ސްޕެނިޝް ސުޕަކަޕްގައި މިރޭ ބާސެލޯނާއާ ދެކޮޅަށް ނުކުންނާނީ ބަދަލު ހިފުމުގެ ރޫހުގައި ނޫން ކަމަށް ރެއާލް މެޑްރިޑުގެ ކޯޗު ކާލޯ އެންޗެލޯޓީ ބުނެފި އެވެ.
އޭނާ ބުނީ ބާސެލޯނާ އަކީ ރެއާލްގެ އެންމެ ބޮޑު ވާދަވެރިޔާ ނަމަވެސް މިރޭގެ ފައިނަލަށް ނުކުންނައިރު މިދިޔަ އަހަރުގެ ފައިނަލްގައި ބަލިވި ނަމަވެސް ބަދަލު ހިފަންޖެހޭ ކަމެއް ނެތް ކަމަށެވެ.
"އަހަރުމެން ކުޅޭނީ މޮޅުވާނެ. އިދިކޮޅު ޓީމު އޮތް ސިޓުއޭޝަނެއް މުހިންމެއްނޫން. ބާސެލޯނާ އަކީ ވަރުގަދަ ޓީމެއްގެ ގޮތުގައި އަހަރެން ދެކެނީ،"އެންޗެލޯޓީ ބުންޏެވެ.
އޭނާ ބުނީ ބާސެލޯނާގެ ކޯޗު ޒަވީ ހަނާންޑޭޒްގެ މަގާމާމެދު އާއްމުންނާއި ނޫސްވެރިން ސުވާލު އުފެއްދި ނަމަވެސް އޭނާ ކުރަމުންދަނީ ރަނގަޅު މަސައްކަތްތަކެއް ކަމަށެވެ.
"އަހަރެން ފަދަ ތަޖުރިބާކާރު މީހަކަށް އޭނާ ނުވެދާނެ. އެކަމަކު އޭނާ ކުރަނީ ރަނގަޅު މަސައްކަތްތަކެއް. އެކަމަކު ކުޅުމާއި ކޯޗުކަމަކީ ތަފާތު ދެ މަސައްކަތެއް. އަހަރެން ފަދަ ތަޖުރިބާހުރި މީހަކަށް އޭނާ ނުވެދާނެ. މިއީ ކޮންމެ މީހަކު ކޯޗިން ފަށައިގަންނައިރު ދިމާވާނެ ކަމެއް. ތަޖުރިބާއެއް ނުހުންނާނެ،"އެންޗެލޯޓީ ބުންޏެވެ.
އިޓަލީގެ އޭސީ މިލާނާއި އިނގިރޭސިވިލާތުގެ ޗެލްސީ އަދި ޖަރުމަނުގެ ބަޔާން މިއުނިކާއި ފްރާންސްގެ ޕީއެސްޖީ އަށް ވެސް ކާމިޔާބު ހޯދައިދިން އެންޗެލޯޓީ ބުނީ ވަގުތުދީފިނަމަ ޒަވީ އަކީ މޮޅު ކޯޗަކަށްވުން ގާތް ކަމަށެވެ.
"އެކަމަކު އޭނާ ކާމިޔާބު ކޯޗަކަށްވުން ގާތް. އޭނާ އަކީ ދުނިޔެ ދުށް އެންމެ މޮޅު އެއް މިޑްފީލްޑަރު. މިހެންވީމާ އޭނާ އަށް ކޯޗިންގައި ފަސޭހަތަކެއް ހުންނާނެ،"އެންޗެލޯޓީ ބުންޏެވެ.
އޭނާ ބުނީ ރެއާލް އޮތީ ތަށި ހޯދަން ވަރަށް ރަނގަޅު ރޫހެއްގައި ކަމަށާއި މެޗު ކާމިޔާބު ކުރެވޭނެ ކަމުގެ އުއްމީދު ބޮޑު ކަމަށެވެ.
