މާލެސިޓީއަށް މިފަހުން ކުރި ވިއްސާރާގައި ގެއްލުންވި ގެތަކުގެ ހާލަތު ދެނެގަތުމަށް އެސެސްމަންޓްތައް ހަދަމުންދާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.

އެންޑީއެމްއޭއިން ބުނީ މާލެއަށް ކުރި ވިއްސާރައިގައި 75 ގެއަކަށް ލިބިފައިވާ ގެންލުންތައް ވަޒަންކުރުމަށް އެސެސްމަންޓް ޓީމުތަކުން މަސައްކަތް ކުރަމުންދާ ކަމަށެވެ. އެގޮތުން މާލޭއަށް ކުރި ވިއްސާރައިގައި ފެންބޮޑުވުމުގެ ސަބަބުން ގެއްްލުން ލިބުނު 75 ގޭގެ ތެރެއިން، 40 ގެއެއްގެ އެސެސްމަންޓް ނިމިފައިވާ ކަމަށް އެންޑީއެމްއޭއިން ބުނެއެވެ. އަދި 18 ގެއަކުން އެސެސްމަންޓް ހަދަން ބޭނުންނޫން ކަމުގައި ފާހަގަކޮށްފައިވާއިރު އިތުރު 18 ގެއެއްގެ އެސެސްމެންޓް އާދިއްތަ ދުވަހު ހަދާނެ ކަމަށް އެންޑީއެމްއޭއިން ބުނެއެވެ.

އެންޑީއެމްއޭއިން ވަނީ މިފަހުން ރާއްޖެއަށް ކުރި ވިއްސާރައާ ގުޅިގެން މާލޭގެ 132 ގެއަކަށް އެހީތެރިކަން ފޯރުކޮށްދީފައެވެ. އެގޮތުން 91 ގެއަކަށް ވެލިބަސްތާ ޖަހާދީފައިވާއިރު، 8 ގެއެއްގެ 57 މީހުންނަށް ވަގުތީ ބޯހިޔާވަހިކަން ފޯރުކޮށްދީފައިވެއެވެ.

އެންޑީއެމްއޭއިން މުއައްސަސާތަކާއި ގުޅިގެން ގުދުރަތީ ކާރިސާތަކާއި އަދި އަލިފާނުގެ ހާދިސާތަކުގައި ގެއްލުން ލިބޭ އާއިލާތަކަށް އެހީތެރިކަން ފޯރުކޮށްދިނުމުގެ މަސައްކަތްތައް ކުރެއެވެ. އަދި އެސެސްމަންޓް ހެދުމަށްފަހު ފައިސާގެ އެހީތެރިކަން ފޯރުކޮށްދެއެވެ.