ވަގު ޓީޓީ ހަދައިގެން ބޭރުގެ ކުންފުނިތަކުން ވަގަށް ވިޔަފާރި ކުރި މައްސަލަ 2023 ވަނަ އަހަރު ފެންމަތިވި ހުސެއިން ޝިފާއު އަށް ރައީސުލް ޖުމްހޫރިއްޔާ ޑރ މުހައްމަދު މުއިއްޒު ސަރުކާރުގެ މަތީ މަގާމެއް ދެއްވުމަށްފަހު، އެވާހަކަ މީޑިއާގައި ތިލަވުމުން އޭނާ ވަޒީފާއިން ވަކި ކޮށްފިއެވެ.
ޑރ މުއިއްޒުގެ ސަރުކާރަކީ އަޑިނޭގޭ ގޮތައް ހިނގަމުންދާ ސަރުކާރަކަށް ވުމާއެކު، އޭނާ އަށް މަގާމު ދިން ތާރީޚެއް ސާފުވާ ގޮތެއް ނުވިއެވެ. ނަމަވެސް އޭނާ މަގާމުން ވަކި ކުރީ އޭނާ އަށް މަގާމު ދިން ވާހަކަ ބުރާސްފަތި ދުވަހު މީޑިއާގައި ފެންމަތިވުމުން ކަމަށް ބެލެވެއެވެ.
މައުލޫމާތު ލިބިފައިވާ ގޮތުގައި ޝިފާއު އަށް ދެއްވީ އެގްރިކަލްޗަރ މިނިސްޓްރީގެ ސީނިއަރ ޕޮލިޓިކަލް ޑިރެކްޓަރގެ މަގާމެވެ.
ޝިފާއު އަކީ ޑޮލަރު ހޯދައިދޭނެ ކަމަށް ބުނެ މީހުން އަތުން ފައިސާ ނަގައި މަކަރު ހެދުމަށް ފަހު ފިލައިގެން އުޅޭތީ 2021 ވަނަ އަހަރު ވެސް ފުލުހުން އޭނާ ހޯދަން އިއުލާން ނެރުނު މީހެކެވެ.
މަކަރު ހަދައިގެން ވަގު ވިޔަފާރި ހިންގާފައިވާ މައްސަލައިގައި 2023 ވަނަ އަހަރު ދިވެހި ފުލުހުން ޝިފާއު ހައްޔަރުކުރި ނަމަވެސް ކޯޓުން ބަންދުގެ މުއްދަތު އިތުރު ނުކުރުމުން، ދޫކޮށްލާފައި ހުއްޓާ ރާއްޖޭން ފިލައިގެން ދިއުމާއެކު އިންޓަރޕޯލް މެދުވެރިކޮށް އޭނާ ހޯދަން ރެޑް ނޯޓިސް ނެރެން ޖެހުނެވެ.
ސަރުކާރުގެ މަތީ މަގާމެއް ޝިފާއު އަށް ޑރ މުއިއްޒު ދެއްވީ މަކަރު ހީލަތް ހެދުމާއި، މަނީ ލޯންޑަރިން ގެ ދައުވާ ހިމެނޭ ގޮތުން ޝިފާއުގެ މައްޗަށް 23 ދައުވާ ކްރިމިނަލް ކޯޓަށް ފޮނުވާފައި ވަނިކޮށްނެވެ.
