މިސްކިތްތަކާ ބެހޭ މަޖިލިސް އަލުން އެކުލަވާލަން ސަރުކާރުން ނިންމައިފައިވާކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެއެވެ.
އެ މަޖިލިސް އަލުން އެކުލަވައިލުމާ ގުޅޭގޮތުން އެކްސްގައި މިނސްޓަރު ކުރެއްވި ޕޯސްޓެއްގައި ވިދާޅުވީ ރައީސް ޑރ. މުޙައްމަދު މުއިއްޒުގެ މެނިފެސްޓޯގައި މިސްކިތްތަކަށް ޚާއްސަ އަހަންމިއްޔަތުކަމެއް ދިނުމަށް ވައުދުވެވަޑައިގެންފައިވާ ކަމަށެވެ.
މިސްކިތްތަކާ ބެހޭ މަޖިލިސް އެކުލަވައިލަން އަލުން ނިންމެވީ އެހެންވެކަމަށް މިނިސްޓަރު ވިދާޅުވިއެވެ. މިނިސްޓަރު ޝަހީމް ވިދާޅުވީ މި މަޖިލީހަކީ މިސްކިތްތަކާއި އިމާމުންގެ ކަންކަމުގައި އިސްތިޝާރީ ލަފާ ދޭ މަޖިލީހެއްކަމުގައެވެ.
މި ވަގުތު ރާއްޖޭގައި ހާހެއްހާ މިސްކިތް ހުރިކަމަށް މިނިސްޓަރ ވިދާޅުވިއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ފުރަތަމަ 100 ދުވަހުގެ ވައުދުތަކުގެ ތެރޭގައި މިސްކިތްތަކުގެ ހާލަތު ދެނެގަނެވޭނެ ނިޒާމެއް ގާއިމްކުރުން ހިމެނެއެވެ.
