ޑިފެންސް މިނިސްޓްރީގެ ސިޔާސީ މަގާމަކަށް އިސްޓަގްރާމް މޮޑެލްގެ ގޮތުގައި މަޝްހޫރު ފަރާތެއް އައްޔަންކުރުމާއި ގުޅިގެން ފާޑުކިޔުން އަމާޒުވުމުން އެކަން އިއުލާނުކޮށް ޑިފެންސް މިނިސްޓްރީން އެކްސްގައި ކުރި ޕޯސްޓް ޑިލިޓް ކޮށްފިއެވެ.
މި ޕޯސްޓް ޑިލިޓް ކުރުމާއި ގުޅިގެން ރާއްޖެއެމްވީއަށް ޑިފެންސް މިނިސްޓްރީގެ އޮފިޝަލެއް ވިދާޅުވީ މިނިސްޓްރީގެ ރަސްމީ އެކައުންޓުން ކޮށްފައިވާ ޕޯސްޓެއް ޑިލިޓް ކުރެވިގެން ނުވާނެ ކަމަށެވެ. އަދި އެޕޯސްޓް ޑިލިޓް ކުރީ ކީއްވެގެންކަން ކާކު އަންގައިގެން ސާފުނުވާ ކަމަށް އޮފިޝަލް ވިދާޅުވިއެވެ.
އިންސްޓަގްރާމް މޮޑެލްގެ ގޮތުގައި މަޝްހޫރު ފަރާތަކަށް ޑިފެންސްގެ މަގާމެއް އައްޔަން ކުރުމާއި ގުޅިގެން ގިނަ ބައެއްގެ ފާޑުކިޔުން ވަނީ އަމާޒުވެފައެވެ. މިފަދަ މަގާމުތަކަށް އައްޔަންކުރާ ބޭފުޅުންގެ ތައުލީމީ ފެންވަރު އާއްމު ކުރުމަށް ވެސް ގިނަ އަދަދެއްގެ އާއްމު ރައްޔިތުން ގޮވާލާފައިއެވެ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުގައި ޑިފެންސް މިނިސްޓްރީގެ ޕޮލިޓިކަލް ޑިރެކްޓަރުގެ މަގާމަށް ފާތިމަތު ސަފާ އަހުމަދު އައްޔަން ކުރެއްވުމާއި ގުޅިގެން އެމިނިސްޓްރީން ވަނީ އެކްސްގައި މަރުހަބާ ދަންނަވާ ޕޯސްޓެއް ކޮށްފައެވެ. ނަމަވެސް މިހާރު އެޕޯސްޓު ވަނީ ޑިލިޓްކޮށްލާފައެވެ.
