ބާސެލޯނާގެ ޑިފެންސްލައިނުގައި މޮޅު ކުޅުމެއް ދައްކަމުން އަންނަ ޓީންއޭޖް ޑިފެންޑަރު ޕައު ސުބާޝީ ސްޕޭނުގެ ގައުމީ ޓީމަށް ނެގި ނަމަވެސް އޭނާ އަށް ގިނަ މެޗުތަކެއްދީ ކުޅުވަން ބޭނުންނުވާ ކަމަށް ކޯޗު ޒަވީ ހަނާންޑޭޒް ބުނެފި އެވެ.

އުމުރުން 17 އަހަރުގެ ކުޅުންތެރިޔާ ލައްވައި ބާސެލޯނާއިން ފުރަތަމަ ޓީމުގައި ޒަވީ ކުޅުވަން ފެށީ ސީނިއާ ޓީމުގެ ގިނަ ކުޅުންތެރިންތަކަކަށް އަނިޔާވުމުން އެނޫން ގޮތެއް ނެތިގެންނެވެ. ނަމަވެސް އޭނާ ދައްކަމުން އަންނަ މޮޅު ކުޅުމާއެކު މިހާރު ގިނަ ބައެއްގެ ލޮލުގައިވަނީ އަޅައިގެންފަ އެވެ. މި ގޮތުން އޭނާ ގައުމީ ޓީމަށް ނެގުމުގެ ދެ ދުވަސް ކުރިން ވަނީ ޗެމްޕިއަންސް ލީގުގައި އިޓަލީގެ ނަޕޯލީ އަތުން ބާސެލޯނާ 3-1އިން މޮޅުވި މެޗުގެ މޮޅު ކުޅުންތެރިޔާގެ މަގާމު ވެސް ހޯދައިފަ އެވެ.

ސްޕޭނުގެ ގައުމީ ކޯޗު ޑެލަ ފުއެންޓޭ ބުނީ ޒުވާން ޑިފެންޑަރު ގައުމީ ޓީމަށް ގެނައީ އޭނާ އަށް އެކަން ހައްގުވާތީ ކަމަށެވެ.

ނަމަވެސް ބާސެލޯނާގެ ކޯޗު ޒަވީ ބުނީ ޒުވާން އުމުރުގައި ޕެޑްރީ އާއި ގަވީ ލައްވައި ގާތްގާތުގައި ގިނަ އަދަދެއްގެ މެޗުތައް ކުޅުވުމުން ދެ ކުޅުންތެރިން ވެސް ދިގު މުއްދަތަކަށް ކުޅުމާ ދުރަށް ދާން ޖެހުނު ކަމަށެވެ. އެއީ ލޯޑު ބޮޑުވެގެން ދިމާވި އަނިޔާތަކެއް ކަމަށާއި އެފަދަ ގޮތެއް ސުބާޝީއަށްވެސް އޭނާގެ ކެރިއަރަށް ނޭދެވޭ އަސަރު ކުރާތަން ދެކެން ބޭނުންނުވާ ކަމަށެވެ.

ސުބާޝީ ލައްވައި ގައުމީ ކޯޗު ވަނީ މިދިޔަ ހަފުތާގައި އެކުވެރިކަމުގެ ދެ މެޗުގައި ވެސް ކޮންމެވެސް ވަރަކަށް ކުޅުވާފަ އެވެ.