ދ. އަތޮޅުގައި ހިންގާ ކަނޑިންމަ ރިސޯޓުގެ ފުއްޓަރުން ފެނުނު 9 ފޫޓް ހުރި ކިނބޫ ދޫކޮށްލައިފިއެވެ.

އެމްއެންޑީއެފުން ބުނީ ބުރާސްފަތި ދުވަހު އެ ކިނބޫ ދޫކޮށްލާފައިވަނީ އޮޔާ ވައި ހުރި ގޮތް ބެލުމަށްފަހު ރާއްޖެއަށް އޭތި އަނބުރާ އައުމުގެ ފުރުސަތު ކުޑަވާގޮތަށް، ބޭރު ކަނޑަށް ކަމަށެވެ.

މި ކިނބޫ ފެނިގެން ދ. ކުޑަހުވަދޫ ޕޮލިސް ސްޓޭޝަނުން ސިފައިންނަށް ރިޕޯޓުކޮށްފައިވަނީ މިމަހުގެ 24ވީ ބުދަ ދުވަހުގެ ހަވީރު 4:08 ހާއިރުއެވެ.

އެ ރިޕޯޓު ލިބުމުން އެމްއެންޑީއެފް ކޯސްޓްގާޑް ތަރޑް ސްކޮޑްރަންގެ ސިފައިން ހާބަ ކްރާފްޓްގައި އެ ސަރަހަށްދަށް ގޮސް އެ ކިނބޫ ހިފައި ސިފައިންގެ ބެލުމުގެ ދަށަށް ގެންދިޔައެވެ.

ރާއްޖޭގެ އެކި ސަރަހައްދުތަކުން މަދު މަދުން ނަމަވެސް ކިނބޫ ފެނެއެވެ.