ސްޕޭނުގެ ގައުމީ ޓީމަށް ކުޅޭނެ ފަހު މުބާރާތަކީ މި ފަހަރުގެ ޔޫރޯ ފުޓްބޯޅަ މުބާރާތް ކަމަށާއި ދެން ސްޕޭނުގައި ވެސް ކުޅެން ބޭނުންނުވާ ކަމަށް ފޯވަޑް އަލްވާރޯ މޮރާޓާ ބުނެފި އެވެ.

މިރޭ ކުޅޭ މުބާރާތުގެ ސެމީ ފައިނަލް މެޗަށް މޮރާޓާ ވަނީ ސަސްޕެންޑްކޮށްފަ އެވެ. އެއީ ދެ ރީނދޫ ކާޑު ހަމަވެފައިވާތީ އެވެ. ސްޕޭނުގެ ކެޕްޓަންކަން ވެސް ކުރަމުން އަންނަ މޮރާޓާ އަށް ރީނދޫ ކާޑު ދެއްކީ ފުރަތަމަ 11ގައި ކުޅެން ނުކުތުމަށްފަހު ބަދަލުކޮށް، ބެންޗުގައި އިންދަ އެވެ.

އޭނާ ބުނީ ގައުމީ ޓީމަށް ކުޅެން ބޭނުންނުވަނީ ސްޕޭނުގައި އޭނާ އަށް އިހްތިރާމް ނެތުމުން ކަމަށެވެ. އަދި ސްޕޭން ނޫން ގައުމެއްގައި ކުޅެން ބޭނުންވަނީ އެހެން ގައުމެއްގައި ކުޅެން ފެށުމުން އޭނާ އަށް އުފާވެރިކަން އިހުސާސްކުރެވޭތީ ކަމަށެވެ.

ސްޕޭނުގެ ރެއާލް މެޑްރިޑާއި އިނގިރޭސިވިލާތުގެ ޗެލްސީ އާއި އިޓަލީގެ ޔުވެންޓަސްގައި ވެސް ކުޅުނު ފޯވަޑް މިހާރު ކުޅެމުން ދަނީ ސްޕޭނުގެ އެތްލެޓިކޯ މެޑްރިޑަށެވެ.

އޭނާގެ ވާހަކަތަކާ ބެހޭ ގޮތުން ސްޕޭނުގެ ކޯޗު ލުއިސް ޑެލަފުއެންޓޭ ބުނީ އެވާހަކަތަކަށް އެއްބަސްވެވޭ ކަމަށެވެ.

މޮރާޓާ ބުނީ ޖަރުމަނު މެޗަށް ފަހު އޭނާ ރުއީ ޓީމު ސެމީ ފައިނަލަށް ދިއުމުން އުފަލުން ކަމަށެވެ. ނަމަވެސް ސްޕޭނުގެ މީޑިއާތަކުން އޭނާ އަށް މަލާމާލްކުރީ ދެ ރީނދޫ ކާޑު ހަމަވުމުން ރުއީ ކަމަށް ބުނެ ކަމަށާއި މިފަދަ ކަންކަން ގަބޫލު ނުކުރެވޭނެ ކަމަށެވެ.