ސްލޮވާކިޔާގެ ބޮޑުވަޒީރު ރޮބަޓް ފިކޯ އަށް ހަމާލާދީ ޒަޚަމް ކޮށްލައިފިއެވެ.
ސްލޮވާކިޔާ ސަރުކާރުން މި ހަމަލާ ދެކެނީ އެމަނިކުފާނު އަވަހާރަކޮށްލަން ދިން ހަމަލާއެއްގެ ގޮތުގައެވެ.
އެމަނިކުފާނުގެ ހާލުކޮޅު ސީރިއަސް ކަމަށް ސްލޮވާކިޔާގެ ސަރުކާރުން ވަނީ ހާމަކޮށްފައެވެ.
ބީބީސީން ބުނެފައިވާ ގޮތުގައި ބޮޑުވަޒީރުގެ ހަށިކޮޅަށް އަމާޒުކޮށް ބަޑިން އެތައް ވަޒަނެއް ފޮނުވާލާފައިވާ ކަމަށާއި އެމަނިކުފާނުގެ ބަނޑުފުޅަށާއި، އަތްފުޅަށް އަދި ފައިންޕުޅަށްވެސް ވަޒަން އަރާފައިވާ ކަމަށެވެ.
ހޮސްޕިޓަލަށް ގެންދެވުނު އިރު ހޭފުޅު ހުރިކަމަށާއި ޒަޚަމްތަކަށް ފަރުވާދެމުން އަންނަ ކަމަށް ހޮސްޕިޓަލުން ބުނެފައިވެއެވެ.
ރޮއިޓަރސް އިން ހާމަކޮށްފައިވާ ގޮތުގައި ބަޑީގެ ހަމަލާ ބޮޑުވަޒީރަށް އަމާޒުވީ ބުދަ ދުވަހު ވެރިރަށް ބްރަޓިސްލާވާގެ އިރު އުތުރުން އޮންނަ ހެންޑްލޯވާއަށް ބޮޑުވަޒީރު ކުރައްވަމުން ގެންދަވާ ދަތުރުފުޅުގައި، ބައްދަލުވުމެއް ނިންމާލެއްވުމަށްފަހު ނުކުމެވަޑައިގެން ތަނުންނެވެ.
މަންޒަރުދުށް މީހުން ރޮއިޓަރސް އަށް ކިޔައިދީފައިވާ ގޮތުގައި އެ ސަރަހައްދުން އެކަކު ވަނީ ފުލުހުން ހައްޔަރުކޮށްގެން ގެންގޮސްފައެވެ.
ސްލޮވާކިޔާގެ ސަރުކާރުންވެސް ބުނެފައިވަނީ ހަމަލާ ދިން މީހާ ހައްޔަރުކޮށްފައިވާ ކަމަށެވެ.
