ރާއްޖޭގެ މޫސުން ގޯސްވެ، ފުވައްމުލަށް ސިޓީން އައްޑޫ ސިޓީއަށް އޮރެންޖް އެލާޓް ނެރެފިއެވެ.

އޮރެންޖް އެލާޓް ނެރިފައިވަނީ ބުދަ ދުވަހުގެ މެންދުރުފަހުން 1:20 އިން 3:20ށެވެ.

މޫސުމާބެހޭ ގައުމީ އިދާރާއިން ބުނީ ގުގުރުމާއެކު ބޯކޮށް ވާރޭވެހި ފެންބޮޑުވާނެ ކަމަށް ލަފާކުރެވޭ ކަމަށެވެ.

މީގެ އިތުރުން މޫސުމާބެހޭ ގައުމީ އިދާރާއިން ބުނީ ކުރިއަށް އޮތް 24 ގަޑިއިރު އިރުއުތުރާއި އިރުން ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައި ޖެހޭނެ ކަމަށާއި، ވިލާގަނޑުގައި ގަޑިއަކު 40 މޭލުގެ ބާރުމިނަށް ވައިގަދަވުން އެކަށީގެންވާ ކަމަށެވެ. އަދި ކަނޑުތައް ގަދަވާނެ ކަމަށާއި، ރާޅުގެ އުސްމިނުގައި 4 އާއި 7 ފޫޓު ހުންނާނެ ކަމަށެވެ.

މޫސުމާބެހޭ ގައުމީ އިދާރާއިން ބުނީ 24 ޑިސެންބަރު 2023 ވަނަ ދުވަހު ރާއްޖެއަށް އިރުވައި މޫސުން ގާއިމް ވުމާއި ގުޅިގެން ކުރިއަށް އޮތް 3 ދުވަހު ޚާއްސަކޮށް އުތުރާއި މެދުރާއްޖެތެރޭގައި ގަދަވަޔާއެކު ކަނޑުތައް ވަރަށް ގަދަވާނެ ކަމަށް ލަފާކުރެވޭ ކަމަށެވެ. އަދި ބައެއް ރަށްތަކަށް ގުގުރުމާއެކު ބޯކޮށް ވާރޭވެހުން އެކަށީގެންވާ ކަމަށެވެ.

ޚާއްސަކޮށް ކަނޑުދަތުރު ކުރާ މީހުންނާއި، ބުރިޖް ހައިވޭގައި ދަތުރުކުރާއިރު، މޫސުމަށް ވަރަށް ބޮޑަށް ސަމާލުވަމަށް ވަނީ އިލްތިމާސްކޮށްފައެވެ.