ސްޕާތަކުގެ ނަމުގައި ހިންގާ ފާހިޝް އަމަލުތައް ހުއްޓުވުމަށް ޚާއްސަ މަސައްކަތްތަކެއް ފަށާފައިވާކަމަށް، ކޮމިޝަނަރ އޮފް ޕޮލިސް (ސީޕީ) އަލީ ޝުޖާއު ވިދާޅުވެއްޖެއެވެ.
އާދިއްތަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ސީޕީ ވިދާޅުވީ، ގްރޭޓަރ މާލެ ސަރަހައްދުގެ ސްޕާތަކުގެ ނަމުގައި ހިންގާ ފާހިޝް އަމަލުތައް ހުއްޓުވުމަށް ޚާއްސަ މަސައްކަތްތަކެއް ފަށާފައިވާކަމަށެވެ.
އެގޮތުން އެފަދަ ވިޔަފާރިތައް ހިންގާ މީހުންނާއި، އެކަމުން ނަފާ ލިބޭ މީހުން ހޯދައި، ފިޔަވަޅު އަޅާނެކަމަށް ސީޕީ ވިދާޅުވިއެވެ.
އެފަދަ ވިޔަފާރިތައް ހިންގާ މީހުންނާ، އޭގެ ނަފާ ލިބޭ މީހުން އަޅުގަނޑުމެން ބަލާ، ފިޔަވަޅު އެޅިގެންދާގޮތަށް އަޅުގަނޑުމެންގެ މަސައްކަތްތައް ބައްޓަން ކުރާނަން.ކޮމިޝަނަރ އޮފް ޕޮލިސް، އަލީ ޝުޖާއު
ކުޑަކުދިންނާއި، އަންހެނުންނަށް ކުރާ އަނިޔާއަށް އިޝާރާތް ކުރައްވައި ސީޕީ ވިދާޅުވީ، މިފަދަ އަނިޔާތަކުގެ މައްސަލަތަކާމެދު އަޅައިނުލާ ދޫކޮށްނުލާނެ ކަމަށާއި، މިފަދަ މައްސަލަތަކަށް ޚާއްސަ ސަމާލުކަމެއް ދޭނެކަމަށެވެ.
މީގެ އިތުރުން ސީޕީ ވިދާޅުވީ ޓެރަރިޒަމްގެ އަމަލުތައް ހުއްޓުވުމަށްވެސް ފުލުހުންގެ ހުރިހާ ރިސޯސްތަކެއް ބޭނުންކުރާނެ ކަމަށެވެ.
ޓެރަރިޒަމަށް ތިމާ ގަބޫލުކުރާ ގޮތް، ނުވަތަ ފިކުރު ނޫން ބަޔަކީ ދުނިޔޭގައި ތިބެންޖެހޭ ކަމެއް ނޫން ކަމަށް ގަބޫލުކުރާ މީހުން، ފުލުހުންގެ ހުރިހާ ރިސޯސްތަކެއް ބޭނުންކޮށްގެން ބަލަމުން ގެންދާނަން. އަދި މިފަދަ އަމަލުތަކުން މުޖުތަމައު ސަލާމަތްކުރުމަށް ކުރަންޖެހޭ މަސައްކަތްތައް އަޅުގަނޑުމެން ވަރަށް ސާބިތުކަމާއެކު ކުރާނަން.ކޮމިޝަނަރ އޮފް ޕޮލިސް، އަލީ ޝުޖާއު
ސީޕީ ވިދާޅުވީ މުޖުތަމައުގެ ސަލާމަތާއި ރައްކާތެރިކަން ކަށަވަރުކުރާނެ ކަމަށާއި، ސައިބަރ ކްރައިމް، ފައިނޭންޝަލް ކްރައިމް، އަދި ސްކޭމްގެ މައްސަލަތައް ޚާއްސަ ސަމާލުކަމެއްދީގެން މަސައްކަތްތައް ކުރާނެ ކަމަށެވެ. މިކަންކަމަށް ވިކްޓިވައިޒްވާ ފަރާތްތަކަށް ލިބޭ ގެއްލުންތައް ކުޑަކުރާނެ ކަމަށް ސީޕީ ވިދާޅުވިއެވެ.
ގިނަ މަސައްކަތްތަކެއް ކުރާނެކަމަށް ސީޕީ ވިދާޅުވިނަމަވެސް، މަސައްކަތްތައް ކުރިއަށް ގެންދާ ގޮތުގެ ތަފްސީލެއް ހާމަކޮށްފައިނުވެއެވެ.
