ރައްޔިތުންގެ މަޖިލީހުގެ މެމްބަރުންނަށް މަޖިލީހުގެ އިދާރާއަށް ނުވަދެވޭ ގޮތަށް މަޖިލީހުގެ ގޭޓްތަކުގައި ތަޅު އެޅުވުމަކީ މަޖިލީސް ހިސޯރުކުރުން ކަމަށް، ކެންދޫ ދާއިރާގެ މެމްބަރު  އަލީ ހުސައިން ވިދާޅުވެއްޖެ އެވެ.

ރާއްޖެއެމްވީއާ ވާހަކަ ދައްކަވަމުން އަލީ ހުސައިން ވިދާޅުވީ "މަޖިލިސް އެ ވަނީ މަޖިލީހުގެ ރައީސް މަސީހު އާއި ނައިބު ރައީސް ރީކޯ މޫސަ އާއި ރައީސް ޔާމީނާއި ޖެނެރަލް ޝިޔާމް ވެގެން ހިސޯރުކޮށްފައި," ކަމަށެވެ.

"އެ ބޭފުޅުންނަކަށް އެކަމެއް ނުކުރެވޭނެ. މަޖިލީހުގެ މެމްބަރުން ބޭނުން ވަގުތެއްގައި މަޖިލީހަށް ވަދެވޭނެ. މިހާތަނަށް ވެސް އަމަލުކޮށްފައި އޮތީ އެގޮތަށް،" އަލީ ހުސައިން ވިދާޅުވި އެވެ.

"އެ ކުރެއްވީ ގާނޫނާ ހިލާފު ބޮޑު ކުށެއް."

މެމްބަރުންނަށް މަޖިލީހުގެ އިދާރާއަށް ނުވަދެވޭނެ ގޮތަށް ގޭޓްތަކުގައި ތަޅުއެޅުވީ ރައްޔިތުންގެ މަޖިލީހުގެ ރައީސް އަބްދުﷲ މަސީހު މަގާމުން ވަކިކުރަން މަޖިލީހުގެ އަޣުލަބިއްޔަތަށް ވުރެ ގިނަ މެމްބަރުން ސޮއިކުރައްވާ ހުށަހަޅުއްވާފައިވާ މައްސަލަ މަޖިލީހުން ބޭރުކޮށްލި ނަމަވެސް، މަޖިލީހުގެ ޖަލްސާއެއް މިއަދު ބާއްވާނެ ކަމަށް ގުޅިފައިވާ ޕާޓީތަކުގެ މެމްބަރުން ވިދާޅުވެފައި ވަނިކޮށެވެ.

ގުޅިފައިވާ ޕާޓީތަކުގެ މެމްބަރުން މިއަދު މެންދުރު މަޖިލީހަށް ވަޑައިގަންނަވާ ގޮތަށް ނިންމާފައިވާ ކަމަށާއި މެމްބަރުންނަށް ރައްޔިތުންގެ ތަރުހީބު ބޭނުންވާ ކަމަށް ޕާޓީތަކުން ވަނީ ބުނެފަ އެވެ.

ރައްޔިތުންގެ މަޖިލީހުގެ އިތުބާރު މަސީހަށް ގެއްލި، އަދި މަޖިލީހުގެ މެޖޯރިޓީ ސަރުކާރަށް ގެއްލުމާއެކު، މަސީހުގެ އިތުބާރު ނެތްކަމުގެ މައްސަލައިގައި ސޮއި ކުރެއްވި 45 މެމްބަރުންގެ ތެރެއިން ހަ މެމްބަރެއްގެ ގޮނޑި ވަނީ ގެއްލުވާލައިފަ އެވެ.

ސުޕްރީމް ކޯޓުން ކުރި ހުކުމަކާ ގުޅިގެން ގޮނޑި ގެއްލިއްޖެ ކަމަށް އިލެކްޝަންސް ކޮމިޝަނުން ކަނޑައަޅާފައިވަނީ، ތުލުސްދޫ ދާއިރާގެ މެންބަރު މުހައްމަދު ވަހީދު އިބްރާހިމާއި، މަޑުއްވަރީ ދާއިރާގެ މެންބަރު މުހައްމަދު އަމީތާއި، ދިއްދޫ ދާއިރާގެ މެންބަރު އަބްދުއްލަތީފާއި، ވިލިނގިލީ ދާއިރާގެ މެންބަރު ސައުދު ހުސެއިންއާއި، ދަނގެތީ ދާއިރާގެ މެންބަރު އިލްހާމް އަހުމަދުގެ އިތުރުން މައްޗަންގޯޅީ ދެކުނު ދާއިރާގެ މެންބަރު އަބްދުﷲ ޝިނާންގެ މެންބަރު ކަމުގެ ގޮނޑި އެވެ.