މިވަގުތު ޔޫރަޕުގައި ހުރި އެންމެ ޑިމާންޑް ބޮޑު ކޯޗު ޒަބީ އަލޮންސޯ އަންނަ ސީޒަނުގައި ހުންނާނީ ބަޔާން ލެވަކޫސްގައި ކަމުގައި ނިންމައިިފި އެވެ.
ސްޕޭނުގެ ކޯޗު މި ގޮތަށް ނިންމީ އޭނާ ހޯދުމަށް ޖަރުމަނުގެ ބަޔާން ލެވަކޫސަން އާއި އިނގިރޭސިވިލާތުގެ ލިވަޕޫލުން ވަރަށް ބޮޑަށް މަސައްކަތް ކުރަމުންދަނިކޮށެވެ.
އަހަރެން ވަނީ މެނޭޖްމަންޓާއެކު ވަރަށް ރަނގަޅު ބައްދަލުވުމެއް ބާއްވާފައި. އަހަރެން ހުންނާނީ ލެވަކޫސަންގައި. އަހަރެންގެ ކުރިމަގާމެދު ވަރަށް ގިނަ ގޮތްގޮތަށް ވާހަކަ ދެކެވެމުންދާތީވެ އަހަރެން ބޭނުންވީ އެކަމަށް ގޮތެއް ނިންމަން. މިހާރު އެންމަނަށް ވެސް އެކަން ސާފުވާނެ. އަހަރެންނަކީ އަދި ވަރަށް ޒުވާން ކޯޗެއް. އަހަރެން އަދި އަވަސް އަރުވާލައިގެން ނިންމުންތަކެއް ނިންމާކަށްނުވޭ. އަހަރެން މިހުރީ އެންމެ ރަނގަޅު ތަނުގައި،"އަލޮންސޯ ބުންޏެވެ.
އޭނާ ބުނީ ލެވަކޫސަންގައި އޭނާ ކުރަމުން އަންނަ މަސައްކަތް ނުނިމޭ ކަމަށާއި އޭނާ ބޭނުންވަނީ ޓީމަށް އެހީތެރިވެދީ މިހާރު ޓީމުގައި ތިބި ކުޅުންތެރިން އިތުރަށް ކުރިއަރުވަން ކަމަށެވެ.
އަލޮންސޯ ބުނީ ލިވަޕޫލާއި ބަޔާން މިއުނިކަކީ އޭނާއާ ގުޅުން އޮތް އަދި ވަރުގަދަ ދެ ކުލަބު ކަމަށާއި އެ ދެކުލަބުން އޭނާ އަށް ޝައުގުވެރިވުމުން އުފާކުރާ ކަމަށެވެ.
ލިވަޕޫލާއި ބަޔާންއާ ބެހޭ ގޮތުން ކޮމެންޓް ކުރާކަށް ބޭނުމެއްނޫން. އެއީ އަހަރެންނާ ގުޅުން އޮރތް ދެ ކުލަބު. އެ ދެކުލަބުގެ ސަޕޯޓަރުންނާއި އަހަރެންނާ ވަނީ ގުޅިފައި. އަހަރެން މިވަގުތު އަހަރެންގެ ކުރިމަގުގެ މިސްރާބު ބަދަލުކޮށްލާކަށް ބޭނުމެއްނޫން،"އަލޮންސޯ ބުންޏެވެ.
ބަޔާން އާއި ލިވަޕޫލް އަދި ރެއާލް މެޑްރިޑަށް ވެސް ކުޅުނު އަލޮންސޯ އަކީ ޔާގެން ކްލޮޕް މި ސީޒަނަށް ފަހު ވަކިވުމުން ލިވަޕޫލުން އެ ޓީމަށް ގެންނަން އެންމެ ބޭނުންވި ކޯޗެވެ. އަދި ބަޔާން މިއުނިކްގެ ކޯޗުކަމުން ތޯމަސް ޓުކެލް ވަކިވުމުން އެ ޓީމުގެ ވެސް އެއްވަނަ ހޮވުމަކީ އޭނާ އެވެ. ނަމަވެސް ލެވަކޫސަންގައި މަޑުކުރަން އޭނާ ނިންމުމުން ލިވަޕޫލްގެ މިހާރުގެ ކޯޗު ކްލޮޕް ވަނީ އެ ނިންމުމާދު ވާހަކަ ދައްކައިފަ އެވެ.
އޭނާ އެ ދަނީ ލެވަކޫސަންގައި ވަރަށް ރަނގަޅު މަސައްކަތްތަކެއް ކުރަމުން. އެމީހުންގެ އޮތީ މޮޅު ޓީމެއް. އެޓީމު އެކުގައި ގެންގުޅުން މުހިންމު. އަހަރެންނަށް ގަބޫލުކުރެވޭ އޭނާގެ ނިންމުން. އޭނާ އެކަން ކުރަން ބޭނުންވާނެކަން. ދެން އެކަމާމެދު އަހަރެން ބުނާނެ އެއްޗެއްނެތް،"ކްލޮޕް ބުންޏެވެ.
ޖަރުމަނުގެ ރިޕޯޓްތައް ބުނަނީ އަލޮންސޯގެ ނިންމުގައި ޖަރުމަނުގެ ކުރީގެ ނުފޫޒުގަދަ ތަރިންގެ ވިސްނުން ހިމެނޭ ކަމަށެވެ.
