މިއަހަރު ދައުލަތުގެ ބަޖެޓުން ސިޔާސީ ޕާޓީތަކަށް ދޭން ޖެހޭ ފާއިސާ ނުދީ ހިފަހައްޓާފައި ވާތީ މިނިސްޓަރު އަހުމަދު މުނައްވަރު ޖަވާބުދާރީ ކުރެވޭނެ ކަމަށް އެމްޑީޕީގެ ޗެއަރޕާރސަން ހަސަން ލަތީފް ވިދާޅުވެއްޖެއެވެ.
ހަސަން ލަތީފް މިހެން ވިދާޅުވީ ޕާޓީތަކަށް ދޭން ޖެހޭ ފާއިސާ އަދިވެސް ދީފައި ނުވާތީ އެކަމށް އިޝާރާތްކުރައްވާ ކުރެއްވި ޓުވީޓެއްގައެވެ.
އޭނާ ވިދާޅުވީ ސިޔާސީ ޕާޓީތަކަށް ދޭން ޖެހޭ ފާއިސާ ނުދީ ޤާނޫނާ ޚިލާފަށް ހިފަހައްޓައިގެން ހުރި ފިނޭންސް މިނިސްޓަރ މުނައްވަރު ވެސް އަދި ޖަވާބުދާރީ ކުރެވޭނެ ކަމަށެވެ.
Siyaasee Party thakah dheynjehey faisa nudhee Ganoonaa Khilafah hifahattaigen huri Finance Ministaruves adhi Jawabdhaaree kuruveyne!! pic.twitter.com/SjDWHqeQkz
— Hassan Latheef (@HassanLatheef) July 23, 2017
އިލެކްޝަންސް ކޮމިޝަނުން ސިޔާސީ ޕާޓީތަކަށް ފައިސާ ދޫކުރުމަށް ފިނޭންސަށް ފޮނުވިތާ ދެ މަސް ވެފައިވާއިރު، މިއަހަރު ދައުލަތުގެ ބަޖެޓުން ފައިސާ ދިނުމަށް ހަމަޖެހިފައި ވަނީ ހަތަރު ޕާޓީއަކަށެވެ. އެއީ ޕީޕީއެމާއި އެމްޑީޕީއާއި ޖޭޕީ އާއި އެމްޑީއޭއެވެ.
ސިޔާސީ ޕާޓީތަކާ ބެހޭ ގާނޫނަށް ސަރުކާރުން މިދިޔަ އަހަރު ގެނައި ބަދަލުތަކާއި އެކު 3,000 މެންބަރުން ހަމަ ނުވާ ޕާޓީތައް މިހާރު ވަނީ އުވާލާފައެވެ. އަދި 10,000 މެންބަރުން ހަމަނުވާ ޕާޓީތަކަށް ދައުލަތުގެ ބަޖެޓުން ފައިސާ ނުދޭން ވަނީ ކަނޑައަޅާފައެވެ.
ފިންގަރ ޕްރިންޓް ނެތް މެމްބަރުން ވަނީ ޕާޓީތަކުގެ ދަފުތަރުން އުނިކޮށްފައެވެ. އެގޮތުން އެންމެ ގިނަ މެމްބަރުން އުނިވެގެންދިޔައީ އިދިކޮޅު އެންމެ ބޮޑު ޕާޓީ އެމްޑީޕީންނެވެ.
