ވިކްޓްރީ ސްޕޯޓްސް ކުލަބަށް ކުޅެމުން އައި ތަޖުރިބާކާރު މިޑްފިލްޑަރު މުހަންމަދު އާރިފް (ބަކާ) މާލެ ލީގުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާއި ގުޅިއްޖެއެވެ.
މާލެ ލީގު ކާމިޔާބު ކުރުމަށްފަހު ދިވެހި ޕްރެމިއާ ލީގަށް ސްކޮޑް ވަރުގަދަ ކުރަމުން އަންނަ މާޒިޔާއިން ވަނީ މިފަހަރުގެ ޓްރާންސްފާގައި، މިހާތަނަށް ވިކްޓްރީއަށް ކުޅެމުން އައި 4 ކުޅުންތެރިއެއްގެ ސޮއެ ހޯދާފައެވެ. ބަކާގެ އިތުރުން މާޒިޔާއިން ވަނީ ވިކްޓްރީއަށް ކުޅެމުން އައި ސީރިއާގެ ގޯލްކީޕަރު މަހުމޫދް އަލް ޔޫސުފާއި، ކްރޮއޭޝިއާގެ ފޯވާޑް ކެރިޗް އަންދްރޭޖް އާއި ވިކްޓްރީގެ ކެޕްޓަން ބޭންޑް އަޅައިގެން ކުޅެމުން އައި އިސްމާއީލް އީސަ (މެސީ) ގެ ސޮއެވެސް ހޯދާފައެވެ.
މިހާރު ރާއްޖޭގައި ހުރި އެންމެ ތަޖުރިބާކާރު އެއް މިޑްފިލްޑަރު ބަކާ ވަނީ މީގެ ކުރިންވެސް މާޒިޔާއަށް ކުޅެފައެވެ. އެގޮތުން މިއީ މާޒިޔާއަށް އޭނާ ސޮއެކުރި ދެވަނަ ފަހަރަށެވެ. ބާކާ އެންމެ ފުރަތަމަ މާޒިޔާ އާއި ގުޅުނީ 2013 ވަނަ އަހަރު އަލީ ސުޒޭންގެ ކޯޗުކަމުގެ ދަށުގައި މާޒިޔާ ކުޅެނިކޮށެވެ. އައިއެފްސީ އިން ކެރިއަރުފެށި ބަކާ ވަނީ މާޒިޔާގެ އިތުރުން، ނިއުރޭޑިއަންޓް، ވީބީ، ވިކްޓްރީ، ވެލެންސިއާ، އީގަލްސް އަދި މިޔަންމާގެ ކޭބީޒެޑަށް ވެސް ކުޅެފައެވެ.
މިސީޒަނުގައި ވިކްޓްރީގެ މެދުތެރެ ބެލެހެއްޓި ބަކާ ފާއިތުވި ސީޒަނުގައި ވަނީ ވެލެންސިއާއަށް އޭއެފްސީ ކަޕް ކާމިޔާބުކޮށްދިނުމުގައި މުހިންމު ދައުރެއް އަދާކޮށްދީފައެވެ.
