ވިދިވިދިގެން ތިންވަނަ ފަހަރަށް އުރީދޫ އިން ދިވެހި ޕްރިމިއާ ލީގު ސްޕޮންސާ ކޮށްފި އެވެ.

ހުކުރު ދުވަހު ފެށުމަށް ހަމަޖެހިފައިވާ ދިވެހި ޕްރިމިއާ ލީގުގެ ސްޕޮންސާޝިޕް އެއްބަސްވުމުގައި އުރީދޫގެ ފަރާތުން ސީއީއޯ ނަޖީބް ޚާން ސޮއިކުރެއްވިއިރު، އެފްއޭއެމްގެ ފަރާތުން ސޮއިކުރެއްވީ ރައީސް ބައްސާމް އަދީލް ޖަލީލެވެ.

އެއްބަސްވުމުގައި ސޮއި ކުރެއްވުމަށްފަހު ނަޖީބް ޚާން ވިދާޅުވީ، މި އެއްބަސްވުމުގެ ދަށުން ދިވެހި ފުޓުބޯޅަ އިތުރު ހަރުފަތަކަށް ގެންދިޔުމަށް ރާއްޖޭގެ ކުޅުންތެރިންނަށް، ރާއްޖެ އާއި ރާއްޖެއިން ބޭރުގައި ކުރިއެރުން ހޯދުމުގެ ދޮރު ހުޅުވިގެންދާނެ ކަމަށް އުންމީދު ކުރައްވާ ކަމަށެވެ.

އެފްއޭއެމްގެ ރައީސް ބައްސާމް އަދީލް ޖަލީލު ވިދާޅުވީ، ފުޓުބޯޅަ ތަރައްގީ ކުރުމަށް އަބަދުވެސް އުރީދޫ އިން ކުރާ ބުރަ މަސައްކަތަށް ޝުކުރު އަދާކުރާ ކަމަށާއި، ކުރިޔަށް އޮތް ދިވެހި ޕްރިމިއާ ލީގު އުރީދޫއާ އެކު ވަރަށް ފުރިހަމަކޮށް ގެނެވޭނެ ކަމަށެވެ.

އެގޮތުން ބައްސާމް ވިދާޅުވީ، މިފަހަރު ދިވެހި ޕްރިމިއާ ލީގުން ރާއްޖޭގެ އެކި ހިސާބުތަކުގެ ޓީމުތައް ފެނިގެންދާނެ ކަމަށާއި، މިއީ އެ ރަށްރަށުގެ ކުޅުންތެރިންނަށްވެސް ހުނަރު ދައްކާލަން ލިބޭ ރަނުގެ ފުރުސަތެއް ކަމަށެވެ.

އުރީދޫ ދިވެހި ޕްރިމިއާ ލީގު ހުޅުވާ މެޗު ބޭއްވުމަށް ހަމަޖެހިފައިވަނީ އަންނަ ހުކުރު ދުވަހު އެވެ. އުރީދޫ ދިވެހި ޕްރިމިއާ ލީގު ފަށާނީ މާޒިޔާ ސްޕޯޓްސް އެންޑް ރެކްރިއޭޝަން އަދި ދ.ކުޑަހުވަދޫ ބައްދަލުކުރާ މެޗުންނެވެ.

މި ފަހަރުގެ ދިވެހި ޕްރިމިއާ ލީގުގައި ވާދަކުރަނީ މާޒިޔާ ސްޕޯޓްސް އެންޑް ރެކްރިއޭޝަން، ނިއުރޭޑިއަންޓް ސްޕޯޓްސް ކްލަބް، ޓީސީ ސްޕޯޓްސް ކްލަބް، ގްރީން ސްޓްރީޓް، ދ.ކުޑަހުވަދޫ، ގދ.ތިނަދޫ، ނ.މިލަންދޫ އަދި އއ.މާޅޮހެވެ.