަވެސް އެ ކުލަބާއެކު މަޝްވަރާކުރަން ފްރާންސުން ބޭނުންވީ އެ ގައުމުގެ މުހިންމު ކުޅުންތެރިންތަކެއް ރެއާލްގައި ތިބުމުންނެވެ. އޭގެ ތެރޭގައި ފާލެންޑް މެންޑީ އާއި އައުރެލިއަން ޗުއާމެނީ އަދި އެޑުއާޑޯ ހިމެނެ އެވެ. އަދި ހުސްވި ހަފުތާގައި ރެއާލް މެޑްރިޑަށް ސޮއިކުރި ފްރާންސްގެ ކެޕްޓަން ކީލިއަމް އެމްބާޕޭ އެވެ.
ޕެރިސް އޮލިމްޕިކްސްގައި ކުޅުމަކީ އެމްބާޕޭ ވެސް ބޭނުންވާ ކަމެކެވެ. ނަމަވެސް އޭނާ އަށް މިހާރު ޖެހިފައިވަނީ ރެއާލްއާއެކު ޕްރީ ސީޒަނަށް އެމެރިކާ އަށް ދާށެވެ.
![](https://dyncz33htw1ec.cloudfront.net/posts/2101dfa7-25d3-46e8-a59a-7fbe3974427a.png)
ފްރާންސްގައި ވާދަވެރި ޓީމެއް އެ މުބާރާތުގައި ބޭއްވުމަށް ކުރެވެންހުރި ހުރިހާ ކަމެއް އަހަރެން ކުރާނަން. އަހަރެންނަށް ޔަގީންކަން އެބައޮތް ޔޫރަޕުގެ ކުލަބުތަކުން މިކަމަށް އެއްބާރުލުން ދޭނެކަމަށް.ފްރާންސްގެ ރައީސް އެމެނުއަލް މާކޮން![]()
އޭނާ އިތުރަށް ވިދާޅުވީ އެމްބާޕޭ އޮލިމްޕިކްސްގައި ފްރާންސް ޓީމުގައި ކުޅޭތަން ދެކެން ބޭނުންވާ ކަމަށެވެ. އަދި ފްރާންސްގެ ޕީއެސްޖީ ދޫކޮށް ރެއާލްގައި އެމްބާޕޭ ކުޅޭތަން ދެކެން ބޭނުންނުވީ މިފަދަ އުނދަގޫތައް ދިމާވާނެތީ ކަމަށެވެ.
އަހަރެން އޭނާއާ މިކަމާ ބެހޭ ގޮތުން އަދި ވާހަކަ ނުދައްކަން. އެކަމަކު އަހަރެންނަށް ޔަގީން އޭނާގެ ކުލަބުން އޭނާ ދޫކޮށްދޭނެކަމަށް. އަހަރުމެންނަށް އޮލިމްޕިކްސް ވަރަށް މުހިންމު. ކުލަބުތަކުން އެއްބާރުލުން ދީފިނަމަ އަހަރުމެންގެ ޓީމު ވަރުގަދަވާނެ.ފްރާންސްގެ ރައީސް އެމެނުއަލް މާކޮން![]()
އޮލިމްޕިކްސް ކުޅިވަރު މުބާރާތުގައި ކުޅެން ބައެއް ކުޅުންތެރިން ބޭނުންވި ނަމަވެސް އެކަމަށް އޮތް ހުރަހަކީ ޔޫރޯގައި ކުޅެފައި، ދެވަނަ މުބާރާތެއް ކުޅޭނަމަ އަރާމުކުރާނެ ދުވަސް ނުލިބޭ މައްސަލަ އެވެ. މި މަހުގެ މެދުތެރޭގައި ނިމުނު ޔޫރޯއިން ފްރާންސް ކެޓީ ސެމީ ފައިނަލުގައި ސްޕޭން އަތުންނެވެ.