މިދިޔަ ސީޒަނުގެ އެފްއޭކަޕްގެ ޗެމްޕިއަން ކްލަބް ވެލެންސިއާއިން، މަގާމް ދިފާއު ކުރުމަށް އަޒުމް ހިފައި ސްކޮޑް ވަރުދަގަ ކުރަން ފަށައިފިއެވެ.
ސްކޮޑް ވަރުގަދަ ކުރުމަށް އެޓީމުން ވަނީ ކްލަބް އީގަލްސް އަށް ކުޅެމުން އައި ތިން ކުޅުންތެރިއަކު ހޯދައިފައެވެ. އެ ތިން ކުޅުންތެރިންނަކީ، މިފަހަރުގެ ސީޒަނުގެ ބޮޑު ބައެއްގައި އަނިޔާގައި ހުރި، ހުނަރުވެރި މިޑްފިލްޑަރު އަހްމަދު ނާޝިދް (ނާއްޓެ) އާއި، ކުރިންވެސް ވެލެންސިއާ އަށް ކުޅެފައިވާ މުޖްތާޒް މުހަންމަދު (މުޖޭ) އާއި، އީގަލްސް އަށް ކުޅެމުން އައި ސްރީ ލަންކާގެ ގައުމީ ޓީމުގެ އެއް ނަމްބަރު ކީޕަރު ސޫޖަން ޕެރޭރާ އެވެ.
ވެލެންސިއާއިން މި ތިން ކުޅުންތެރިންގެ ސޮއެ ހޯދާފައި ވާއިރު، މިފަހަރުގެ ޓްރާންސްފާ ބްރޭކްގައި އެޓީމަށް ކުޅެމުން އައި މުހިންމު ކުޅުންތެރިންތަކެއް ވަނީ ކްލަބް ދޫކޮށް ޕްރެމިއާ ލީގުގައި ވާދަކުރާ ކްލަބް ތަކަށް ބަދަލުވެފައެވެ. އެގޮތުން އެޓީމުގެ ކީޕަރު މުހަންމަދި ފައިސަލް އާއި އެޓިމްގެ ކެޕްޓަން އަހްމަދު ޝާފިއު (ޝާފީ) ވެސް ހިމެނެއެވެ.
އެފްއޭކަޕް ދިފާއު ކުރުމަށް އަމާޒު ހިފާފައިވާ ވެލެންސިއާއަށް މިފަހަރުގެ ސީޒަނުގައި މިހާތަނަށް މާ އެދެވޭ ކުޅުމެއް އަދި ދެއްކޭގޮތް ވަނީ ނުވެފައެވެ. އެގޮތުން މާލެ ލީގު އެޓީމުން ނިންމާލާފައިވަނީ ތާވަލުގެ އެންމެ ފުލުން ދެވަނައިގައެވެ.
