ސިޔާސީ މަގާމުތަކަށް ބަދަލުތައް ގެންނަނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ބޭނުންފުޅުވާ ގޮތަށް ކަންކަން ފަސޭހަކުރެއްވުމަށް ކަމަށް ރައީސް އޮފީހުގެ ތަރުޖަމާން ހީނާ ވަލީދު ވިދާޅުވެއްޖެ އެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ކުއްލި އަކަށް ސިޔާސީ މަގާމުތަކަށް ބޮޑެތި ބަދަލުތަކެއް ގެންނަނީ ކީއްވެގެންތޯއާއި، ބައެއް އިދާރާތަކުގެ ބޭފުޅުން ވަކިކުރައްވާ ސަބަބާއި ގުޅޭގޮތުން ސުވާލު ކޮށްފައެވެ. އެސުވާލަށް ޖަވާބު ދެއްވަމުން ހީނާ ވިދާޅުވީ މި ނޫސްވެރިންގެ ބައްދަލުވުން ޚާއްސަވެފައިވަނީ ސިޑްސް ކޮންފަރެންސާ ގުޅޭގޮތުން ކަމަށެވެ. އެހެންކަމުން ސުވާލުތައް ވެސް އެ ދާއިރާއިން ކުރުމަށް ހީނާ އެދިވަޑައިގެންނެވިއެވެ.

ހީނާ ވިދާޅުވީ، އެހެނިހެން ކަންކަން ސާފުކޮށްދިނުމަށް އަންނަ ހަފްތާގައި ރައީސް އޮފީހުން ނޫސްވެރިންގެ ބައްދަލުވުން ބާއްވާނެ ކަމަށެވެ. އަދި ސަރުކާރު ހިންގުމުގައި ފަސޭހަވާނެ ގޮތަކަށް ކުންފުނިތަކާއި ވުޒާރާތަކުގެ ހިންގުމަށް ގެންނަންޖެހޭ ބަދަލުތައް ރައީސް ގެންނަވާނެކަމަށް ހީނާ ވިދާޅުވިއެވެ.

ސިޔާސީ ބޭފުޅުން މަގާމުތަކުން ވަކިކުރުމުންދާއިރު، އެކަމުގެ އެއްވެސް ސަބަބެއް ސަރުކާރުން މިހާތަނަށް ހާމަކޮށްފައިނުވެއެވެ.

އެގޮތުން 22 މެއި 2024 ގައި އެމްއެމްޕީއާރުސީގެ މެނޭޖިން ޑިރެކްޓަރުގެ މަގާމުގައި ހުންނެވި ފާތިމަތު ތައުފީގާއި އެޗްޑީސީގެ ޗެއާމަންގެ މަގާމުގައި ހުންނެވި އަހްމަދު ޒުހޫރު ވަނީ އެ މަގާމުން ވަކިކޮށްފައެވެ. އަދި މިފްކޯގެ ސީއީއޯ އަދި މެނޭޖިން ޑިރެކްޓަރުގެ މަގާމުން ވަކިކޮށް، އަހުމަދު ޝަމާހު ރަޝީދު ވަނީ ފިޝަރީޒް މިނިސްޓްރީގެ ސްޓޭޓް މިނިސްޓަރު ކަމަށް ބުދަ ދުވަހު އައްޔަންކޮށްފަ އެވެ. މީގެއިތުރުން އެމްއެމްޕީއާރްސީގެ ޗެއަރޕާސަން އާއިޝާ ނޫރައިން ޖަނާހު ވަނީ އެ މަގާމުން އިސްތިއުފާ ދެއްވާފައެވެ. އަދި ސަރުކާރުގެ ދެ ނައިބު ވަޒީރަކު ވަނީ ސަސްޕެންޑު ވެސް ކޮށްފައެވެ.