ބަޔާން މިއުނިކުން އެކުލަބުގެ ކޯޗަކަށް ގެންނަން ބޭނުންވާ ޒަބީ އަލޮންސޯއާއެކު މަޝްވަރާތައް ފަށައިފި އެވެ.
ޖަރުމަނުގެ މީޑިއާތަކުން ބުނާ ގޮތުގައި ބަޔާން ލެވަކޫސަންގެ ކޯޗުގެ އެޖެންޓާއެކު ބަޔާންގެ އިސްވެރިން މަޝްވަރާތައް ފެށި ނަމަވެސް މިވާހަކަތައް އަދި އުޅެނީ އަލަތު މަރުހަލާގައި ކަމަށެވެ.
ޖަރުމަނުގެ ލީގުގެ އެއްވަނާގައި 10 ޕޮއިންޓުގެ ފަރަގަކާއެކު އޮތް ލެވަކޫސަންގެ ކޯޗުކަމުން ޒަވީ އަލޮންސޯ އެހެން ކުލަބަކަށް ގެންދާނަމަ ބަދަލުދޭން ޖެހޭނެ އެވެ. މި ގޮތުން މި އަދަދު 12 މިލިއަނާއި 21 މިލިއަނާ ދެމެދުގެ އަގެއްގައި ހުންނާނެ ކަމަށް ވަނީ ލަފާކޮށްފަ އެވެ.
ކުރިން ބަޔާން އަށް ވެސް ކުޅުނު އަލޮންސޯ އަކީ މި ސީޒަނަށް ފަހު އެންމެ ޑިމާންޑް ބޮޑުވާނެ ކޯޗެވެ. އޭނާ އަށް ލިވަޕޫލުން ޝައުގުވެރިވެ އެވެ. އަދި ބަޔާން އާއި ލިވަޕޫލްގެ ޝޮޕިން ލިސްޓުގެ އެއްވަނާގައިވަނީ ވެސް އޭނާ އެވެ. އަލޮންސޯ އަކީ މި ދެ ކުލަބަށް ވެސް ކުޅެފައިވާ ދެ ކުލަބުގެ ވެސް ލެޖެންޑެކެވެ.
