މިހާރު ފެށުމަށް ތައްޔާރުވަމުން އަންނަ ފުޓްބޯޅައިގެ އާ ސީޒަން ވެގެން ދާނީ ދުނިޔޭގެ ނިބަތުން ފުޓްބޯޅައިގެ ގިނަ ރެކޯޑް ތަކެއް މުގުރާލާނެ ސީޒަނަކަށް ކަމަށް މީޑިއާ ރިޕޯޓްތައް  ބުނެފިއެވެ.

މި ރިޕޯޓްތައް  ބުނާގޮތުން އެހެން ފަހަރުތަކާއި ޚިލާފަށް މިފަހަރުގެ ސީޒަންގައި ގިނަ އަދަދެއްގެ ރެކޯޑްތަކެއް ފެނިގެން ދާނެއެވެ. ބޮޑެތި ގިނަ ޚަރަދުތަކެއް ކުރެވިގެން ދިޔަ ޓްރާންސްފާ ބާޒާރަކީ ވެސް ރެކޯޑްތަކެއް ފެނިގެންދިޔަ ޓްރާންސްފާ ބާޒާރެކެވެ. އެގޮތުން ބާސެލޯނާއަށް ކުޅެމުން އައި ބްރެޒިލްގެ ފޯވާޑް ނޭމާ 222 މިލިއަން ޔޫރޯއަށް ފްރާންސްގެ ޗެމްޕިއަން ޕީއެސްޖީއަށް ބަދަލުވި ބަދަލުވުން ފާހަގަ ކޮށްލަން ޖެހެއެވެ.

މީ އަދި މިހާތަނަށް ފުޓްބޯޅަ ޓްރާންސްފާގައި ހަދާފައިވާ އެންމެ ބޮޑު ރެކޯޑްއެވެ. އެހެން ނަމަވެސް ރިޕޯޓްތައް ބުނާގޮތުން ކުރިޔަށް އޮތް ތަނުގައި މިޔައްވުރެ ވެސް ބޮޑެތި ރެކޯޑްތަކެއް އަދި ފެނުން ގާތެވެ.

 އެގޮތުން ގޯލް އިން އާންމު ކޮށްފައިވާ ރިޕޯޓަކަށް ނަޒަރުހިންގާލާއިރު މިފަހަރުގެ ސީޒަންގައި ރެކޯޑްތައް ހަދާނެ ކަމަށް ބޮޑަށް ބެލެވިފައިވާ ފަރާތް ތަކަކީ މެސީ، ރޮނާލްޑޯ ފަދަ ހައި ޕްރޮފައިލް ފަރާތްތަކެވެ.

އެގޮތުން ކުރިޔަށް އޮތްތަނުގައި އިތުރު ރެކޯޑްތައް ހަދާނެ ކަމަށް ގޯލް އިން ފާހަގަ ކޮށްފައިވާ ބައެއް ރެކޯޑް ތަކަކީ :

ޕްރިމިއާ ލީގުގެ އެންމެ ގިނަ މެޗުގައި ކޯޗު ކޮށްދިނުމުގެ ރެކޯޑް:

އާސެން ވެންގާ އަކީ އާސެނަލްގެ އެންމެ ދުވަސްވީ އެޓީމުގެ ހެޑް ކޯޗެވެ. އެހެން ނަމަވެސް ރިޕޯޓްތައް ބުނާގޮތުން ވެންގާ މިހާރު ގުނަމުން ދަނީ އާސެނަލްގެ ކޯޗިން ކެރިއަރުގެ އެންމެ ފަހު ދުވަސްތަކެވެ. އެހެން ނަމަވެސް އެއް ޓީމަކަށް އެންމެ ގިނަ ދުވަހު އަދި އެންމެ ގިނަ މެޗު މެނޭޖް ކުރި ކޯޗުގެ ޝަރަފް އޭނާއަށް ލިބިގެންދާނެއެވެ.

ޕްރިމިއާ ލީގުގެ އެންމެ ގިނަ މެޗު ކުޅުމުގެ ރެކޯޑް:

ރިޕޯތްތައް  ބުނާގޮތުން ގެރެތް ބެރީއަކީވެސް ކުރިޔަށް އޮތް ތަނުގައި ރެކޯޑެއް ގާއިމް ކުރާނެ ކުޅުންތެރިއެކެވެ. އެވަޓަންއަށް ކުޅެމުންއަންނަ އުމުރުން މިހާރު 36 އަހަރުގެ ގެރެތް ބެރީ އަކީ މިވަގުތު ޕްރިމިއާ ލީގުގެ ރެކޯޑް އޮތް ރަޔާން ގިގްސްއާ އެންމެ ކައިރިން ވާދަކުރަމުން އަންނަ ކުޅުންތެރިއާއެވެ. އެގޮތުން އޭނާ މިފަހަރުގެ ސީޒަންގައި 4 މެޗު ކުޅުމުން ގިގްސްގެ ރެކޯޑާ އަރާ ހަމަވާނެއެވެ. މިވަގުތު މި ރެކޯޑް އޮތް ގިގްސް 632 މެޗު ކުޅެފައިވާއިރު ބެރީ ވަނީ 628 މެޗު މިހާރުވެސް ކުޅެފައެވެ. އެގޮތުން ޕްރިމިއާ ލީގުގެ އެންމެ ގިނަ މެޗު ކުޅުމުގެ ރެކޯޑް އޭނާ ހާސިލް ކުރާނެ ކަމަށް ވަނީ ބެލެވިފައެވެ.

ޕްރިމިއާ ލީގުގެ އެއް ސީޒަނެއްގައި އެންމެ ގިނަ ލަނޑު ޖެހުމުގެ ރެކޯޑް:

އެއް ސީޒަނެއްގައި އެންމެ ގިނަ ގޯލް ޖެހި ކުޅުންތެރިޔާގެ ރެކޯޑް އަދި ވެސް އޮތީ އެލެން ޝިއެރާ އަތުގައެވެ. ކޭން ބުނާގޮތުން އޭނާވެސް ނިމިގެން ދިޔަ ސީޒަނުގައި އަނިޔާއާ ކުރިމަތިލާން ނުޖެހުނު ނަމަ އެ ސީޒަނުގައި އެ ރެކޯޑް މުގުރާލެވޭނެއެވެ. އެގޮތުން އެލެން ޝިއެރާ ވަނީ އެއް ސީޒަނުގައި ކުޅުނު 38 މެޗުގައި 31 ގޯލް ޖަހައިގެން ރެކޯޑް ގާއިމް ކޮށްފައެވެ. ހެެރީ ކޭން ވަނީ ނިމިގެން ދިޔަ ސީޒަނުގައި ކުޅުނު 30 މެޗުގައި 29 ގޯލް ޖަހާ މިރެކޯޑާ ގާތް ކޮށްފައެވެ. އެހެން ކަމުން މިފަހަރުގެ ސީޒަންގައި އެލެން ޝިއެރާގެ ރެކޯޑް ޖެރީކޭން ނިމުކަމަށް ގެންނާނެ ކަމުގައި ބެލެވެއެވެ.

ޕްރިމިއާ ލީގުގައި އެއް ސީޒަނެއްގައި އެންމެ ގިނަ އެސިސްޓް ހެދުމުގެ ރެކޯޑް:

މިހާތަނަށް އެއް ސީޒަނެއްގައި އެންމެ ގިނަ އެސިސްޓް ހަދާފައިވާ ކުޅުންތެރިޔާގެ ރެކޯޑް އޮތީ އާސެނަލްގެ ކުރީގެ ލެޖެންޑް ތިއެރީ އޮންރީއަތުގައެވެ. އޭނާ ވަނީ އެއް ސީޒަނުގައި 20 އެސިސްޓް ހަދައިގެން މި ރެކޯޑް ހާސިލް ކޮށްފައެވެ. އެހެން ނަމަވެސް މި ރެކޯޑް މުގުރާލުމާ ވަރަށް ގާތަށް ވަނީ ގޮސްފައެވެ. އެގޮތުން ކެވިން ޑެބްރެއިނާ ، މެސުޓް އޮޒިލް އަދި ފަބްރިގާސް ވަނީ މި ރެކޯޑް މުގުރާލުމާއި ގާތަށް ޖެހިލާފައެވެ. އެގޮތުން އެންމެ އަވަހަށް މި ރެކޯޑް މުގުރާލާނެ ކަމަށް ބޮޑަށް ބެލެވެނީ ކެވިން ޑެބްރެއިނާއެވެ. އޭނާ ވަނީ ނިމިގެން ދިޔަ ސީޒަނުގައި 36 މެޗުގައި 18 އެސިސްޓް ހަދާފައެވެ. އެހެން ކަމުން މިފަހަރުގެ ސީޒަންގައި މި ރެކޯޑް އޭނާ މުގުރާލާނެ ކަމަށް ވަނީ ބެލެވިފައެވެ.